كوروناۆيرۋس: جامبىل وبلىسىنداعى ناۋقاستاردىڭ باسىم بولىگى - الىس-جاقىن شەتەلگە شىعىپ كەلگەندەر

تاراز. قازاقپارات - وبلىس اكىمى بەردىبەك ساپاربايەۆتىڭ توراعالىعىمەن جەدەل شتابتىڭ كەزەكتى وتىرىسى ءوتتى. وندا سوڭعى تاۋلىكتە ايماقتاعى كوروناۆيرۋستىق ينفەكتسيانىڭ تارالۋ جاعدايىنىڭ كۇردەلەنە تۇسكەندىگى اتاپ ءوتىلدى، دەپ حابارلايدى قازاقپارات جامبىل وبلىسى اكىمدىگىنىڭ رەسمي سايتىنا سىلتەمە جاساپ.

قازىرگى ۋاقىتتا وبلىس اۋماعىندا رەسمي تۇردە 45 ناۋقاس تىركەلگەن دەسەك، ولاردىڭ دەنى وڭىرگە ەلىمىزدىڭ باسقا ايماقتارىنان، سونداي-اق الىس-جاقىن شەتەلدەردەن كەلگەندەر.

ناۋقاستارمەن بايلانىستا بولعان بارلىق تۇلعالار كارانتينگە الىنعان. جيىندا وبلىس اكىمىنىڭ ءبىرىنشى ورىنباسارى بەكبولات ورىنبەكوۆ، تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى بەرىك جارقىنبەكوۆ، دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ، پوليتسيا دەپارتامەنتىنىڭ باسشىسى جانات سۇلەيمەنوۆ ءسوز الىپ، ولار قاۋىپتى ينفەكتسيانىڭ تارالۋىنا جول بەرمەۋ ماقساتىندا قابىلدانىپ جاتقان شارالار تۋرالى باياندادى. ب. جارقىنبەكوۆتىڭ ايتۋىنشا، 7- ساۋىردەگى جاعداي بويىنشا وبلىس بويىنشا كوروناۆيرۋستىق ينفەكتسيانىڭ 45 جاعدايى تىركەلگەن.

ونىڭ ىشىندە 11 ادام شەكارالىق وتكىزۋ پۋنكتتەرىن كەسىپ ءوتۋ كەزىندە، 6 جولاۋشى دەلي رەيسىنەن انىقتالعان. تاراز قالاسىندا 5 وقيعا، قورداي اۋدانىندا - 18، مەركى اۋدانىندا - 2، شۋ، مويىنقۇم جانە جامبىل اۋداندارىندا - ءبىر-بىرەۋدەن تىركەلگەن. سونداي-اق، اۋرۋعا شالدىعۋدىڭ ەڭ كوپ كورسەتكىشى كورشى قىرعىز رەسپۋبليكاسىنان كەلۋشىلەر اراسىنان بايقالعان، ولاردىڭ سانى - 14 ادام.

بارلىق ناۋقاستار وبلىستىق كوپسالالى بالالار اۋرۋحاناسىنىڭ جۇقپالى اۋرۋلار كورپۋسىنا جاتقىزىلعان. جاعدايلارى قاناعاتتانارلىق دەڭگەيدە، ولار كلينيكالىق حاتتاماعا سايكەس ەم الۋدا.

كارانتيندىك جانە پروۆيزورلىق ستاتسيونارلارعا بۇگىنگە دەيىن جالپى سانى 1305 ادام كەلىپ تۇسكەن دەسەك، ونىڭ 977 ءى شىعارىلعان. ال، 328 ادام ستاتسيونارلىق باقىلاۋدا.