كوروناۆيرۋسپەن كۇرەس كەزىندە الاياقتار الەۋمەتتىك جەلىلەردە بەلسەندى

نۇر- سۇلتان. قازاقپارات - كوروناۆيرۋس ىندەتىنىڭ تارالۋى كەزىندە كيبەرقىلمىسكەرلەر جەلى پايدالانۋشىلارىنا ينفەكسيامەن كۇرەسۋگە قايىرىمدىلىق جاساۋدى ۇسىنۋدا.

بۇل تۋرالى قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى ءمالىم ەتتى، دەپ حابارلايدى قازاقپارات.

«كيبەرقىلمىسكەرلەر دە جەلى پايدالانۋشىلارىنا ينفەكسيامەن كۇرەسۋگە قايىرىمدىلىق جاساۋدى ۇسىنادى جانە دۇنيەجۇزىلىك دەنساۋلىق ساقتاۋ ۇيىمنىڭ حاتتارىن جىبەرەدى، سونىمەن قاتار تولەم كارتالارىنىڭ دەرەكتەرىن الادى. الاياقتار Facebook, Instagram جانە Telegram سياقتى الەۋمەتتىك جەلىلەردە الاياقتىق بوتتاردى قۇرىپ، جەلى پايدالانۋشىلارىمەن حات الماسۋعا كىرىسىپ، ولاردىڭ سەنىمىنە يە بولا وتىرىپ، بەلسەندىلىك تانىتادى»،- دەلىنگەن حابارلامادى.

بۇل تۇرعىدا الاياقتار پايدالانۋشىنىڭ دەربەس دەرەكتەرىن ءبىلىپ الۋ ماقساتىندا ءارتۇرلى قۋلىققا بارادى. بۇل دەگەنىمىز، جسن، تولەم كارتاسىنىڭ نەمەسە شوتتىڭ دەرەكتەرى، SMS- حابارلامانىڭ كودى جانە ءتىپتى ەلەكتروندىق سيفرلىق قولتاڭبانى (ە س ق) قامتۋعا تىرىسادى.

«وزدەرىنىڭ دەربەس دەرەكتەرىن، ونىڭ ىشىندە ە س ق- نى ۇسىنا وتىرىپ، كارتاداعى نەمەسە شوتتاعى بارلىق قاراجاتتىڭ قولما- قول اقشاعا اينالۋى، ءسىزدىڭ اتىڭىزعا كۇماندى شارتتار رەسىمدەلۋى، ياعني مۇلىكتىڭ قايتا رەسىمدەلۋى نەمەسە بوگدە ادامداردىڭ ءسىزدىڭ پاتەردە تىركەلۋى قاۋپى بار»،- دەپ اتاپ وتىلگەن اگەنتتىك مالىمەتىندە.

وسى ورايدا ماماندار كۇدىكتى ينتەرنەت- رەسۋرستاردا تىركەۋدەن ءوتۋدىڭ جانە بەلگىسىز ادامدارعا ءوزىنىڭ جەكە دەرەكتەردى بەرۋدىڭ قاجەتى جوق ەكەنىن اتاپ وتۋدە.

«بۇكىل الەمدە بەلەڭ الىپ جاتقان قارجىلىق الاياقتىقتىڭ كەزەكتى ءتۇرى - بۇل جالعان ساۋالنامالار جانە باسقا دا اقىلى تاپسىرمالارى بار الاياقتىق سايتتار. حالىق اراسىندا اقى تولەنەتىن ساۋالنامالار جۇرگىزەتىن بۇل سايتتار، شىن مانىندە، الەۋمەتتىك جوبالار قاتىسۋشىلارىنا اقشا تولەمەيدى. مۇنداي سايتتاردىڭ سحەمالارى شامامەن بىردەي. ازاماتتارعا سايتتا تىركەۋدەن ءوتىپ، بىرنەشە اقىلى ساۋالناماعا جاۋاپ بەرۋ ۇسىنىلادى» ، - دەيدى ماماندار.