كوروناۆيرۋس: كيىمدەگى ۆيرۋستى قالاي جويامىز؟

نۇر-سۇلتان. قازاقپارات - كوروناۆيرۋس ءتۇرلى زاتتاردىڭ ۇستىندە بىرنەشە كۇنگە دەيىن ساقتالادى.

سوڭعى مالىمەتتەر بويىنشا، COVID-19 ماتانىڭ ۇستىندە 2 كۇن ءومىر ءسۇرۋى مۇمكىن. كيىم ارقىلى ۇيگە جۇقپا اكەلۋ قاۋپى تومەن بولسا دا، پاندەميا كەزىندە ادامدار ءوزىن جانە وتباسىن بارىنشا قاۋىپسىزدىكتە ۇستاعىسى كەلەدى.

عالىمداردىڭ پىكىرى بويىنشا، كوروناۆيرۋس جۇمساق ءارى كەۋەكتى جازىقتىقتىڭ بەتىنە قاراعاندا تەگىس ءارى قاتتى زاتتاردىڭ ۇستىندە ۇزاق ءومىر سۇرەدى. باسقاشا ايتقاندا، ماتاعا قاراعاندا ەسىك تۇتقاسىنان ۆيرۋس جۇقتىرىپ الۋ مۇمكىندىگى جوعارى.

«ەگەر توتتانبايتىن بولاتتان جاسالعان زاتتى ۇستاساڭىز، الاقانىڭىزدا بارلىق ۆيرۋستىڭ %70 قالىپ قويادى. ال ماتا جاعدايىندا ۆيرۋستىڭ تەك %1 ىن جۇقتىرىپ الاسىز»، - دەپ حابارلادى اريزون ۋنيۆەرسيتەتىنىڭ پروفەسسورى چارلز گەربا.

ونىڭ ايتۋىنشا، ۆيرۋس كەۋەكتى جازىقتىقتىڭ ىشىندە تۇرىپ قالادى دا، ونى ول جەردەن «الۋ» مۇمكىن ەمەس. سوندىقتان ماماندار پاندەميا كەزىندە كيىمدەردى ارنايى سانيتارلىق وڭدەۋ قاجەت ەمەس دەپ سانايدى.

الايدا ەگەر اۋىرىپ قالعان ادامعا كۇتىم جاساپ جۇرگەن بولساڭىز نەمەسە ءوزىڭىز قاۋىپتى توپقا جاتساڭىز، قوسىمشا شارالار ارتىق ەتپەيدى. سىرت كيىمدى دالادان ۇيگە كىرگەن كەزدە كىرەبەرىسكە تاستاڭىز. اياق كيىمدى سابىن ەرىتىندىسىمەن نەمەسە زالالسىزداندىراتىن قۇرال قوسىلعان سۋمەن تازالاعان ءجون.

نەگىزى پاندەميا كەزىندە ۇيدەن سىرت كيىمدەردى قوياتىن بولەك ءبىر ورىن دايىنداپ قويعان دۇرىس. ال قوعامدىق ورىنداردا كيگەن كۇندەلىكتى كيىمدەرىڭىزدى (شالبار، بەلدەمشە جانە ت. ب) بىردەن كىر جۋاتىن ماشيناعا سالۋ كەرەك.

ال سۋ تەمپەراتۋراسىنا كەلگەندە عالىمداردىڭ ويى ءالى دە ءبىر جەردەن شىققان جوق: مامانداردىڭ ءبىرى كيىمدى °C 60 تەمپەراتۋرادا 1 ساعاتتان از ەمەس ۋاقىت نەمەسە °C80 تەمپەراتۋرادا جارتى ساعاتتان از ەمەس ۋاقىت جۋۋ كەرەك دەسە، باسقالارى °C 40 تەمپەراتۋرادا 1 ساعات جۋعاننىڭ ءوزى جەتكىلىكتى دەپ سانايدى.

ەگەر اۋىرىپ قالعان ادامدى كۇتىپ جۇرسەڭىز، ونىڭ ءۇي كيىمىن قۇرامىندا حلورى بار قۇرالمەن °C90 تەمپەراتۋرادا از دەگەندە 30 مينۋت جۋۋ كەرەك. سونداي-اق قوسىمشا كيىمدى ۇتىكتەۋ ۇسىنىلادى. كوپ رەتتىك ماتا ماسكالاردى °C70 تان جوعارى تەمپەراتۋرادا 5 مينۋتتان كەم ەمەس ۋاقىت جۋۋ كەرەك.

ولاردى قايتالاپ قولداناردىڭ الدىندا جاقسىلاپ كەپتىرۋ قاجەت. كىر جۋاردىڭ الدىندا قولىڭىزدى جاقسىلاپ جۋىپ، رەزەڭكە قولعاپ كيىڭىز. كىر جۋىپ بولعان سوڭ قايتادان قولىڭىزدى سابىنمەن جۋىڭىز.

Massaget.kz