قازاقتان شىققان تۇڭعىش پيانيست

الماتى. قازاقپارات- تالانت تاعدىرى دەگەنىمىز - سان قىرلى ءومىردىڭ وزىندەي كۇردەلى دە قىزىق.

كەيبىرى ءوز كەزىندە جۇلدىزى جارقىراي جانىپ، تانىمال تۇلعاعا اينالعانىمەن، زىمىرانداي جىلجىعان ءومىر كوشىندە ۋاقىت تاساسىندا قالىپ، ەسىمى دە، ارتىندا قالدىرعان ءىزى دە كومەسكى تارتا بەرەدى. كاسىبي ورتادا، اعايىن- تۋىس اراسىندا بولماسا، جالپى جۇرتشىلىقتىڭ جادىنان ءوشىپ، بەيمالىم بەينەلەردىڭ قاتارىنا قوسىلىپ جاتادى.

سونداي جانداردىڭ ءبىرى - گۇلجاۋھار شومبالوۆا. وتكەن جىلدىڭ جەلتوقسان ايىندا تۋعانىنا 100 جىل تولعان ونەر يەسىنىڭ عاسىرلىق مەرەيتويى ەلىمىزدە اتاۋسىز قالدى. سول سەبەپتى ونى، قازاق ونەرى قارلىعاشتارىنىڭ ءبىرى رەتىندە، كوپشىلىكتىڭ ەسىنە سالىپ، ەسىمىن قايتا جاڭعىرتىپ قويۋدى ءجون كوردىك.

گۇلجاۋھار ايىپ قىزى - قازاقتان شىققان تۇڭعىش كاسىبي پيانيست ءارى مۋزىكاتانۋشى عالىم. 1919 -جىلعى 20-جەلتوقساندا ورال وبلىسىنىڭ جانىبەك اۋدانىنداعى قارپىق اۋىلىندا دۇنيەگە كەلگەن. اكەسى ايىپ - بوكەي حاندىعىنىڭ اعارتۋشى- رەفورماتورى جاڭگىر حاننىڭ ساياسي جاقتاستارىنىڭ ءبىرى، سەنىمدى سەرىكتەسى بولعان نوعاي- قازاق رۋىنىڭ اتاقتى ءبيى شومبال نيازوۆتىڭ تىكەلەي ۇرپاعى.

قازاق زيالىلارىنىڭ قالىپتاسۋ تاريحىندا وزىندىك ورنى بار بۇل رۋدان الاش قايراتكەرى باتىرقايىر نيازوۆ، قازاقستانداعى العاشقى ءدارىحانا ءىسىن ۇيىمداستىرۋشى دارىگەر ءماجيت شومبالوۆ، اقىن عۇمار قاراش سياقتى كوپتەگەن ايتۋلى تۇلعالار شىققان. گۇلجاۋھار شومبالوۆانى سولاردىڭ لايىقتى وكىلى دەۋگە بولادى. جاس رەسپۋبليكامىزدا مادەني مەكەمەلەر، ونەر وشاقتارى شاڭىراق كوتەرىپ، مۋزىكا مادەنيەتىنىڭ العاشقى وركەندەرى قانات جايا باستاعان وتكەن عاسىردىڭ 30-جىلدارى ونەر جولىنا قادام باسقان جاس ءوسپىرىم قىز قازاقستاننىڭ مۋزىكالىق ومىرىندەگى ءماندى دە ماڭىزدى وقيعالار مەن قۇبىلىستاردىڭ بەل ورتاسىندا ءجۇردى.

بۇل تۇرعىدا ونى، شىن مانىندە، تىڭنان تۇرەن سالعان ءىزاشارلاردىڭ ءبىرى دەۋگە تولىق نەگىز بار. 1930 -جىلدارى قازاقستانداعى تۇڭعىش ورتا مۋزىكالىق وقۋ ورنى - الماتى مۋزىكا تەحنيكۋمى اشىلعاندا، گۇلجاۋھار العاشقى ستۋدەنتتەردىڭ قاتارىندا وسى ءبىلىم ورداسىنىڭ تابالدىرىعىن اتتادى. تەحنيكۋمنىڭ وقۋ ءبولىمىنىڭ مەڭگەرۋشىسى قازاقتىڭ زاماناۋي مۋزىكا مادەنيەتىنىڭ نەگىزىن قالاۋشى، سول كەزدەگى لەنينگراد ونەرتانۋ اكادەمياسىنىڭ اسپيرانتى احمەت جۇبانوۆ ەدى. گۇلجاۋھار مۇندا ورىس مۋزىكا ءبىلىمىنىڭ رەفورماتورى، اتىشۋلى پيانيست- پەداگوگ ك. يگۋمنوۆتىڭ شاكىرتى، جوعارى كاسىبي مامان گ. پەتروۆتىڭ فورتەپيانو كلاسى بويىنشا ءبىلىم الدى.

تەحنيكۋم قابىرعاسىندا وقىعان تۇڭعىش ءارى جالعىز قازاق قىزى ءوزىن تالانتتى شاكىرت رەتىندە كورسەتە ءبىلدى.

گۇلجاۋھار شومبالوۆا اتالعان وقۋ ورنىندا 2-كۋرستا وقىپ جۇرگەنىندە-اق 1936 -جىلى ماسكەۋدە وتكەن قازاق ادەبيەتى مەن ونەرىنىڭ العاشقى ونكۇندىگىنە قاتىسىپ، سول كەزدەگى سوۆەت وداعى استاناسىندا ايگىلى ساحنا شەبەرلەرىمەن بىرگە ونەر كورسەتۋ قۇرمەتىنە يە بولدى. 1940 -جىلى ۋچيليشەنى ۇزدىك اياقتاعان، بولاشاعىنان زور ءۇمىت كۇتتىرەتىن تالاپتى جاس ءوزى تۇلەپ ۇشقان ءبىلىم وشاعىندا جۇمىسقا قالدىرىلدى.

ەڭبەك جولىن وسى مۋزىكا تەحنيكۋمىنىڭ وقىتۋشىسى رەتىندە باستاپ، بولاشاق ماماندار تاربيەلەۋگە وزىندىك ۇلەسىن قوسۋعا تىرىستى. ۇزاماي جامبىل اتىنداعى قازاق مەملەكەتتىك فيلارمونياسىنا شاقىرىلدى. وسىندا 1942- 1945 -جىلدارى حور كاپەللاسىنىڭ پيانيست- كونسەرتمەيستەرى بولىپ قىزمەت ىستەدى. جاس مۋزىكانتتىڭ كاسىبي ءوسۋ، شەبەرلىگىن شىڭداۋ شاعى ەل ومىرىندەگى اۋىرتپالىقتى كەزەڭمەن تۇسپا- تۇس كەلەدى.

قارشاداي قىز ۇلى وتان سوعىسى جىلدارى فيلارمونيا ارتىستەرىمەن بىرگە ەلىمىزدىڭ شىعىس شەبىندەگى اسكەري بولىمدەر مەن گوسپيتالدەردە ونەر كورسەتەدى. جاۋىنگەرلەردى ەرلىككە جىگەرلەندىرگەن كونسەرتتىك باعدارلامالارعا قاتىسىپ، تالانتى مەن شەبەرلىگىنىڭ ارقاسىندا زور قوشەمەتكە بولەندى. ۇكىمەت تاراپىنان ارنايى توسبەلگىلەرمەن جانە گراموتالارمەن ماراپاتتالدى. الماتىعا قونىس اۋدارعان «موسفيلم» جانە «لەنفيلم» كينوستۋديالارى نەگىزىندە 1943 -جىلى بىرلەسكەن ورتالىق كينوستۋديا (س و س ك) قۇرىلعان بولاتىن.

سول كينوستۋديادا مايداندا شايقاسىپ جاتقان قازاقستاندىق جاۋىنگەرلەرگە دەم بەرۋ، ولاردى جەڭىس جولىندا قاھارماندىقپەن شايقاسۋعا رۋحتاندىرۋ ماقساتىندا «دومبىرا سازى» اتتى ارنايى فيلم- كونسەرت ءتۇسىرىلدى. كينوكونسەرتكە كۇلاش جانە قانابەك بايسەيىتوۆتەر، قاليبەك قۋانىشبايەۆ، شارا جيەنقۇلوۆا، انۋاربەك ۇمبەتبايەۆ، جامال وماروۆا، ءۇريا تۇردىقۇلوۆا ءتارىزدى تارلاندارمەن، وزگە دە بەلگىلى ونەرپازدارمەن بىرگە جاس پيانيست گۇلجاۋھار شومبالوۆا دا ءتۇستى. ول جاس ءپيانيستىڭ ءرولىن سومدادى.

بۇل بىرەگەي فيلم كەيىننەن رەسپۋبليكا كينو ونەرىنىڭ التىن قورىنا ەنگەن تۋىندىلار قاتارىنان ورىن العان. 1944 -جىلى الماتى كونسەرۆاتورياسى (قازىرگى قازاق ۇلتتىق كونسەرۆاتورياسى) شاڭىراق كوتەرگەن ەدى. گۇلجاۋھار وسى جاڭا جوعارى مۋزىكالىق وقۋ ورنىنىڭ تاريح- تەوريا فاكۋلتەتىنە تۇسەدى. وقي ءجۇرىپ، ماماندىعى بويىنشا ەڭبەك ەتۋىن ودان ءارى جالعاستىرادى.

كونسەرۆاتوريا قابىرعاسىندا مىندەتتى فورتەپيانو كلاسىندا ساباق بەرەدى. 1950 -جىلى كونسەرۆاتوريانى ويداعىداي اياقتاپ، مۋزىكاتانۋشى ماماندىعى بويىنشا جوعارى ءبىلىم الادى. تەوريالىق ءبىلىمدى كاسىبي ماشىقپەن جانە ۇستازدىق ىزدەنىستەرىمەن شەبەر ۇشتاستىرا بىلەدى. ۋاقىت وتكەن سايىن تالانتتى جاستىڭ شەبەرلىگى شىڭدالىپ، تاجىريبەسى كەمەلدەنە تۇسەدى. وسى تۇستا عىلىمي- زەرتتەۋشىلىك دارىنى دا جارقىراپ بوي كورسەتە باستايدى.

ول ستۋدەنتتىك جىلدارىنان باستاپ عىلىمي زەرتتەۋلەر جۇرگىزۋ جانە وپەرا شىعارمالارىنا مۋزىكالىق- درامالىق ساراپتاما ماقالالار جازۋمەن شۇعىلدانعان- تىن. وپەرالىق قويىلىمدار مەن سيمفونيالىق وركەستردىڭ كونسەرتتەرى، وداقتاس رەسپۋبليكالاردىڭ ءتۇرلى مۋزىكا ۇجىمدارى مەن ورىنداۋشىلارىنىڭ گاسترولدىك ساپارلارى ءتارىزدى رەسپۋبليكامىزدىڭ مادەني ومىرىندە بولىپ جاتقان شارالار جايىنداعى ماقالالارى، رەتسەنزيالارى مەن پىكىرلەرى مەرزىمدى باسىلىم بەتتەرىندە ءجيى جاريالانىپ تۇردى.

ءسويتىپ، جاس مامان زەرتتەۋشىلىك قابىلەت- قارىمىمەن دە كەڭىنەن تانىلدى. ورىنداۋشى پيانيست رەتىندە فورتەپيانولىق كونسەرتتەر بەرىپ، مادەني ومىرگە بەلسەنە ارالاستى. بەلگىلى كومپوزيتور ە. برۋسيلوۆسكي «فورتەپيانوعا ارنالعان ەكسپرومت» اتتى تۋىندىسىن شومبالوۆانىڭ ورىنداۋىنا، كونسەرتتىك رەپەرتۋارىنا ارناپ شىعارادى.

الماتى كونسەرۆاتورياسىندا ءبىلىم الىپ جۇرگەن جىلدارى گ. شومبالوۆا پروفەسور پ. اراۆيننىڭ جەتەكشىلىگىمەن قازاقتىڭ ۇلى اقىنى ءارى اعارتۋشىسى اباي قۇنانبايەۆتىڭ مۋزىكالىق شىعارماشىلىعىن زەرتتەۋمەن اينالىسىپ، اقىن- كومپوزيتوردىڭ ءان مۇراسىن ديپلومدىق جۇمىسىنىڭ تاقىرىبى ەتىپ العان-دى. مۇندا ول اباي اندەرىنىڭ اۋەز- ىرعاعىنا ورىستىڭ رومانستىق مۋزىكاسىنىڭ وزىندىك اسەر- ىقپالى بولعانىن، سونىڭ نەگىزىندە قازاقتىڭ ءان ونەرىندە رومانس جانرىنىڭ قالىپتاسىپ، دامىعانىن ءبىرىنشى رەت اتاپ كورسەتتى.

سونىمەن قاتار ءداستۇرلى قازاق ءان ونەرىندەگى اباي شىعارماشىلىعىنىڭ ەلەۋلى اۋەندىك، ءتۇرلى جاڭالىعىن جان- جاقتى تالداپ، عىلىمي تۇرعىدا نەگىزدەدى. كەيىننەن بۇل تاقىرىپ مۋزىكاتانۋشىنىڭ باسقا دا ەڭبەكتەرىندە كورىنىس تاپتى.

ماسەلەن، «قازاق مۋزىكا مادەنيەتى» (1957 ج. ) جيناعىنا ەنگەن «اباي اندەرى» اتتى كولەمدى ماقالاسىندا اقىننىڭ ءان شىعارماشىلىعىن ۇلتتىق مادەني مۇرا تۇرعىسىنان قاراستىرىپ، ونىڭ قازاق مۋزىكاسىنا قوسقان ۇلەسىنە لايىقتى باعا بەرگەن. يدەيالىق جانە ادىستەمەلىك تىڭ ويلارمەن تولىقتىرىلعان بۇل زەرتتەۋى كەيىننەن كانديداتتىق ديسسەرتاتسياسىنىڭ ءبىر تاراۋىنا ەنەدى. سول جىلدارى رەسپۋبليكادا ءار سالادا ۇلتتىق ماماندار دايارلاۋ، عىلىمي كادرلار قالىپتاستىرۋ ماسەلەسىنە باسا نازار اۋدارىلىپ، كەڭىنەن قولعا الىنعانى بەلگىلى.

وسى ماقساتپەن رەسپۋبليكا ۇكىمەتى گۇلجاۋھاردى قازاقستانداعى بىردەن- ءبىر مۋزىكاتانۋشى مامان رەتىندە پ. چايكوۆسكيي اتىنداعى ماسكەۋ كونسەرۆاتورياسىنا اسپيرانتۋراعا وقۋعا جىبەرەدى. اسپيرانتۋرادا وقىپ جۇرگەنىندە گ. شومبالوۆا عىلىمي جۇمىسقا ءبىرجولا دەن قويادى. ونىڭ عىلىمي جەتەكشىسى - كورنەكتى مۋزىكاتانۋشى عالىم، پروفەسسور ۆ. بەليايەۆ ماسكەۋ كونسەرۆاتورياسىنىڭ تاريحىندا العاش رەت ءبىلىم الىپ جاتقان «قازاق قىزى شومبالوۆا ءوزىنىڭ بار كۇش- جىگەرى مەن قاجىر- قايراتىن تۋعان حالقىنىڭ مۋزىكا ونەرىنىڭ وركەندەۋ جولىنا ارنايدى» دەپ زور سەنىم ءبىلدىردى.

گۇلجاۋھار ءوز جەتەكشىسىنىڭ تىلەگىنە ساي ىزدەنە ءبىلىپ، رەسپۋبليكا وكىمەتى ارتقان ءۇمىتتى ابىرويمەن اقتايدى. ماسكەۋدە وقىعان جىلدارى قازاقستان مۋزىكاتانۋ ونەرىن دامىتۋعا اسا قاجەتتى زەرتتەۋلەر جۇرگىزۋمەن اينالىسادى، سالماقتى ەڭبەكتەر جازادى. سونداي- اق «سوۆەت داۋىرىنە دەيىنگى قازاق مۋزىكاسىنىڭ جازىلۋ جانە زەرتتەلۋ تاريحىنىڭ وچەركتەرى» تاقىرىبىندا كانديداتتىق ديسسەرتاتسيا جازۋدى قولعا الادى.

مۋزىكا تانۋشى عالىمنىڭ ديسسەرتاتسيالىق جۇمىسى، تاقىرىبى مەن زەرتتەۋ نىسانى، عىلىمي ءتۇيىن- تۇجىرىمى تۇرعىسىنان جاڭاشىلدىعى مول ەڭبەك ەدى. ول XIX عاسىردىڭ سوڭى مەن XX عاسىردىڭ باسىندا حاتقا تۇسكەن قازاق مۋزىكاسىنىڭ سول كەزگە دەيىنگى بەيمالىم قۇندى جازبالارىن عىلىمي اينالىمعا ەنگىزۋگە قاتىستى ماتەريالدارعا اسا باي بولاتىن.

ديسسەرتاتسيادا ا. ەيحگورن، ا. ليەۆشين، س. رىباكوۆ، ت. ب. ءتارىزدى كورنەكتى عالىم، ساياحاتشى، ەتنوگرافتاردىڭ قازاق مۋزىكاسىن زەرتتەۋ ەڭبەكتەرىنە العاش رەت جان- جاقتى سيپاتتاما بەرىلە وتىرىپ، قازاق مۋزىكاسىنىڭ قالىپتاسۋى مەن دامۋىن ايقىندايتىن عىلىمي دالەلدى تۇجىرىمدار جاسالادى. گ. شومبالوۆا سونىمەن قاتار ديسسەرتاتسيالىق جۇمىسىندا شىعىستانۋشى عالىم شوقان ءۋاليحانوۆ پەن اقىن- اعارتۋشى اباي قۇنانبايەۆتىڭ قازاق حالقىنىڭ مادەني ومىرىندەگى زور ءرولىن ناقتى دالەلدەرمەن اشىپ كورسەتەدى.

ءسويتىپ، 1958 -جىلعى مامىر ايىندا ماسكەۋ كونسەرۆاتورياسىنىڭ عىلىمي كەڭەسىندە كانديداتتىق ديسسەرتاتسياسىن ويداعىداي قورعاعان گۇلجاۋھار ايىپ قىزى، رەسپۋبليكامىزداعى العاشقى مۋزىكاتانۋشى عالىم قىزداردىڭ ءبىرى رەتىندە وسى سالانىڭ كوشباسشىسىنا اينالادى. ديسسەرتاتسيالىق كەڭەستىڭ جۇمىسىنا بەلگىلى ارحەولوگ- عالىم، اكادەميك الكەي مارعۇلان دا قاتىسىپ، ەڭبەككە جوعارى باعا بەرەدى. الەمدىك جانە سوۆەت مۋزىكا مەكتەبىنىڭ ۇزدىك داستۇرلەرىن ناسيحاتتاعان جانە پراكتيكاعا ەنگىزە بىلگەن گۇلجاۋھار ايىپ قىزى بۇدان كەيىن الماتى كونسەرۆاتورياسىندا

«ك س ر و حالىقتارى مۋزىكاسىنىڭ تاريحى. قازاقتاردىڭ 1917 -جىلعا دەيىنگى مۋزىكا مادەنيەتى» كۋرسىنان ءدارىس وقىپ، بولاشاق ماماندار تاربيەلەيدى. سونىمەن قاتار تاريح- تەوريا فاكۋلتەتىندە اشىلعان فولكلور جانە حالىق شىعارماشىلىعى كابينەتىنىڭ مەڭگەرۋشىسى قىزمەتىن اتقارادى. ونىڭ وسى جىلدارى جازعان «مۇقان تولەبايەۆتىڭ شىعارماشىلىق جولى»، «ءبىرجان - سارا» جانە «اباي» وپەرالارى تۋرالى مۋزىكالىق- درامالىق تالداۋ نەگىزىندەگى عىلىمي ەڭبەكتەرى - رەسپۋبليكا مۋزىكا ونەرىنىڭ دامۋىنا ەلەۋلى ۇلەس بولىپ قوسىلعان سۇبەلى دۇنيەلەر.

وكىنىشكە قاراي، تالانتتى عالىم، شەبەر ورىنداۋشى- پيانيستىڭ عۇمىرى ۇزاق بولمادى. ول ديسسەرتاتسيا قورعاعاننان كەيىن بىرنەشە ايدان سوڭ، 39 جاسقا تولار- تولماستا اۋىر ناۋقاستان دۇنيە سالادى. گۇلجاۋھار قىسقا دا جارقىن عۇمىرىنىڭ وزەگىنە اينالعان باي شىعارماشىلىق جانە عىلىمي- زەرتتەۋشىلىك قىزمەتى ارقىلى قازاق مۋزىكا عىلىمى مەن ءبىلىمى سالاسىنا ولشەۋسىز ۇلەس قوسىپ، ۇلتتىق مۋزىكا مادەنيەتىندە تەرەڭ ءىز قالدىردى.

گ. شومبالوۆا تۋرالى ءسوز ەتكەندە، حالقىمىزدىڭ قوعامدىق- ساياسي جانە مادەني ومىرىندە ەرەكشە ورىن الاتىن اتاقتى قوجىقوۆتار اۋلەتى تۋرالى ايتپاي كەتۋ مۇمكىن ەمەس. گۇلجاۋھاردىڭ جۇبايى قۇلاحمەت قوجىقوۆ - قازاقتىڭ العاشقى سۋرەتشىلەرى قاتارىنان. ول - تۇركىستان ولكەسىندە پاتشالىق تۇسىندا ۇستازدىق قىزمەت اتقارعان رەفورماتور مۇعالىم، ولكەدەگى وقۋ- اعارتۋ سالاسىنىڭ كورنەكتى وكىلى، قوقاندا جاريالانعان تۇركىستان اۆتونومياسىنىڭ، سىرداريا وبلىسىنداعى «الاش» قوزعالىسىنىڭ بەلسەندى مۇشەسى.

سوۆەت وكىمەتى تۇسىندا مادەنيەت تاريحىن زەرتتەۋگە ەلەۋلى ۇلەس قوسقان عالىم، قوعام قايراتكەرى قوڭىرقوجا قوجىقوۆ پەن ۇلتتىق قولدانبالى ونەر شەبەرى، رەسپۋبليكامىزداعى تۇڭعىش دراما جانە وپەرا تەاترلارىندا كيىم تىگۋشى حالىق ىسمەرى ءلاتيپا قوجىقوۆا- لاپينانىڭ ۇلى. ءلاتيپا مۇڭايتپاس قىزى دايىنداعان ۇلتتىق كيىمدى كەزىندە رەسپۋبليكا ۇكىمەتى ا ق ش پرەزيدەنتىنە سىيعا تارتقان دەگەن دەرەك باسپا سوزدەن ءمالىم.

وسى تاماشا وتباسىنان ەلىمىزدىڭ قوعامدىق جانە مادەني ومىرىنەن ەلەۋلى ورىن الاتىن تۇتاس تالانتتار شوعىرى شىقتى.

ولار: تۇڭعىش سۋرەتشى- گرافيك، پلاكات شەبەرى، دەكوراتور، كىتاپ بەزەندىرۋشى قوجاحمەت قوجىقوۆ، قازاق بەينەلەۋ ونەرىنىڭ نەگىزىن قالاۋشىلاردىڭ ءبىرى، قازاق تەاترى مەن كينوسىنىڭ تۇڭعىش سۋرەتشىسى قۇلاحمەت قوجىقوۆ، العاشقى مونۋمەنتاليست- سۋرەتشى، مۇسىنشىلەردىڭ ءبىرى نۇراحمەت قوجىقوۆ جانە قازاق ك س ر ەڭبەك سىڭىرگەن ونەر قايراتكەرى، قازاق كينوسىنا «قىز جىبەكتەي» جاۋھاردى سىيلاعان اتاقتى رەجيسسەر سۇلتاناحمەت قوجىقوۆ. ءبىر وتباسىنان ءتورت بىردەي تۋما تالانتتىڭ ءوربۋى ومىردە سيرەك كەزدەسەتىن قۇبىلىس، وزىندىك فەنومەن ەكەنى حاق.

مۇنداي جايت باسقا حالىقتار تاريحىندا دا ساۋساقپەن سانارلىقتاي عانا. قوس شىعارماشىل تۇلعا - گۇلجاۋھار مەن قۇلاحمەتتىڭ وتباسىندا ساۋلە جانە گۇلنار ەسىمدى ەكى قىز دۇنيەگە كەلدى. گۇلنار ءوز تاعدىرىن شەتەلمەن بايلانىستىرسا، ساۋلە الماتىدا تۇرادى. كوپ جىلدار بويى جوعارى وقۋ ورىندارىندا اعىلشىن ءتىلى ءپانىنىڭ وقىتۋشى بولىپ ەڭبەك ەتتى. اتاقتى قوجىقوۆتار اۋلەتىنىڭ ىزدەۋشىسىنە، شىراقشىسىنا اينالعان ول سولار سالعان ىزگىلىكتى جولدى لايىقتى جالعاستىرىپ، قوعامدىق ومىرگە بەلسەنە ارالاسۋدا.

قازىر رەسپۋبليكالىق «ادىلەت» تاريحي- اعارتۋ قوعامىنىڭ اتقارۋشى ديرەكتورى، قازاقستان سۋرەتشىلەر جانە كينەماتوگرافيستەر وداقتارىنىڭ مۇشەسى. قوجىقوۆتارمەن قاتار ساياسي قۋعىن- سۇرگىنگە ۇشىراعان باسقا دا الاش ارىستارىنىڭ ەسىمىن قايتا ءتىرىلتۋ، ولاردى ناسيحاتتاۋ ىسىنە ۇيىتقى بوپ جۇرگەن بەلسەندى جان.

ەلىمىزگە ەڭبەگى سىڭگەن تۇلعالار تاريح تاساسىندا قالماسىن دەسەك، ولاردىڭ ەسىمدەرىن تەك مەرەيتويلار مەن ايتۋلى داتالار كەزىندە عانا ەسكە الىپ قويماي، ءسات سايىن جاڭعىرتا وتىرىپ، ۇلىقتاي بىلەيىك.

بۇل رەتتە تىلگە تيەك بولعان العاشقى پيانيست، مۋزىكا زەرتتەۋشىسى گۇلجاۋھار كەلىن بولعان، قازاق مادەنيەتى تاريحىندا وزىندىك ورنى جارقىراپ تۇرعان قوجىقوۆتار اۋلەتىن، قۇبىلىس سىندى وسى تاماشا ديناستيانى كوپشىلىكتىڭ جەتە تانىپ- بىلگەنى ابزال. بۇل تەك بۇگىنىمىز ەمەس، بولاشاعىمىز ءۇشىن دە اسا قاجەت.

بالجان حابدينا الماتى

«تۇركىستان »گازەتى