تارازدا جول ەرەجەسىن بۇزىپ، ونى ينتەرنەتتە جاريالاعان جۇرگىزۋشى ۇستالدى

تاراز. قازاقپارات - تارازدا توتەنشە جاعداي رەجيمىن جانە جول قوزعالىسى ەرەجەلەرىن بۇزعان جۇرگىزۋشى جاۋاپكەرشىلىككە تارتىلدى، دەپ حابارلايدى Polisia.kz.

الەۋمەتتىك جەلىلەردە جول قوزعالىسى ەرەجەلەرىن بۇزىپ قانا قويماي، ەل اۋماعىنا ەنگىزىلگەن توتەنشە جاعداي رەجيمىن دە ەلەمەگەن «لادا» كولىگىنىڭ جۇرگىزۋشىسىنە قاتىستى بەينەجازبا جاريالاندى.

تاراز قالاسىنىڭ كوشەلەرىندە شەكتەن شىققان ءتارتىپسىز ارەكەتتەرى بەينەلەنگەن بەلگىسىز تۇلعانىڭ بەينە ءتۇسىرىلىمى جەلىدە كەڭ تارالىپ، ءتارتىپ ساقشىلارىنىڭ نازارىنان تىس قالمادى. بەينەجازبا بويىنشا جەدەل-ىزدەستىرۋ جۇمىستارىن جۇرگىزگەن تاراز قالاسىنىڭ پوليتسيا باسقارماسى جول- پاترۋلدىك پوليتسيا باتالونىنىڭ قىزمەتكەرلەرى «لادا 21703» ماركالى اۆتوكولىگىنىڭ 23 جاستاعى جۇرگىزۋشىسىنىڭ جەكە باسىن انىقتاپ، جاۋاپكەرشىلىككە تارتتى.

قۇقىق بۇزۋشىعا قاتىستى ق ر اكىمشىلىك قۇقىق بۇزۋ كودەكسىنىڭ 601-بابىنىڭ 2-بولىگىمەن (جول بەلگىلەرىمەن نەمەسە جولدىڭ ءجۇرۋ بولىگىنىڭ تاڭبالارىمەن بەلگىلەنگەن تالاپتاردى ساقتاماۋ)، 590-باپتىڭ 5-بولىگىمەن (كولىك قۇرالدارىن پايدالانۋ ەرەجەلەرىن بۇزۋ، اتاپ ايتقاندا جۇرگىزۋشىگە شولۋدى شەكتەيتىن زاتتاردى ورناتۋ) جانە 590-باپتىڭ 9-بولىگىمەن (مەملەكەتتىك نەمەسە مىندەتتى تەحنيكالىق بايقاۋدان وتپەگەن كولىك قۇرالىن باسقارۋ) اكىمشىلىك حاتتاما تولتىرىلدى.

جامبىل وبلىسىنىڭ پوليتسيا دەپارتامەنتى جۇرگىزۋشىلەرگە توتەنشە جاعداي رەجيمى كەزىندە قوزعالىستى بارىنشا شەكتەپ، اسا قاجەت بولعان جاعدايدا عانا جولعا شىعۋدى، ساق بولۋدى ەسكەرتەدى.

كولىك جۇرگىزۋشىلەرى جول قوزعالىسى ەرەجەلەرىن، جول بەلگىلەرىنىڭ نۇسقامالارىن قاتاڭ ساقتاپ، كولىك قۇرالدارىنىڭ تۇراققا قويىلۋى مەن توقتاۋى، پايدالانۋ ەرەجەلەرىن جاۋاپكەرشىلىكپەن مۇلتىكسىز ورىنداۋى قاجەت.