كارانتين: جەزقازعاندىق وقۋشى ءوزى ويلاپ تاپقان روبوقولمەن دۇكەنگە بارادى
بالالار مەن جاسوسپىرىمدەر سارايىنىڭ شىعارماشىلىق دامۋ ورتالىعى قاشىقتان جۇمىسىن جالعاستىرۋدا. ECOplus ۇيىرمەسىنىڭ جەتەكشىسى اندرەي ماتۆەيەۆ ءوز تاربيەلەنۋشىلەرىنىڭ جەتىستىكتەرى تۋرالى ايتىپ بەردى.
«ءبىلىم بەرۋ روبوت تەحنيكاسى بۇگىندە بەلسەندى دامىپ كەلەدى. قاشىقتان وقىتۋ ساباقتارىندا كونسترۋكتورلىق يدەيالار مەن جوبالاردى ازىرلەيمىز. ماسەلەلەردى زەرتتەيمىز جانە مي شابۋىلىنىڭ كومەگىمەن شەشۋ جولدارىن ۇسىنامىز. الدىمەن، ZOOM- كونفەرەنسياسى رەجيمىندەگى ساباق بارىسىندا 3D ۇلگىسىن جاسايمىز. سوڭعى ديزاين اياقتالعاننان كەيىن STL فورماتتاعى فايلدى جاسايمىز. ونى سلايسەردە وڭدەيمىز جانە جەتىلدىرەمىز، فايلدى G- كودقا اۋدارامىز جانە 3D- پرينتەردە باسىپ شىعارۋعا جىبەرەمىز» ، - دەپ ءبولىستى وقىتۋشى.
وقۋشىلار روبوتوتەحنيكا الەمىندەگى جاڭالىقتاردى زەرتتەي وتىرىپ، ينتەرنەتتەن دە ءبىلىم الادى. سودان كەيىن ءوز بالامالارىن جاسايدى. ارىستان سەمبايەۆ قاشىقتان ءبىلىمىن جالعاستىرۋ بارىسىندا ءوزىنىڭ «روبوقول» مانيپۋلياتورىن جەتىلدىرگەن ەكەن. سونداي- اق، وقۋشى ارنايى قالقانى بار قورعانىش ماسكا- رەسپيراتور ۇلگىسىن ازىرلەدى.
«ارىستان ءوز مودەلدەرىن جەرگىلىكتى سۋپەرماركەتتە سىناپ كوردى. ارينە، ول قۇرىلعىسىمەن اينالاسىنداعىلاردى تاڭعالدىردى. روبوقولدىڭ كومەگىمەن ول العان تاۋارلارىن سەبەتكە سالعان. ساتۋشىلار بۇل پروتسەستى باقىلاپ، ەرەكشە ساتىپ الۋشىنىڭ جەتىستىگىنە قۋانىشتارىن بىلدىرگەن. بولاشاقتا ارىستان دۇكەنگە بارىپ، قاجەتتىنى ساتىپ الاتىن ءوز روبوتىن قۇراستىرعىسى كەلەدى»، - دەپ حابارلادى اندرەي ماتۆەيەۆ.
جاس تەحنيكتەر كارانتين كەزىندە باسقا دا پايدالى نارسەلەرمەن اينالىسۋدا. ولاردىڭ ىشىندە: گيگيەنالىق جانە ءپورتاتيۆتى ۇستاعىشتار، روبوت- دەزينفەكتور ءپروتوتيپى بار. ميلەنا چەنزە ۇيدە سمارتفون نەمەسە پلانشەت ارقىلى باسقارىلاتىن ەلەكتر قۇرالدارى مەن قۇرىلعىلاردى قاشىقتان قوسۋ جانە اجىراتۋ ءۇشىن اقىلدى روزەتكا قۇراستىرعان. ۇيىرمە جەتەكشىسىنىڭ ايتۋىنشا، ءۇش 3D- پرينتەردە كۇنىنە: ەسىك تۇتقاسىنا ارنالعان 30 گيگيەنالىق ۇستاعىشتار؛ 60 جەكە ءپورتاتيۆتى ۇستاعىشتار؛ ماسكا- رەسپيراتوردان جانە قورعانىس قالقاندارىنان قۇرالعان 30 جيىنتىق باسىپ شىعارۋعا بولادى. ءۇش «روبوقول» مانيپۋلياتورىن باسىپ شىعارۋعا ءبىر اپتا ۋاقىت قاجەت.
