قىتايدان كەلگەن مەديتسينالىق كومەك قورابىنا اباي ولەڭى جازىلدى
ونىڭ ايتۋىنشا، اباي شىعارمالارى ⅩⅩ عاسىردىڭ 50 -جىلدارىنان باستاپ، قىتاي تىلىنە اۋدارىلا باستاعان. «اباي ولەڭدەرىن قىتاي تىلىنە ەڭ العاش اۋدارعان ادام - سىبە ۇلتىنان شىققان حاحۋان جاڭ ەدى. بۇگىندە ونىڭ جاسى 90نان استى. اباي شىعارماسىن اۋدارعاندىقتان، لاقاپ اتىن قاباي دەپ قويعان. بۇل كىسىنى سىيلايمىز، قۇرمەتتەيمىز. 1950 -جىلداردان باستاپ، اباي ولەڭىنىڭ ۇزىندىلەرى گازەت- جۋرنالدارعا ەمىس- ەمىس شىعىپ وتىرعان. 1982 -جىلى قىتاي مەملەكەتتىك ۇلتتار باسپاسىنان قىتاي تىلىندە «اباي عاقلياسى» شىعارىلدى. بۇل - قابايدىڭ ەڭبەگى. ءبىراق، بۇل جىلدارى شىعارمالار كەڭ تارالعان جوق، تەك ارحيۆ رەتىندە قالدى»،- دەدى سپيكەر ق ر ۇلتتىق اكادەميالىق كىتاپحاناسى ۇيىمداستىرعان «اباي جانە رۋحاني مۇرا» ونلاين كونفەرەنتسياسىندا.
ال 1995 -جىلى ابايدىڭ 150 جىلدىعى قارساڭىندا، قىتايداعى ۇلتتار باسپاسى ابايدىڭ قارا سوزدەرىن ورىس تىلىنەن اۋدارۋعا تىرىسقان. «1994 -جىلى قىتايداعى ۇلتتار باسپاسى اباي شىعارماسىن قىتاي تىلىنە قايتادان اۋدارۋعا بەل بايلادى. وسى كەزدە سۋ جۋن چۋن مىرزا ابايدىڭ قارا سوزدەرىن ورىس تىلىنەن اۋداردى. ءبىراق، باسپاداعى قازاق ءبولىمىنىڭ باسشىسى بولعان قاليبەك مىرزا مەنى شاقىرىپ، قارا سوزدەردىڭ ورىسشادان ءساتسىز اۋدارىلعانىن ايتىپ، رەداكسيالاپ بەرۋىمدى سۇرادى. ءبىراق، بۇل اۋدارما تۇزەتۋگە كەلمەدى. 1994 -جىلدىڭ قازان ايىنان 1995 -جىلدىڭ ماۋسىمىنا دەيىن قارا سوزدەردى ءتول تىلدەن اۋدارىپ شىقتىم»، - دەدى ا. ءماجيت. ۇلى اقىننىڭ 150 جىلدىعىنا ازىرلەنگەن بۇل اۋدارما كەيىن دە بىرنەشە رەت جارىق كوردى جانە قىتايعا كەڭ تارالاتىن «وقىرماندار» جۋرنالىندا جاريالانعان.
«سىزدەرگە ايگىلى، 2013 -جىلى قىركۇيەك ايىندا ق ح ر ءتوراعاسى شي جينپين قازاقستاندا نازاربايەۆ ۋنيۆەرسيتەتىندە ءسوز سويلەگەندە ابايدىڭ 37- قارا سوزىنەن ءۇزىندى سويلەدى. ول مەنىڭ اۋدارمام ەدى. جىل سايىن قىتايدا وتەتىن «كوكتەم مەرەكەسىنىڭ» ساۋىق كەشىن بارلىق تۇرعىن تاماشالايدى. 2018 -جىلعى ساۋىق كەشتە تانىمال قىتايلىق ءارتىس ابايدىڭ وسى ءۇزىندىسىن قايتالادى. وسىلايشا، ءبىر كەشتە ابايمەن 1 ميللياردتان استام قىتاي حالقى تانىس بولدى»،- دەدى جازۋشى.
سونىمەن بىرگە، 2019 -جىلى اباي شىعارمالارىنان ءۇزىندى وقۋ ەستافەتاسى بولدى. بۇل شاراعا قىتايداعى قازاقستان ەلشىلىگىنەن باستاپ، جەكي چان، جەك ما سىندى تانىمال تۇلعالار قاتىستى. ودان بولەك، كوروناۆيرۋس ىندەتى تارالعاندا، قىتايدان قازاقستانعا جەتكىزىلگەن مەديتسينالىق كومەكتىڭ سىرتىنا دا ابايدىڭ ولەڭى جازىلعان.
«ءاربىر قوراپتىڭ سىرتىنا ابايدىڭ «ءبىر ءتاۋىر دوس تىم- اق كەرەك، ويى مەن ءتىلى بولىنبەس» دەگەن ولەڭ جولدارى قازاق جانە قىتاي تىلدەرىندە باسىلدى. ادامزاتقا ورتاق بولعان وسىنداي اۋىر جاعدايدا دا اباي ويى قوس مەملەكەتتىڭ دوستىعىن نىعايتۋعا، مەيىرىمدى ارتتىرۋعا ىقپال ەتىپ وتىر»، - دەدى جازۋشى اقبار ءماجيت.
اۆتور: ايجان سەرىكجان قىزى