ەلىمىزدىڭ وڭتۇستىگىندە قار جاۋىپ، تۇرعىن ۇيلەرگە جىلۋدى قايتا قوسۋعا تۋرا كەلدى

تۇركىستان. قازاقپارات - ەلىمىزدىڭ وڭتۇستىگىندە كۇن كۇرت سۋىتىپ، قار جاۋدى.

تۇركىستان قالاسىندا اۋا رايىنىڭ سالقىنداپ كەتۋىنە بايلانىستى قايتا جىلۋدى قوسۋعا تۋرا كەلگەن، دەپ حابارلايدى قازاقپارات ءتىلشىسى.

قالا اكىمى راشيد ايۋپوۆ كۇننىڭ كۇرت سۋىتۋىنا بايلانىستى كوپقاباتتى ۇيلەردىڭ تۇرعىندارى ءۇشىن ورتالىق جىلۋ قازاندىعىن قايتا قوستىرعانىن حابارلادى.

«الدىمىزداعى بىرنەشە كۇن بويى اۋا تەمپەراتۋراسىنىڭ تومەندەۋىنە بايلانىستى جاۋاپتى ماماندارعا كوپقاباتتى ۇيلەردىڭ جىلۋىن قايتا قوسۋدى تاپسىردىم. بۇعان قوسا، الەۋمەتتىك جاعدايى تومەن وتباسىلارعا كومىر جەتكىزىلەتىن بولادى. قازىرگى ۋاقىتتا «وتىرار» ىقشاماۋدانىنا جىلۋ بەرىلسە، 1 جانە 2 مولتەكاۋداندارداعى احاۋلار رەتكە كەلتىرىلىپ، ءبىر-ەكى ساعات ىشىندە ىسكە قوسىلماق»، - دەپ جازدى قالا اكىمى ءوزىنىڭ Facebook جەلىسىندەگى پاراقشاسىنا.

وسى ۋاقىتتا كۇن شىمكەنت قالاسىندا دا سۋىق. قالادا گۇلدەپ تۇرعان جەمىس اعاشتارى مەن كوكتەمگى گۇلدەر اق ۇلپاعا وراندى.

ايتا كەتەيىك، بۇعان دەيىن «قازگيدرومەت» 8 - جانە 9 - ساۋىردە تۇركىستان وبلىسىنىڭ كەي جەرلەرى مەن شىمكەنت قالاسىندا قاتتى جاۋىن-شاشىن بولىپ، سوڭى قارعا ۇلاساتىنىن حابارلاعان ەدى.

وڭىردە 9-10 - ءساۋىر كۇندەرى اۋا تەمپەراتۋراسى تۇندە 0-2 گرادۋسقا دەيىن تومەندەۋى مۇمكىن دەلىنگەن بولاتىن.