باس ءمۇفتي بارشا مۇسىلمان قاۋىمىن ادامزاتتىڭ اماندىعى ءۇشىن ءبىر مەزەتتە دۇعا جاساۋعا ۇندەدى
«اسا قامقور، ەرەكشە مەيىرىمدى اللانىڭ اتىمەن باستايمىن! اۋەلى بارلىق ماداق الەمدەردىڭ راببىسى اللاعا ءتان. ادامزاتتىڭ اسىلى مۇحاممەد پايعامبارعا ونىڭ وتباسى مەن بارشا ساحابالارىنا سالاۋات پەن سالەم بولعاي! اسسالامۋ الايكۋم ۋا راحماتۋللاھي ءۋا باراكاتۋھۋ! قۇرمەتتى ءدىن باسشىلارى، مۇسىلمان باۋىرلار! بۇگىندە COVID-19 كوروناۆيرۋس جۇقپالى دەرتى جەر بەتىندەگى الەم جۇرتشىلىعىن الاڭداتىپ وتىرعانى بارشاڭىزعا ءمالىم. وكىنىشكە قاراي، بۇل ىندەتتەن الەمدە مىڭداعان ادام كوز جۇمدى. الەمدە وسى دەرتتەن قازا تاۋىپ، قارا جامىلعان وتباسىلاردىڭ قايعىلارىنا ورتاقتاسىپ، كوڭىل ايتامىن. اللا الدىنان جارىلقاسىن! ءومىردى سىناق مەكەنى دەپ بىلگەن مۇسىلمان بالاسى باسىنا قيىندىق تۇسسە، توزىمدىلىك تانىتادى، نىعمەتكە بولەنسە، شۇكىر ەتەدى. قيىندىقتى سابىرعا جەڭدىرگەن پەندە اللانىڭ مەيىرىمىنە بولەنەدى. اللا تاعالا: «ءسوزسىز ءبىز سەندەردى قورقىنىشپەن، اشتىقپەن جانە دۇنيە- مۇلىكتەرىڭدى، جاندارىڭدى، سونداي- اق جەمىستەرىڭدى الۋ ارقىلى سىنايمىز. سابىر ەتۋشىلەردى سۇيىنشىلە!» («باقارا» سۇرەسى، 155-ايات) دەگەن. اللا تاعالا سىناققا سابىر ەتىپ، ساۋاپقا كەنەلگەن پەندەلەرىنەن ەتكەي!»، - دەدى باس ءمۇفتي قازاقستان مۇسىلماندارى ءدىني باسقارماسىنىڭ رەسمي سايتىندا جاريالانعان ۇندەۋىندە. قازاقستان مۇسىلماندارى ءدىني باسقارماسىنىڭ ءتوراعاسى قازىرگى تاڭداعى بۇل اۋىر ىندەت كۇللى ادامزات بالاسىنا قاتەر ءتوندىرىپ تۇرعانىن باسا ايتادى.
«الەمدە ەتەك العان ىندەتتىڭ الدىن الۋدا ادامزات ۇلى جاراتۋشىنىڭ مەيىرىمىنە مۇقتاج ەكەندىگىن ايقىن سەزىنۋدە. سول ءۇشىن ءاربىر ۇلت وكىلى، بارشا ادام بالاسى جۇدىرىقتاي جۇمىلىپ، شىن جۇرەكتەن جاراتقانعا جالبارىنىپ، ادامزاتتىڭ اماندىعىن سۇرايتىن سىندارلى ساتتە تۇرمىز. اللانىڭ ارداقتى ەلشىسى (وعان اللانىڭ سالاۋاتى مەن سالەمى بولسىن): «دۇعا - مۇسىلماننىڭ قورعانى»، - دەگەنى بارشاڭىزعا ءمالىم.
وسى رەتتە قازاقستان مۇسىلماندارى ءدىني باسقارماسى يسلام الەمىنىڭ عۇلامالارىن، كۇللى ءدىن قايراتكەرلەرىن، ءدىن سالاسىنىڭ وقىتۋشى- ۇستازدارى مەن قۇران قاريلارىن جانە بارشا مۇسىلمان قاۋىمىن 10 - ءساۋىر، جۇما كۇنى ناماز ۋاقىتىندا «ءبىز - بىرگەمىز، تىلەگىمىز - ورتاق» دەگەن يگى باستاما اياسىندا كۇللى ادامزاتتىڭ اماندىعى ءۇشىن ءبىر مەزەتتە الاقان جايىپ، دۇعا جاساۋعا ۇندەيدى. اسا مەيىرىمدى اللا تاعالا كۇللى ادامزات بالاسىنا اماندىق- ساۋلىق بەرىپ، اۋرۋ- سىرقاۋدان ايىعىپ، قۋانىشتى كۇندەرگە تەزىرەك جەتۋىن ءناسىپ ەتكەي»، - دەپ اتاپ وتكەن ناۋرىزباي قاجى تاعان ۇلى.
اۆتور: مارلان جيەمباي