رەپورتاج: نۇر- سۇلتاندا كوروناۆيرۋس ناۋقاستارىن ەمدەيتىن اۋرۋحانا سالىنىپ جاتىر
توتەنشە جاعداي كەزىندە ناۋقاستاردى قابىلدايتىن 200 ورىندىق گوسپيتال قالالىق تۋبەركۋلەزگە قارسى ديسپانسەر ماڭىندا تۇرعىزىلادى. «BI Group» قۇرىلىس كومپانياسى بۇل نىساندى 10-12 كۇندە اياقتاۋدى جوسپارلاپ وتىر. ول ءۇشىن 500 گە جۋىق قۇرىلىسشى 3 اۋىسىممەن تاۋلىك بويى جۇمىس ىستەۋدە.
«قازىرگى ۋاقىتتا نۇر- سۇلتان، الماتى جانە شىمكەنت قالالارىندا ءۇش جوبانى قولعا الدىق. نۇر- سۇلتان مەن شىمكەنتتەگى جوبا 200 ورىنان قاراستىرىلعان جانە ءارقايسىسىندا 20 ورىن ينتەنسيۆتى تەراپياعا ارنالماق. الماتىدا 280 ورىن بولسا، ونىڭ 28- ءى ينتەنسيۆتى تەراپياعا بەرىلەدى. نۇر- سۇلتانداعى گوسپيتال Modex زاۋىتى جاسايتىن مودۋلدەردەن قۇرىلادى (...) مۇنداي مونوليتتىك قۇرىلىستاردى 50-70 جىل بويى پايدالانۋعا بولادى»، - دەدى جوبا ديرەكتورى ارمان لەسبەكوۆ تىلشىلەرگە بەرگەن سۇحباتىندا.
ونىڭ ايتۋىنشا، ينتەنسيۆتى تەراپيا پالاتالارىن جابدىقتاۋدا دۇنيەجۇزىلىك دەنساۋلىق ساقتاۋ ۇيىمىنىڭ بارلىق تالابى ەسكەرىلگەن. سونىمەن بىرگە، ارمان لەسبەكوۆ الماتى مەن شىمكەنتتەگى اۋرۋحانالاردىڭ ايىرماشىلىعى تۋرالى ايتىپ بەردى.
«الماتىداعى گوسپيتال ۆاحتالىق قالاشىق تيپىندە جاسالادى. ۋاقىت پەن بيۋدجەتتىڭ تىعىز بولۋىنان باتىستا مۇناي جۇمىستارى ءۇشىن قولدانىلاتىن قالاشىق ۇلگىسىن الدىق. بارلىق ءۇش كەشەندە دە تازا مەكەمەلەر كەشەنى مەن مەديتسينالىق گازدار قاراستىرىلعان». - دەدى ول.
شىمكەنتتەگى اۋرۋحانانى سالۋدا كونتەينەرلىك تيپتەن تەمىربەتونعا دەيىنگى بارلىق نۇسقالار قاراستىرىلعان. «قازىر دە شىمكەنتتە اۋرۋحانا فورماتى تالقىلانىپ جاتىر. سوندىقتان، تالقىلاۋ اياقتالعان سوڭ، قارقىندى جۇمىس ىستەپ، قالعان ۋاقىتتى قۋىپ جەتەمىز دەگەن ويدامىن. بارلىق اۋرۋحانادا دارىگەرلەرگە ارنالعان ورديناتورلىق بولمەلەر، كابينەتتەر بولادى. ءمايىت ساقتايتىن ورىندار دا قاراستىرىلعان»، - دەدى ا. لەسبەكوۆ.
ەسكە سالا كەتسەك، 3 - ساۋىردە ت ج رەجيمىن قامتاماسىز ەتۋ جونىندەگى مەملەكەتتىك كوميسسيا قازاقستاننىڭ ءۇش ءىرى قالاسىندا جۇقپالى اۋرۋلار اۋرۋحانالارىن سالۋدى ۇيعاردى. ونىڭ قۇرىلىسىنا تەز تۇرعىزىلاتىن قۇرىلىمدار قولدانىلماق.
