مايرا مۇحامەد قىزى ونلاين كونسەرت وتكىزدى

None
None
نۇر-سۇلتان. قازاقپارات - بەلكانتو پاتشايىمى، «استانا وپەرانىڭ» جەتەكشى ءسوليسى مايرا مۇحامەد قىزى جەكە ونلاين-كونسەرتىن بەردى.

وپەرا ديۆاسىنىڭ كۇشتى دە قۋاتتى ەنەرگەتيكاسىنىڭ ارقاسىندا سەنبىلىك كەش ناعىز تەاترلىق شاتتىققا اينالدى، دەپ حابارلايدى قازاقپارات تەاتردىڭ باسپا ءسوز قىزمەتىنە سىلتەمە جاساپ.

قازاقستاننىڭ ەڭبەك سىڭىرگەن ءارتىسى، ق ر مەملەكەتتىك سىيلىعىنىڭ لاۋرەاتى مايرا مۇحامەد قىزى باعدارلامانى ءساتتى تاڭداعان.

جەكەلەگەن ءبىر ءبولىم جان جىلۋى مەن ۇيىمشىلدىق سەزىمىن تۋدىراتىن «بۇلدىرگەن»، «اق كويلەك»، «ال قوڭىر»، «ساۋلەم-اي» سىندى قازاق حالىق اندەرىنە ارنالعان.

قازاق تەلەكومنىڭ YouTube ارناسىنىڭ Live فورماتىنداعى تىكەلەي ەفيرىندە ايگىلى ءانشىنىڭ سىڭعىرلاعان تازا داۋىسى مەن ءمىنسىز ورىنداۋىندا اباي قۇنانبايەۆتىڭ «كوزىمنىڭ قاراسى»، مۇراتبەك بەگاليەۆتىڭ «ىسىق كولدۋ ساعىنۋ»، ابدۋللا توقايدىڭ «انا ءتىلى» جانە ت. ب. شىعارمالار شىرقالدى.

ۇيعىر ءارى قىتاي حالىق اندەرى باعدارلامانىڭ ءسانىن كەلتىردى. وپەرا ديۆاسى كۇن سايىن ۆوكالدىق شەبەرلىگىن شىڭداۋ، ونەردىڭ سىرلارىنا تەرەڭ بويلاۋ ارقىلى حالىقتىڭ زور ماحابباتىنا يە بولدى.

ونىڭ قاجىرلى ەڭبەگى، رەپەرتۋارىن كەڭەيتۋگە باعىتتالعان جۇمىستارى، تىنىمسىز شىعارماشىلىق يدەيالاردى ىزدەستىرۋى ءوز جەمىسىن بەردى. ءسىرا، بۇگىنگى تاڭدا ونىڭ ەسىمىن بىلمەيتىن ادام جوق شىعار. حالىقتىڭ سۇيىكتىسى، قازاقستاننىڭ ۆوكالدىق ونەرىنىڭ الەمدەگى لايىقتى وكىلى.

سونداي-اق مايرا مۇحامەد قىزى - دۇنيە ءجۇزىنىڭ وپەرا انشىلەرىنىڭ كۇردەلى دە بەدەلدى شىعارماشىلىق جارىسى - ماسكەۋدەگى پ. چايكوۆسكي اتىنداعى حالىقارالىق بايقاۋدىڭ لاۋرەاتى (1998) اتانعان جالعىز قازاقستاندىق وپەرا ورىنداۋشىسى.

تاماشا ۆوكالدىق شەبەرلىكتەن بولەك، كورەرمەندەر وسى كەشتە كەرەمەت اسپاپشىلاردىڭ دا شەبەر ورىنداۋشىلىعىن باعالاي الدى - تسەزار كيۋيدىڭ «تسارسكوسەلسكايا ستاتۋيا»، پەتر چايكوۆسكيدىڭ «كولىبەلنايا پەسن ۆ بۋريۋ» كومپوزيتسيالارىنىڭ سىرلى ينتەرپرەتاتسيالارىن كوپتەگەن حالىقارالىق بايقاۋلاردىڭ لاۋرەاتى ارفاشى ديليارا قالدىبايەۆا ۇسىنسا، قازاقستاننىڭ ەڭبەك سىڭىرگەن قايراتكەرى ەلميرا احمەدياروۆا كونسەرتتە فورتەپيانو پارتياسىن ورىندادى.

ەسكە سالار بولساق، ق ر مادەنيەت جانە سپورت مينيسترلىگى «قازاق تەلەكوم» ا ق- مەن بىرلەسىپ، Live فورماتىندا «كارانتيندەگى جۇلدىز» جوباسىن ءساتتى جۇزەگە اسىرۋدا.

كورەرمەندەر ارتىستەرمەن پىكىر جازۋ ارقىلى سۇحباتتاسادى. كونسەرتتەر اشىق ءارى بارشاعا قولجەتىمدى تۇردە تەگىن وتكىزىلەدى.

سوپرانو داۋىسىنىڭ يەگەرى، «استانا وپەرا» ءسوليسى ءمادينا يسلاموۆانىڭ دا ونلاين-كونسەرتى 1- ءساۋىر كۇنى @etalents.pro تىكەلەي ەفيرىندە ءوتتى. الەۋمەتتىك جەلىدەگى ءوزىنىڭ پاراقشاسىندا ءانشى «مۋزىكا ادامنىڭ جان-دۇنيەسىن ەمدەيدى» دەپ اتاپ وتكەن.

ونىڭ ورىنداۋىندا ونلاين-اۋديتوريا نازارىنا قازاقتىڭ حالىق اندەرى «بالقاديشا»، «ياپىراي»، «ناز قوڭىر»، سونداي-اق ە. برۋسيلوۆسكيدىڭ «قىز جىبەك» وپەراسىنان «تولقىما»، «گاككۋ» جانە تاعى باسقا كوپتەگەن تۋىندىلار ۇسىنىلدى.

تىڭدارماندار وزدەرىنىڭ پىكىرلەرىندە وسىناۋ قيىن-قىستاۋ كەزەڭدە اسقاق ونەردىڭ قۇدىرەتى ارقىلى كوڭىل-كۇي مەن كۇش-قۋات سىيلاعانى ءۇشىن «استانا وپەرا» ارتىستەرىنە العىستارىن ءبىلدىردى.

سوڭعى جاڭالىقتار