ەلوردالىقتار قازاق، اعىلشىن تىلدەرىن تەگىن ۇيرەنىپ جاتىر

نۇر- سۇلتان. قازاقپارات - قاشىقتان وقۋ جۇيەسى قاتىسۋشىلارعا جۇمىس بولمەسىندە نەمەسە ۇيدە وتىرىپ ىڭعايلى ۋاقىتتا ءتىل ۇيرەنۋگە مۇمكىندىك بەرەدى، دەپ حابارلايدى ەلوردا اكىمدىگىنىڭ رەسمي سايتى.

ەلدەگى توتەنشە جاعدايعا بايلانىستى 16 - ناۋرىزدان باستاپ نۇر- سۇلتان قالاسى اكىمدىگىنىڭ تىلدەردى دامىتۋ جانە ارحيۆ ءىسى باسقارماسى، «رۋحانيات» ورتالىعى مەملەكەتتىك قىزمەتشىلەرگە، ءتۇرلى سالا ماماندارىنا، ەرەسەك ادامدارعا ءتىل ۇيرەنۋ كۋرستارىن قاشىقتان وقۋ پلاتفورماسى ارقىلى جۇزەگە اسىرادى. بۇگىندە 1326 تىڭداۋشىعا ZOOM، Whatsapp جانە ت. ب. قوسىمشالار ارقىلى قازاق تىلىنەن ونلاين كۋرس وقىتىلۋدا. سونىمەن قاتار، 110 مەملەكەتتىك قىزمەتكەر اعىلشىن تىلىنەن ونلاين كۋرسقا قاتىسىپ جاتىر. ەرەسەك ادامدارعا ءبىلىم بەرۋدىڭ ءتۇرلى ادىستەرىن قولدانا وتىرىپ، تاجىريبەلى، بىلىكتى وقىتۋشىلار ساباق بەرەدى. توپتا وقۋ مەن ساباق كەستەسى وزىنە ءتيىمسىز دەپ سانايتىن ەرەسەكتەر ءۇشىن ونلاين وقۋدىڭ پايداسى وراسان زور. ونلاين وقۋ ءۇشىن ءتىل ۇيرەنۋشىلەرگە ينتەرنەتكە قوسىلعان دەربەس كومپيۋتەر مەن Skype باعدارلاماسى قاجەت. وقۋ ۇدەرىسىندە ءبىلىم الۋشىلاردىڭ دەڭگەيى ءارتۇرلى بولۋىنا بايلانىستى، ءتىل ۇيرەنۋشىلەردىڭ تالابىنا، سۇرانىسىنا باعىتتالعان ءادىس- تاسىلدەر قولدانىلادى.

ماسەلەن، ەلوردانىڭ № 8, 10 ەمحانا قىزمەتكەرلەرى قازاق ءتىلىن ۇيرەنۋ كۋرسىنا جۇمىستان بوس ۋاقىتتا قاتىسسا، حالىققا قىزمەت كورسەتۋ ورتالىعى ماماندارىنا «قولجەتىمدى ورتا قۇرۋ» جوباسى اياسىندا اعىلشىن تىلىنەن ونلاين كۋرسقا قاتىسادى.