ەلجان ءبىرتانوۆ ەلىمىزدەگى كوروناۆيرۋس جاعدايىنا قاتىستى تىڭ دەرەكتەردى ايتتى

نۇر-سۇلتان. قازاقپارات - بۇگىن ۇكىمەت وتىرىسىندا دەنساۋلىق ساقتاۋ ءمينيسترى ەلجان ءبىرتانوۆ ەلىمىزدەگى كوروناۆيرۋسقا قاتىستى جاعدايدى باياندادى، دەپ حابارلايدى قازاقپارات ءتىلشىسى.

بەلگىلى بولعانداي، ەلىمىزدە قاۋىپتى ىندەتتى 670 ادام جۇقتىرعان. وتكەن تاۋلىك بويىنشا جاڭا 78 ناۋقاس تىركەلىپ، ءوسىم دەڭگەيى 13 پايىز بولدى. تىركەلگەن 78 ناۋقاستىڭ ىشىندە نۇر-سۇلتان قالاسىندا 2 ناۋقاس، الماتىدا 3 ناۋقاس. وتكەن تاۋلىك بويىنشا باسقا وڭىرلەردە 73 جاڭا ناۋقاس تىركەلىپ، ءوسىم 29 پايىز بولدى. ەڭ ۇلكەن ءوسىم قاراعاندى وبلىسىندا (16)، اقمولا وبلىسىندا (19)، قىزىلوردا وبلىسىندا (13)، جامبىل وبلىسىندا(12) بايقالدى.

«قازىرگى كەزدە ەڭ ۇلكەن ءوسىم وڭىرلەردە بايقالىپ وتىر. جالپى 6 ناۋقاس قايتىس بولدى. 46 ناۋقاس ەمدەلىپ، شىعارىلدى. قازىر اۋرۋحانادا 680 ناۋقاس بار. ولاردىڭ 20 سىنىڭ جاعدايى ناشار. جەتەۋى جاساندى تىنىس الۋ اپپاراتىندا جاتىر. كەشە ءۇش ادام جاساندى تىنىس الۋ اپپاراتىنان الىنىپ، جاعدايى جاقساردى. جاعدايى ورتاشا 88 ناۋقاس بار. جەڭىل جاعدايدا 510 ناۋقاس جاتىر. ەل بويىنشا بايلانىستا بولعان 19112 ادام بار. ولاردىڭ 97 پايىزى تابىلىپ، وقشاۋلاندى»، - دەدى ەلجان ءبىرتانوۆ.

اۆتور: رۋسلان عابباسوۆ