ەكى ەلدىڭ اۋىر اتلەتتەرى توكيو وليمپياداسىنان شەتتەتىلدى

نۇر-سۇلتان. قازاقپارات - تاۋەلسىز فەدەراتسيالاردىڭ سانكتسيالار جونىندەگى توبى (IMFSP) دوپينگكە قارسى ەرەجەلەردى بۇزعانى ءۇشىن ەكى ەلدى ديسكۆاليفيكاتسيالاۋ تۋرالى شەشىم قابىلدادى دەپ حابارلايدى Sports.kz.

اتاپ ايتقاندا، تايلاند اۋىر اتلەتيكا قاۋىمداستىعى (TAWA) جانە مالايزيا اۋىر اتلەتيكا فەدەراتسياسى (MWF) ديسكۆاليفيكاتسيالاندى.

سونىمەن ەكى ەلدىڭ شتانگاشىلارىنا حالىقارالىق جارىستارعا قاتىسۋعا تىيىم سالىندى: TAWA -2023-جىلعى 1- ساۋىرگە، MWF -2021-جىلعى 1- ساۋىرگە دەيىن. سونداي-اق حالىقارالىق اۋىر اتلەتيكا فەدەراتسياسى (IWF) تۋرنيردىڭ قاي كۇنى وتكىزىلەتىندىگىنە قاراماستان تايلاند جانە مالايزيا اۋىر اتلەتتەرى توكيو وليمپياداسى ويىندارىنا قاتىسپايتىندىعىن اتاپ وتۋدە.

بۇدان باسقا TAWA 200 مىڭ دوللار ايىپپۇل سالىندى، ال ونىڭ لاۋازىمدى تۇلعالارى ەكى جىل مەرزىمگە قىزمەتىنەن شەتتەتىلدى.