الماتى وبلىسىندا شەكتەۋ رەجيمىنە وزگەرىستەر ەنگىزىلدى

تالدىقورعان. قازاقپارات- الماتى وبلىسىندا شەكتەۋلى رەجيمگە وزگەرىستەر ەنگىزىلدى.

بۇل ءۇشىن ارنايى 5-قاۋلى قابىلداندى، - دەپ حابارلايدى قازاقپارات ءتىلشىسى.

قاۋلىداعى جاڭا وزگەرىسكە سايكەس، تالدىقورعانداعى تەحنيكالىق جوندەۋ ورتالىعى، قوسالقى بولشەك جانە قۇرىلىس زاتتارىن ساتۋ دۇكەندەرى بۇگىن تاڭعى ساعات 8.00 دەن باستاپ قايتا جۇمىستارىن جالعاستىردى.

مۇنداي دۇكەندەر ساۋداسىن تۇتىنۋ ءۇشىن تۇرعىندار ارنايى تاپسىرىس بەرۋ قاجەت. كەيىن قاجەتتىسىن الۋ ءۇشىن عانا ورتالىققا بارادى. تاعى جەرگىلىكتى حالىق سۇرانىسىمەن ەت پاۆيلوندارى جۇمىس ىستەيدى.

«جۇمىستار دالادا ۇيىمداستىرىلادى. سوندىقتان ءبىز رۇقسات بەرىپ وتىرمىز. كوكتەمگى ەگىس جۇمىستارىنا، دالاداعى جول جوندەۋ جۇمىستارىنا، مەملەكەتتىك نىساندارعا، قۇرىلىس نىساندارىنا رۇقسات بەرىپ وتىرمىز. ول جەرلەردە سانيتارلىق دەزينفەكتسيا رەجيمى ساقتالاتىن بولادى. ودان باسقا تاعى سۇراقتار بولدى ءدارىحانالارعا قاتىستى. ەندى ءدارىحانالارعا تاۋلىك بويى جۇمىس ىستەۋگە رۇقسات بەردىك»، - دەدى الماتى وبلىسىنىڭ باس مەملەكەتتىك سانيتارلىق دارىگەرى قايرات بايمۇحامبەتوۆ.