تەڭىز كەنىشىندە كوروناۆيرۋس جۇقتىرعان اداممەن بايلانىستا بولعاندار انىقتالدى

None
None
اتىراۋ. قازاقپارات - تەڭىز كەن ورنىنىڭ ۆاحتاشىلار تۇراتىن اۋىلىندا كوروناۆيرۋس جۇقتىرعان ايەلمەن بايلانىستى بولعاندار انىقتالدى.

ولاردىڭ جالپى سانى 10 ادام، دەپ حابارلايدى قازاقپارات.

وڭىرلىك كوممۋنيكاتسيالار قىزمەتىندە وتكەن بريفينگىدە اتىراۋ وبلىستىق دەنساۋلىق ساقتاۋ باسقارماسى باستىعىنىڭ ورىنباسارى گۇلنافيس تاڭبايەۆا ۆاتەرناس اتتى ۆاحتاشىلار اۋىلىنداعى 50 جاستاعى ايەلمەن بايلانىستا بولعان 10 ادامنىڭ بارلىعىنان اناليز الىنعانىن حابارلادى.

جۇمىسشىلاردىڭ بارلىعى وقشاۋلاندىرىلىپ، ستاتسيونارعا جاتقىزىلدى. سونىمەن قاتار ۆيرۋس جۇقتىرعان اداممەن بايلانىستا بولعاندارمەن قارىم-قاتىناس جاساعان تاعى 50 ادام وقشاۋلاندىرىلدى.

«تەڭىزشۆرويل» ج ش س قوعاممەن جانە ب ا ق- پەن بايلانىس جونىندەگى باس مەنەدجەر رزابەك ارتىعاليەۆتىڭ سوزىنشە، قازىرگى تاڭدا تەڭىز كەنىشىنەن شىعۋعا تىيىم سالىنعان.

كەنىشكە تەك ءبىرىنىشى كەزەكتە قاجەتتى تاۋارلاردى تاسىمالدايتىن كولىكتەر مەن جۇك كولىكتەرىنە عانا كىرۋگە رۇقسات ەتىلگەن. جۇرگىزۋشىلەردىڭ دەنە قىزۋى تەكسەرىلىپ جاتىر.

كەنىشكە كىرەتىن جەرلەردە 4 سانيتارلىق بەكەت ورناتىلدى. كاسىپورىننىڭ وزىندە ادامدار ارا قاشىقتىقتى ساقتاپ جۇرەدى، بارلىق ءوندىرىس نىساندارى دەزينفەكتسيالانىپ، تەرمومەتريالىق سكرينينگ جۇرگىزىلىپ جاتىر.

سوڭعى جاڭالىقتار