نۇر- سۇلتاندا ازىق- تۇلىك قورى جەتكىلىكتى – اكىمدىك
بۇل تۋرالى ورتالىق كوممۋنيكاتسيالار قىزمەتىندەگى بريفينگتە نۇر- سۇلتان قالاسى ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمىرزايەۆ ايتتى، دەپ حابارلايدى قازاقپارات ءتىلشىسى.
«كارانتين رەجيمى ەنگىزىلگەلى جارتى ايداي ۋاقىت ءوتتى. قالاعا ازىق- تۇلىك تاۋارلارى ۇزدىكسىز جەتكىزىلۋدە. جۇك تاسىمالى ءۇشىن كىرەبەرىستەردە «جاسىل ءدالىز «جاساقتالعان. كارانتين ەنگىزىلگەن ساتتەن باستاپ قالاعا جالپى كولەمى 40 مىڭ تونناعا جۋىقتى قۇرايتىن 3800 جۇك كولىگى كىردى. ونىڭ ىشىندە ازىق- تۇلىك كولەمى 14315 توننانى قۇرايدى. بۇل ساۋدا جەلىلەرى مەن بازارلاردىڭ قازىرگى كولەمىنە سايكەس كەلەدى. بۇگىندە قالادا ازىق- تۇلىك قورى جەتكىلىكتى. قالادا «ا» ساناتتى 5 ءىرى قويما جانە 7 كوكونىس قويماسى بار. ولاردىڭ بارلىعىندا ازىق- تۇلىك قورى جەتكىلىكتى. كەشە مەملەكەت باسشىسىمەن سول قويمالاردىڭ بىرىندە بولدىق. تاۋار تاپشىلىعى بايقالمايدى»، - دەدى ول.
ەرلان بەكمىرزايەۆتىڭ اتاپ وتۋىنشە، 19 پوزيتسياداعى الەۋمەتتىك ماڭىزى بار ازىق- تۇلىك 30 مىڭ توننا كولەمىندە بار. ونىڭ 25 مىڭ تونناسى قويمالار مەن كوكونىس قويمالارىندا ساقتالعان، قالعان 5 مىڭ تونناسى قالانىڭ تۇراقتاندىرۋ قورىنا تۇسكەن. «قالا اكىمدىگى رەزەرۆتەردى تولتىرۋ بويىنشا ءبىرقاتار شارالار قابىلدانۋدا. بىرىنشىدەن، ءبىز وڭىرلەرمەن جەمىس- كوكونىس توبىنا، ەت جانە ازىق- تۇلىك ونىمدەرىنە بەلگىلەنگەن باعامەن «فورۆاردتىق كەلىسىمشارت» جاساۋدى پىسىقتاۋدامىز. ول: تۇركىستان، جامبىل، اقمولا جانە پاۆلودار وبلىستارى. ەكىنشىدەن، «اينالىم تىزبەسى» بويىنشا كۇرىش، قاراقۇمىق جانە كوكونىس توبىنا بەلگىلەنگەن باعامەن ساتىلاتىن شارتىمەن ءىرى بولشەك ساۋدا جەلىلەرىمەن جەڭىلدەتىلگەن نەسيە تۋرالى كەلىسىمدەرگە قول قويىلدى. قوسىمشا جەرگىلىكتى بيۋدجەتتەن 1,5 ميلليارد تەڭگەدەي اقشا ءبولىندى. سونىمەن قاتار الەۋمەتتىك ماڭىزى بار ازىق- تۇلىك باعاسىن بەكىتۋ ءۇشىن جەڭىلدەتىلگەن نەسيە باعىتتالعان»، - دەدى باسقارما باسشىسى.
اۆتور: مارلان جيەمباي