مەركىدە كوروناۆيرۋس جۇقتىرعان دارىگەردىڭ شاعىمى بويىنشا تەكسەرۋ باستالدى

تاراز. قازاقپارات - جامبىل وبلىسى مەركى اۋداندىق اۋرۋحاناسى دارىگەرىنىڭ الەۋمەتتىك جەلىدەگى شاعىمى بويىنشا قىزمەتتىك تەكسەرۋ باستالدى.

بۇل تۋرالى وبلىس اكىمىنىڭ باسپا ءسوز قىزمەتى مالىمدەدى، - دەپ حابارلايدى قازاقپارات جامبىل وبلىسى اكىمدىگىنىڭ رەسمي سايتىنا سىلتەمە جاساپ.

ايتا كەتەيىك، بۇعان دەيىن كوروناۆيرۋس ينفەكتسياسىن جۇقتىرىپ العان اتالعان اۋداندىق اۋرۋحانانىڭ ينفەكتسيونيست دارىگەرى تولقىناي وردابايەۆا الەۋمەتتىك جەلىدە ءوزى قىزمەت ەتەتىن اۋرۋحاناعا قاتىستى شاعىمدارىن جەتكىزگەن بولاتىن. ول ەمدەۋ مەكەمەسىنىڭ مەديتسينا قىزمەتكەرلەرىن ماسكا تىگۋگە ماجبۇرلەگەنىن، جۇمىستا ەشقانداي ماسكا مەن قورعانىش قۇرالدارى بەرىلمەيتىنىن، بۇنىڭ بارلىعى يممۋنيتەتتىڭ السىرەۋىنە الىپ كەلگەنىن ايتىپ، نارازىلىعىن بىلدىرگەن ەدى.

ال، وبلىس اكىمى باسپا ءسوز قىزمەتىنىڭ حابارلاۋىنشا، بۇگىندە دەنساۋلىق ساقتاۋ باسقارماسى جانە تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ دەپارتامەنتىمەن بىرلەسە وتىرىپ، مەركى اۋداندىق ورتالىق اۋرۋحاناسىنىڭ دارىگەرى ت. وردابايەۆانىڭ الەۋمەتتىك جەلىلەردە جاريالانعان شاعىمى بويىنشا قىزمەتتىك تەكسەرۋ باستالعان.

«دارىگەر- ينفەكتسيونيست ت. وردابايەۆا 1,75 شتاتتىق بىرلىككە (ساعات 9 دان 18.00 گە دەيىن) سايكەس لاۋازىمدىق جالاقىمەن جۇمىس ىستەگەن. ونىڭ ىشىندە-0,25 شتاتتىق بىرلىك ونىڭ ءوز كەلىسىمى بويىنشا دەنساۋلىعىنا بايلانىستى ەڭبەككە جارامسىزدىعىنا قاتىستى ارىپتەسىنىڭ ۋاقىتشا مىندەتىن اتقارعان.

اعىمداعى جىلدىڭ 3- ساۋىرىندە ت. وردابايەۆا دەنە قىزۋىنىڭ جوعارىلاۋىنا شاعىمدانعان. ودان زەرتحانالىق تالداۋلار (پ ت ر) الىنىپ، قورىتىندىسىنا سايكەس كوروناۆيرۋستىق ينفەكتسيانى جۇقتىرعاندىعى راستالعان. ەپيدەميولوگيالىق تەكسەرۋلەر جۇرگىزىلىپ، ۆيرۋس جۇقتىرعان دارىگەرمەن جاقىن بايلانىستا بولعان 5 ادام انىقتالىپ، كارانتينگە ورنالاستىرىلدى.

ناۋقاس ينفەكتسيالىق ستاتسيوناردىڭ ەكى ورىندىق بوكسىندا وسىنداي دياگنوزى بار باسقا پاتسيەنتپەن بىرگە جاتقىزىلعان. بۇل سانيتارلىق-ەپيدەميولوگيا تالاپتارىنا قايشى كەلمەيدى. دەنساۋلىق ساقتاۋ مينيسترلىگى بەكىتكەن ەمدەۋ حاتتاماسىنا سايكەس الۋۆيا پرەپاراتىن قابىلداعان»، - دەلىنگەن ۆەدومستۆو حابارلاماسىندا.

سونداي-اق، باس مەملەكەتتىك سانيتارلىق دارىگەردىڭ قاۋلىسىنا سايكەس، زەرتحانالىق راستالعان دياگنوزى بار ەمدەلۋشىلەردە پ ت ر- نىڭ قايتالانعان تالداۋلارى تەك شىعار الدىندا عانا ەكى رەت الىناتىندىعى، ەمدەۋگە جاتقىزۋ كەزىندە قايتادان تالداۋ الۋ تالاپ ەتىلمەيتىندىگى ايتىلعان.

«بۇگىنگى كۇنى اۋداندىق اۋرۋحانانىڭ مەديتسينا قىزمەتكەرلەرى تولىق كولەمدە جەكە قورعانىس قۇرالدارىمەن قامتاماسىز ەتىلگەن. 1000 نان استام مەديتسينالىق ءبىر رەتتىك مەديتسيانالىق بەتپەردەلەر، كوپ رەت قولدانىلاتىن ماسكالار - 1600، ءبىر رەت قولدانىلاتىن كوستيۋمدەر - 1200 بىرلىك، دەزينفەكتسيالىق قۇرالدار-40 مىڭ «دياحلورا» تابلەتكاسى، 15 ليتر انتيسەپتيكتەر بار.

اعىمداعى جىلى اۋرۋحانا 3 ميلليون 468 مىڭ تەڭگەگە ج ق ق جانە دەزينفەكتسيالىق قۇرالداردى ساتىپ العان. قوسىمشا 6 ميلليون تەڭگەگە ساتىپ الۋلار جوسپارلانۋدا. اعىمداعى ايدا كوروناۆيرۋستى ينفەكتسيانىڭ تارالۋىنا جول بەرمەۋ بويىنشا ءىس-شارالارعا تارتىلعان وسى اۋداندىق اۋرۋحانانىڭ 20 مەديتسينا قىزمەتكەرى، سونىڭ ىشىندە دارىگەر ت. وردابايەۆاعا دا سىياقى تولەۋ جوسپارلانۋدا.

ول ايتقان بارلىق فاكتىلەر قىزمەتتىك تەرگەۋ بارىسىندا تەكسەرىلەتىن بولادى»، - دەلىنگەن باسپا ءسوز قىزمەتىنىڭ مالىمدەمەسىندە.

جالپى، كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى ءىس-شارالارعا وبلىسقا رەسپۋبليكالىق بيۋجەتتەن 576 ميلليون تەڭگە جانە جەرگىلىكتى بيۋجەتتەن 281 ميلليون تەڭگە بولىنگەن.

قازىرگى تاڭدا 4,1 مىڭ دانا ءبىر رەتتىك كوستيۋمدەر، 276 مىڭ دانا ءبىر رەتتىك بەتپەردەلەر، 17,8 مىڭ دانا رەسپيراتورلار، 4,8 مىڭ ليتر دەزينفەكتسيالىق قۇرالدار مەن انتيسەپتيكتەر جانە باسقا دا مەديتسينالىق بۇيىمدار مەن پرەپاراتتار قورى بار.