ەۋروپارلامەنت عيماراتىنا كوروناۆيرۋس جۇقتىرعاندار ورنالاستىرىلادى
جەرگىلىكتى بيلىك وكىلدەرى قازىردىڭ وزىندە ونىڭ ەكى عيماراتىن الدى. بۇل تۋرالى قازاقپارات Euronews-كە سىلتەمە جاساپ حابارلايدى.
جەرگىلىكتى بيلىك وكىلدەرىنە پلەنارلىق سەسسيالار وتەتىن ستراسبۋرگتەگى جانە كوميتەتتەر مەن كوميسسيالار جۇمىس ىستەيتىن بريۋسسەلدەگى عيمارات بەرىلدى. ەۋروپارلامەنت ءتوراعاسى داۆيد ساسسولي بۇل ۋاقىتشا شارا دەپ ۇمىتتەنەدى.
«ءبىز وسى ءبىر كۇردەلى سانيتارلىق-ەپيدەميولوگيالىق جاعداي كەزىندە ءبىزدىڭ عيماراتتارىمىزدىڭ ءبىرىن ءۇيسىز جانە قوعامنىڭ ءالسىز توپتارىنا ۇسىنۋدى ءجون كوردىك»، - دەدى ول.
بريۋسسەلدە گەلمۋت كول اتىنداعى كورپۋس ەكىگە بولىنەدى. بىرەۋى تۇراقتى مەكەن-جايى جوق ادامدارعا، ەكىنشىسى ۇيگە ورالا المايتىن اۋرۋحانالاردان شىعارىلعان ناۋقاستارعا ارنالعان.
پارلامەنت اسپازدارى ولاردى تاماقتاندىرادى. فرانسيا بيلىگى ستراسبۋرگتەگى عيماراتتا ۆيرۋس جۇقتىرعان ادامدارعا قىزمەت كورسەتەتىن مەديتسينالىق ورتالىق پايدا بولاتىنىن مالىمدەدى.
«الداعى اپتالاردا دياگنوستيكا جۇرگىزۋگە بولادى. بۇل پاندەميادان كەزىندە كوپتەگەن ادامنىڭ تەستىدەن ءوتۋى وتە ماڭىزدى. اۋرۋدان ەمدەلگەن نەمەسە سيمپتومسىز جانداردى وقشاۋلاۋ الداعى ۋاقىتتا قاجەت پە، جوق پا سونى شەشۋ كەرەك»، - دەدى ەۋروپارلامەنتتىڭ وكىلى جاۋمە دۋچ.
ناۋرىز ايىنىڭ ورتاسىنان باستاپ ەۋروپارلامەنت دەپۋتاتتارى مەن قىزمەتكەرلەرى قاشىقتان جۇمىس ىستەيدى. جاڭا جاعدايلارعا بەيىمدەلۋ وتە جىلدام ءوتتى. سىرتتاي جالپى وتىرىس وتكىزىلدى، وندا زاڭ شىعارۋشىلاردىڭ %90 ۇيدەن داۋىس بەردى.