پاندەمياعا قارسىلىق رەتىندە الەمدەگى ەڭ بيىك ءمۇسىن ساتىلىپ كەتە جازدادى

نۇر-سۇلتان. قازاقپارات - ءۇندىستاندا بەلگىسىز بىرەۋلەر الەمدەگى ەڭ بيىك ءمۇسىن گۋدجاراتتاعى «ىنتىماقتاستىق» ءمۇسىنىن عالامتور ارقىلى كوروناۆيرۋسپەن كۇرەسۋگە قاراجات جيناۋ ماقساتىندا ساتپاقشى بولعان.

اتالعان ءمۇسىن ۆادودورا قالاسىنىڭ ماڭىندا گۋدجارات شتاتىنداعى جاساندى كولگە ەلدىڭ ۇلت كوسەمدەرىنىڭ ءبىرى، قوعام قايراتكەرى ۆاللابحاي پاتەلدىڭ قۇرمەتىنە ارناپ تۇرعىزىلعان.

ونىڭ بيىكتىگى - 182 مەتر. استىنداعى تۇعىرتاسىمەن قوسا ەسەپتەگەندە بيىكتىگى 240 مەتر. بۇل نيۋ-يوركتاعى «ازاتتىق» مۇسىنىنەن ەكى ەسە بيىك بولسا، ق ح ر، حەنان پروۆينتسياسىنداعى 128 مەترلىك بۋددادان 54 مەتر بيىك.

The Indian Express- ءتىڭ حابارلاۋىنشا، 240 مەترلىك ءمۇسىن ءار ءتۇرلى زاتتاردى ينتەرنەت ارقىلى ساتۋعا ارنالعان ونلاين دۇكەن - OLX پلاتفورماسىندا ساتىلىمعا قويىلعان.

«توتەنشە جاعداي! «ىنتىماقتاستىق» ءمۇسىنى اۋرۋحانالار مەن مەديتسينالىق جابدىقتارعا قاراجات قاجەت بولعاندىقتان ساتىلاتىن بولادى. ءمۇسىننىڭ باعاسى 300 ميلليارد رۋپي (4 ميلليارد دوللار)» دەلىنگەن حابارلامادا.

جارناما العاش جاريالانعان كەزدە ەشكىم ونى الاياقتىق دەپ ويلاماعان. ءمۇسىندى ساتۋ تۋرالى ۇسىنىس 4- ساۋىردە OLX- تە پايدا بولعان. ءبىراق گۋدجارات اكىمشىلىگى ونى ءبىر كۇننەن كەيىن بايقاپ، پوليتسياعا جۇگىنگەن. سودان كەيىن ءمۇسىننىڭ ساتىلىمى تۋرالى جارناما سايتتان الىنىپ تاستالعان.

«OLX ونلاين پلاتفورماسى ساتىلىم تۋرالى جارنامانى ءتىپتى تەكسەرمەگەن»، - دەلىنگەن مەملەكەتتىك اكىمشىلىك حابارلاماسىندا.

ءۇندى ب ا ق وكىلدەرىنىڭ جازۋىنشا، بەلگىسىز بىرەۋلەر وسى ارقىلى ۇكىمەتتىڭ پاندەميامەن كۇرەسۋگە دايىن ەمەسىن مازاق ەتكىسى كەلگەن. مەموريالدى كەشەن كوروناۆيرۋستىڭ تارالۋىنا بايلانىستى كەلۋشىلەر ءۇشىن 17- ناۋرىزدان باستاپ جابىلعان.

قازىرگى ۋاقىتتا ءۇندىستاندا كوروناۆيرۋس جۇقتىرعان ادامداردىڭ سانى 4,3 مىڭنان اسادى، ال قايتىس بولعاندار سانى - 118.

ايتا كەتەيىك، پاتەل 1875-جىلى 31- قازاندا ءۇندىستاننىڭ ناديااد قالاسىندا دۇنيەگە كەلدى.

جوعارى مەكتەپتى بىتىرگەننەن كەيىن زاڭ فاكۋلتەتىن ءتامامداپ، قورعاۋشى بولىپ جۇمىس ىستەي باستادى.

1900-جىلدان باستاپ 1910-جىلعا دەيىن گودحرا مەن بالساد قالالارىندا قىلمىستىق ىستەر بويىنشا قورعاۋشى بولدى، وسى كەزەڭدە پاتەل ءۇندىستاننىڭ ەڭ تانىمال جانە تابىستى ادۆوكاتتارىنىڭ ءبىرى ەدى.

1910-جىلى لوندونعا باردى. 1913-جىلى ۆاللوحايما ءۇندىستانعا قايتىپ كەلىپ، احمەداباد قالاسىندا زاڭگەر قىزمەتىن اتقاردى.

ونىڭ تۇلعا بولىپ قالىپتاسۋىنا ماحاتما گانديدىڭ تيگىزگەن اسەرى وتە زور. پاتەل ماحاتمانىڭ ءۇندىستاننىڭ تاۋەلسىزدىككە جەتۋىنە دەگەن ۇمتىلىسىن قولدادى جانە گانديدىڭ ادال ءىزباسارى بولدى.

اعىلشىنداردان ءۇندىستان تاۋەلسىزدىك العانان كەيىن ۆاللابحاي ۆيتسە-مينيستر قىزمەتىن اتقاردى. پاتەل ءۇندىستاننىڭ شەكارالارىن ساقتاپ قالۋ جولىندا ۇلكەن كۇش جۇمسادى. حالىقتى كۇشپەن، قارۋمەن ەمەس، تىنىش جولمەن بىرىكتىردى. ەلدىڭ الدىنداعى وسىنداي قىزمەتى ءۇشىن حالىق ونى «ساردار» (جەتەكشى، كوشباسشى) دەپ اتاپ كەتتى.

ۆاللابحاي پاتەل 1950-جىلى 15- جەلتوقساندا بومبەيدە قايتىس بولعان. بۇل ءمۇسىننىڭ قۇرىلىسىنا ءۇندىستان ۇكىمەتى 430 ميلليون دوللار جۇمساعان. ءۇندىستاننىڭ پرەمەر-ءمينيسترى نارەندرا موديدىڭ ايتۋىنشا، ەسكەرتكىش ءۇندىستاننىڭ حالىقارالىق بەدەلىن ارتتىرىپ، تۋريستەردى گۋدجارات شتاتىنا تارتادى.

نوديدىڭ ءوزى جوباعا 34 ميلليون دوللار قارجى بولگەن. قۇرىلىسقا 5700 توننا بولات پايدالانىلعان. مۇسىندە كورمەلەر زالى، مۇراجاي، 153 مەتر بيىكتىكتە تاماشالاۋ الاڭى بولادى. ءمۇسىن جاعالاۋعا 3,5 شاقىرىم قاشىقتىقتا ورنالاسقان.

Massaget.kz