كارانتينگە قاراماستان اقتوبەدەگى قوعامدىق كولىك ءىشى لىق تولى

اقتوبە. قازاقپارات - اقتوبەدە كارانتين تالابىنا قاراماستان، قوعامدىق كولىكتەر جولاۋشىلاردى لىق تولتىرىپ مىنگىزىپ الۋدا. وسىعان وراي، اۆتوبۋستاردى تەكسەرۋ باستالدى، دەپ حابارلايدى قازاقپارات ءتىلشىسى.

اقتوبە قالاسىندا كارانتين رەجيمى 6 - ءساۋىر كۇنى ەنگىزىلگەن بولاتىن. وبلىستىق تاۋالار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى نۇرسۇلۋ بەركىمبايەۆانىڭ قاۋلىسىنا ساي قوعامدىق كولىكتەر تاڭەرتەڭ، تۇستە جانە كەشكە 2-3 ساعاتتان جۇرەتىن بولىپ بەكىتىلدى. سونىمەن قاتار جولاۋشىلار سالون ىشىندە وتىرۋى ءتيىس. ال ارتىق ادام بولسا، كارانتين رەجيمىن بۇزعان بولىپ ەسەپتەلەدى.

«كارانتين جاريالانىپ، قوعامدىق كولىك تەك ارنايى بەلگىلەنگەن ۋاقىتپەن جۇرەدى. سالونعا ادامدى كوپ مىنگىزۋ بويىنشا قازىر تۇرعىندار تاراپىنان شاعىم بار. تەكسەرۋ جۇمىستارى باستالدى. قالاداعى ەكى تاسىمالداۋ كومپانياسىنا ەسكەرتۋ بەرىلدى. ەگەر كارانتين رەجيمىن بۇزۋ قايتالانسا، جۇرگىزۋشى مەن كوندۋكتوردى جۇمىستان شىعارۋ ماسەلەسى قارالادى»، - دەدى اقتوبە قالالىق تۇرعىن ءۇي- كوممۋنالدىق شارۋاشىلىق ءبولىمىنىڭ باسشىسى بەكبولات نۇراشيەۆ.

قازىرگى كەزدە قوعامدىق كولىك سانى ءۇش ەسەگە قىسقارىپ، بارلىعى 60 اۆتوبۋس 52 باعىت بويىنشا كۇندەلىكتى قىزمەت كورسەتىپ ءجۇر. ايتا كەتەيىك، اۆتوبۋسپەن قاتىنايتىن اقتوبەلىكتەر كارانتين رەجيمىن ساقتاۋ مۇمكىن ەمەس ەكەنىن ايتىپ، الەۋمەتتىك جەلىلەرگە فوتو، ۆيدەو جۇكتەۋدە. «ءبىز نۇر- اقتوبە ىقشاماۋدانىندا تۇرامىز. تاڭەرتەڭ ءبىر اۆتوبۋسقا سىيماي، ەكىنشىسىنە مىنۋگە تۋرا كەلدى. ءسويتىپ جولداسىم جۇمىسقا كەشىگىپ باردى»، - دەيدى قالا تۇرعىندارىنىڭ ءبىرى.

اۆتور: التىناي ساعىندىقوۆا