قىتاي دارىگەرى: باستىسى - ۇرەيگە بوي الدىرماڭىز

بەيجىڭ - ۋحان. قازاقپارات - كوروناۆيرۋستان قالاي قورعانۋ كەرەك؟ ماسكانى كيىپ ءجۇرۋدىڭ پايداسى قانداي؟ قىتايدىڭ ءداستۇرلى مەديتسيناسىندا (ق د م) كوروناۆيرۋسپەن كۇرەسۋدىڭ قانداي امالدارى بار؟

«قازاقپارات» ح ا ا مەنشىكتى ءتىلشىسىنىڭ وسى جانە وزگە دە سۇراقتارىنا ۋحان قالاسىندا COVID-19 ىندەتىمەن كۇرەستە الدىڭعى شەپتە جۇرگەن ق ح ر- دىڭ ق د م- مەن ەمدەۋ جونىندەگى ۇلتتىق ساراپشىلار توبى باسشىسىنىڭ ورىنباسارى، ق د م بويىنشا بەيجىڭ اۋرۋحاناسىنىڭ باسشىسى ليۋ جينتسيۋان جاۋاپ بەردى.

- سۇحباتتى كوروناۆيرۋسپەن اۋىراتىن ناۋقاستاردى ەمدەۋدىڭ قىتايلىق تاجىريبەسى تۋرالى سۇراقتان باستاعىم كەلەدى. سىرقاتتاردى ەمدەۋدە ءداستۇرلى قىتاي مەديتسيناسىنىڭ قانداي ادىستەرىن قولداندىڭىزدار؟

- ەمدەۋ بارىسىندا مىنا جاي انىقتالدى: اۋرۋدىڭ 80 پايىزى جەڭىل جانە ورتاشا دارەجەدە، ولاردىڭ كەيبىرى ءتىپتى بەلگى بەرمەي ءوتىپ كەتەدى ەكەن. قازىرگى ۋاقىتتا بەلگى بەرمەيتىن، ياعني سيمپتومسىز تاسىمالداۋشىلار باقىلاۋعا الىندى. اۋىر تۇرىندە اۋرۋ پاتسيەنتتەردىڭ 20 پايىزىندا كەزدەسەدى. اۋرۋ بەلگىسى بىلىنبەيتىن تاسىمالداۋشىلار مەن جەڭىل تۇردە كوتەرەتىن ناۋقاستاردى ەمدەۋ ءۇشىن الدىمەن، ولاردى وقشاۋلاۋ قاجەت. سىرقات اۋىر فورماعا ءوتىپ كەتپەۋى ءتيىس. بۇل، رەسۋرستاردى، ەڭ الدىمەن، قيىن جاعدايلارعا باعىتتاۋعا مۇمكىندىك بەرەدى.

قىتايدىڭ ءداستۇرلى مەديتسيناسىنىڭ ادىستەرى اۋرۋدىڭ جەڭىل ءتۇرى جانە بەلگى بەرمەيتىن تاسىمالداۋشىلارمەن اۋىراتىن ناۋقاستاردى ەمدەۋدە ءتيىمدى ەكەندىگىن كورسەتتى. ق د م دياگنوستيكاسىنىڭ كومەگىمەن كوروناۆيرۋس اۋرۋلار ءتۇرىنىڭ «ىلعالدىلىق سيندرومىنا» جاتاتىنىن انىقتادىق. اۋرۋدى جەڭىل كوتەرەتىن ادامدارعا ءۇش ءادىستى پايدالانامىز: ءبىرى - «پاتوگەندى ىلعالدىلىقتى سىرتقا شىعارۋ»، ەكىنشىسى - «دەتوكسيكاتسيا»، ءۇشىنشىسى - «ىستىقتى قايتارىپ، قان اينالىمىن جاقسارتۋ». بۇل اۋرۋ وكپەگە، كوكباۋىر مەن اسقازانعا اۋىر تيەدى. سوندىقتان ءبىز وكپەنىڭ شاشىراتۋ فۋنكتسياسىن جوعارىلاتۋ، كوكباۋىر مەن اسقازاندى نىعايتۋ ءۇشىن ءدارى- دارمەكتى قولدانامىز.

ءبىزدىڭ «جيانسيا» ەمحاناسىندا (حۋبەي پروۆينتسياسىنىڭ ۋحان قالاسىندا ورنالاسقان) بۇل ەمدەۋ ءادىسى 500 دەن استام پاتسيەنتكە قولدانىلدى. سونىمەن قاتار ءبىز پاتسيەنتتەردى ساۋىقتىرۋعا ىقپال ەتەتىن گۋاش ءادىسىن، كۇيدىرىپ ەمدەۋ، مەريدياندار بويىن توقىلداتۋ، سيگۋن جانە تايتسزيتسيۋان تاسىلدەرىن پايدالانامىز. بۇگىنگى كۇنى ءبىزدىڭ ەمحانادان شىعىپ كەتكەن پاتسيەنتتەردى قايتا تەكسەرگەن كەزدە كوروناۆيرۋس تەرىس ناتيجە كورسەتىپ وتىر. ەكىنشىدەن، وسى ادىستەر ارقىلى ەمدەگەندە جاعدايى ناشارلاپ كەتكەندەر بولمادى. ۇشىنشىدەن، ءبىزدىڭ ەمحانادا جۇمىس ىستەگەن دارىگەرلەر مەن مەدبيكەلەردەن، ۋاقىتشا مودۋلدى ەمحاناداعى وزگە دە قىزمەتكەرلەردىڭ ىشىنەن كوروناۆيرۋستى جۇقتىرعان بىردە- ءبىر ادام انىقتالعان جوق.

- كوروناۆيرۋستان قالاي قورعانۋعا بولادى؟

- بىرىنشىدەن، تۇراقتى ءارى دۇرىس تاماقتانۋ كەرەك. مايلى جانە ءتاتتى، شيكى جانە سالقىن تاعامداردان باس تارتۋعا تۋرا كەلەدى. جەڭىل سىڭەتىن، جوعارى كالوريالى تاعامداردى تۇتىنۋعا تىرىسىڭىز. ەكىنشىدەن، قالىپتى تۇردە دەمالعان ابزال. ۇشىنشىدەن، ساۋىقتىرۋ گيمناستيكاسىن جاساپ تۇرعان ءجون. سونىمەن قاتار وقشاۋلانۋدىڭ، بۇقارالىق شارالارعا قاتىسۋدان باس تارتۋدىڭ، قولدى جۋىپ، ماسكا كيۋدىڭ ماڭىزدىلىعىن تاعى ءبىر ەسكە سالعىم كەلەدى. بۇگىنگى تاڭدا قىتايدا ۇستاناتىن ەڭ جاقسى ءادىسىمىز - ۇيدە وقشاۋلانۋ.

- ماسكانى تاعىپ ءجۇرۋدىڭ قانشالىقتى پايداسى بار ؟

- قىتايدا ماسكانى مىندەتتى تۇردە كيىپ ءجۇرۋ كەرەكتىگىن ايتامىز. ەپيدەميا كەزىندە ناۋقاستار ىندەتتى باسقالارعا جۇقتىرماۋ ءۇشىن ماسكا قاجەت. ال ساۋ ادامدى ماسكا اۋرۋ جۇقتىرۋدان قورعايدى. كوروناۆيرۋستىڭ جاڭا تۇرىنەن تۋىنداعان پنيەۆمونيا - بۇگىنگى كۇنى ءالى تولىق زەرتتەلمەگەن اۋرۋ. ۆيرۋس تىم اككى. ءبىز ول تۋرالى ءالى كوپ بىلمەيمىز. سوندىقتان الدىن الۋ ءۇشىن ماسكا كيۋ كەرەك.

- ەۋروپا ەلدەرىنىڭ ءبىرقاتارىندا كوروناۆيرۋس ينفەكسياسىن جۇقتىرۋىنىڭ كوپ بولۋىنىڭ سەبەبى نەدە؟

- مۇنىڭ ءبارى مادەني ايىرماشىلىققا بايلانىستى. ەۋروپادا تەك اۋرۋ ادام ماسكا كيۋى كەرەك، ال ساۋ ادامعا ونىڭ كەرەگى جوق دەگەن پىكىر بار. تاعى ءبىر سەبەپ - وقشاۋلانۋدىڭ ءىشىنارا عانا ورىندالۋى.

- تاعى قانداي كەڭەس بەرە الار ەدىڭىز؟

- سابىر ساقتاڭىز. ەپيدەميا كەزىندە قوعامدا دۇربەلەڭنىڭ پايدا بولاتىنى زاڭدى. الايدا، دۇرلىگۋدىڭ قاجەتى جوق. ناۋقاستاردىڭ كوپشىلىگى اۋرۋدى جەڭىل نەمەسە ورتاشا دارەجەدە وتكىزەتىنىن، اۋىر سىرقاتى بار پاتسيەنتتەردىڭ ۇلەسى 20 پايىزدان اسپايتىنىن ەسكەرۋ كەرەك. ەڭ باستىسى - ۇرەيگە بەرىلمەۋ. ىندەت ءسوزسىز اياقتالادى. شامادان تىس پسيحولوگيالىق قىسىم دەنساۋلىققا زيان تيگىزۋى مۇمكىن.

ەسكە سالايىق 2020 -جىلدىڭ 8 -ساۋىرىندە، ياعني سارسەنبىدە قىتايداعى COVID-19 ەپيدەمياسىنىڭ وشاعى - 11 ميلليوننان استام حالقى بار ۋحاننىڭ 76 كۇندىك بلوكاداسى اياقتالعان بولاتىن. سوڭعى رەسمي مالىمەتتەرگە سايكەس، ۋحاندا كوروناۆيرۋس جۇقتىرعان ادامداردىڭ شامامەن 94 پايىزى ساۋىعىپ كەتكەن. جالپى ىندەتتى جۇقتىرعانداردىڭ سانى 50 مىڭنان اسسا، اۋرۋدان رەسمي ءولىم-ءجىتىم دەڭگەيى 5 پايىزدان استى (2572 ادام قايتىس بولدى). قازىرگى ۋاقىتتا قالالىق اۋرۋحانالاردا 445 ناۋقاس ەمدەلۋدە. سۇحباتتى ۇيىمداستىرۋعا كومەكتەسكەن «جەنمينۆان» اقپاراتتىق سايتىنا العىس بىلدىرەمىز.