توقايەۆ كوروناۆيرۋستى انىقتايتىن تەست جاساپ شىعارعان قازاقستاندىق عالىمداردى قۇتتىقتادى

None
None
نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ دەنساۋلىق ساقتاۋ مينيسترلىگىنە قاراستى ماسعۇت ايقىمبايەۆ اتىنداعى اسا قاۋىپتى ينفەكسيالار ۇلتتىق عىلىمي ورتالىعى مەن ءبىلىم جانە عىلىم مينيسترلىگىنە قاراستى ۇلتتىق بيوتەحنولوگيا ورتالىعىنىڭ ۇجىمدارىنا قۇتتىقتاۋ حات جولدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

«عىلىمي ينستيتۋتتاردىڭ ۇجىمدارىن COVID-19 كوروناۆيرۋسىن انىقتاۋعا ارنالعان دياگنوستيكالىق تەست جۇيەسىن ازىرلەۋىمەن قۇتتىقتايمىن! اسا قاۋىپتى ينفەكسيالار ۇلتتىق عىلىمي ورتالىعى مەن ۇلتتىق بيوتەحنولوگيا ورتالىعىنىڭ عالىمدارى حالىقارالىق ستاندارتتارعا ساي كەلەتىن قاجەتتى تەست جۇيەسىن قىسقا مەرزىمدە جاساپ شىقتى. سىزدەردىڭ جەتىستىكتەرىڭىز وتاندىق بيومەديتسينا سالاسىنىڭ باسەكەگە قابىلەتتىلىگى جوعارى ەكەنىن كورسەتەدى. الەمگە تاراعان كوروناۆيرۋس ىندەتىنە قارسى كۇرەس ءجۇرىپ جاتقان كەزدە بۇل جاڭالىقتىڭ ۇسىنىلۋى وتە ماڭىزدى بولىپ وتىر. ازىرلەنگەن تەست جۇيەسى مىڭداعان ازاماتىمىزدىڭ ءومىرى مەن دەنساۋلىعىن ساقتاپ قالۋعا كومەكتەسەدى دەپ سەنەمىن»، - دەپ جازىلعان مەملەكەت باسشىسىنىڭ قۇتتىقتاۋ حاتىندا.

قاسىم-جومارت توقايەۆ ەكى عىلىمي ورتالىقتىڭ ەل يگىلىگى جولىنداعى جۇمىستارىنا تابىس تىلەپ، العىس ءبىلدىردى.


سوڭعى جاڭالىقتار