دەنساۋلىق ساقتاۋ ءمينيسترى كارانتين ەرەجەسىن بۇزعانى ءۇشىن وتستاۆكاعا كەتتى

نۇر-سۇلتان. قازاقپارات - شوتلانديانىڭ دەنساۋلىق ساقتاۋ ءمينيسترى كەترين كەلدەرۆۋد ەلدە COVID-19 تارالۋىنىڭ الدىن الۋ ماقساتىندا ەنگىزىلگەن توتەنشە جاعداي رەجيمىن بۇزعاندىقتان وتستاۆكاعا كەتۋ تۋرالى شەشىم قابىلدادى، - دەپ حابارلايدى REUTERS.

باسىلىم مالىمەتىنشە، وتانداستارىنا ۇيدە وتىرۋعا كەڭەس بەرگەن دەنساۋلىق ساقتاۋ ءمينيسترى قالا سىرتىنداعى ۇيىنە دەمالۋعا بارعان. ونى The Scottish Sun باسىلىمىنىڭ جۋرناليستەرى سۋرەتكە ءتۇسىرىپ العان. كەيىنىرەك ونىڭ توتەنشە جاعداي رەجيمىن ەكى رەت بۇزعانى انىقتالعان.

«جاساعان ارەكەتىم ءۇشىن قاتتى وكىنەمىن. بۇگىن شوتلانديانىڭ ءبىرىنشى ءمينيسترى نيكول ستەردجبەن تەلەفون ارقىلى سويلەستىم. ءبىز مەنىڭ بۇل ارەكەتىمنىڭ كوروناۆيرۋس پاندەمياسىنىڭ الدىن الۋ ماقساتىندا جۇمىس ىستەپ جاتقان ۇكىمەت مەن مەديتسينا قىزمەتكەرلەرىنىڭ جۇمىسىنا كەدەرگى كەلتىردى دەگەن پىكىرگە كەلدىك»، - دەدى ول مالىمدەمەسىندە وتستاۆكاعا كەتەتىنىن ايتا وتىرىپ.