وتباسىنداعى تاتۋلىق: كارانتيندە ۇرىس-كەرىس بولماس ءۇشىن نە ىستەۋ كەرەك

نۇر-سۇلتان. قازاقپارات - كارانتين كەزىندە ەرلى-زايىپتىلاردىڭ قورقىنىشقا بوي الدىرىپ، اجىراسىپ كەتۋىنىڭ قالاي الدىن الۋعا بولادى؟

بۇل ساۋالعا پسيحواناليتيك جانار وسپانوۆا جاۋاپ بەردى، دەپ حابارلايدى قازاقپارات ءتىلشىسى. «كارانتين كەزىندە ەرلى- زايىپتىلاردىڭ بىرگە بولۋى وزدەرى ءۇشىن پايدالى دەپ ويلايمىن. وسىنداي كەزدە ادامدار ءبىر-ءبىرىن جاقىنىراق تانيدى. مىسالى، جۇبايىنا كوڭىل بولۋگە ۋاقىت تاپپاي جۇرگەنىن ايتىپ شاعىمداناتىندار بار. سونداي ادامدار ءۇشىن جاقىنىنا كوڭىل ءبولىپ، قامقورلىق تانىتاتىن ۋاقىت كەلدى. وسىنداي كەزدە ءجيى ۇرسىسىپ قالاتىن جۇبايلار دا بار شىعار. ونداي كەزدە ۇرسىسىپ وتىرعان ومىرلىك سەرىگىڭىز ومىردەن ءوتىپ كەتسە، ءوزىڭدى قالاي سەزىنەتىنىڭدى كوز الدىنا ەلەستەتىپ كورىڭىز. ۇرىس-كەرىس كەزىندە ءوزىڭدى ۇستاپ، اگرەسسياعا جول بەرمەۋ كەرەك. پسيحولوگيادا ءۇش مينۋت ءۇنسىز قالۋ دەگەن تەحنيكا بار. ءۇش مينۋت ءۇنسىز قالا الساڭىز ءۇش ساعات، ءۇش ساعات ءۇنسىز بولا الساڭىز، ءۇش كۇن ۇندەمەي جۇرە الاسىز. ءۇنسىز قالعان ادام اشۋ-ىزاسىنىڭ ەش ماعىناسى بولماعانىن تۇسىنەدى. ءدال قازىرگى كارانتين جاعدايىندا ءبىر- بىرىڭە تۇسىنىستىك تانىتىپ، بىرلىكتە بولۋ كەرەك»، - دەيدى جانار وسپانوۆا.

ونىڭ ايتۋىنشا، ۇرىس-كەرىستى ازايتۋ ءۇشىن بالا-شاعاعا كوپ كوڭىل ءبولۋ كەرەك.

«قازىر بالالار دا ۇيدە. ولارعا كوڭىل ءبولىپ، ويناپ، دامۋىنا كومەكتەسۋ كەرەك. ال ءوزىڭىز زەرىگىپ كەتپەس ءۇشىن كىتاپ وقۋعا بولادى. ۇيالى تەلەفوندا كوپ وتىرۋ ادامدى تەز شارشاتادى، سوندىقتان 20 مينۋت سايىن ودان دەمالۋ كەرەك. سونداي- اق، يوگامەن، دەنە شىنىقتىرۋمەن، سۋرەت سالىپ، كەستە تىگۋمەن جانە ءارتۇرلى ءدامدى تاماق پىسىرۋمەن اينالىسۋعا بولادى. ءوزىنىڭ پسيحولوگيالىق جاعدايىن باسقارا المايتىن ادام پسيحولوگ ارقىلى بويىنداعى ۇرەي، قورقىنىشىنان ارىلا الادى»، - دەيدى پسيحواناليتيك.

اۆتور: زارينا قاھارمان