الماتى اكىمى جاڭا گوسپيتال سالۋعا پارمەن بەردى

الماتى. قازاقپارات- الماتى اكىمى باقىتجان ساعىنتايەۆ جۇقپالى اۋرۋلار گوسپيتالىنىڭ قۇرىلىسىن باستاۋعا پارمەن بەردى، دەپ حابارلايدى قازاقپارات ءتىلشىسى.

بۇگىن الماتى قالاسىنىڭ اكىمى باقىتجان ساعىنتايەۆ 280 ورىندىق پروۆيزورلىق گوسپيتالدىڭ قۇرىلىسى باستالعان الاڭعا بارىپ، ونداعى جۇمىستارمەن تانىستى.

گوسپيتال سالۋ تۋرالى شەشىمدى كوروناۆيرۋس ينفەكسياسىنا قارسى كۇرەس ماقساتىندا قۇرىلعان ق ر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ تۋرالى مەملەكەتتىك كوميسسيا قابىلداعان بولاتىن. تەز سالىناتىن قۇرىلىس جابدىقتارىمەن تۇرعىزىلاتىن نىسان 280 ورىنعا ارنالعان. ونىڭ ىشىندە 28- ءى ينتەنسيۆتى تەراپيا بولىمشەسىنە تيەسىلى بولادى. از ۋاقىت ىشىندە سالىپ ءبىتىرۋ ءۇشىن ادەيى بلوكتى قۇرىلىس ماتەريالدارى تاڭدالعان. گوسپيتال كوروناۆيرۋس ينفەكتسياسىن جۇقتىرعان ناۋقاستارمەن بايلانىستا بولعان جانە قاتەرلى ىندەتتى جۇقتىرۋى مۇمكىن دەگەن كۇدىكپەن ەسەپكە الىنعان ادامدارعا ارنالعان.

«مۇنداي گوسپيتالدار بىزگە ىندەت جۇقتىرعان جانداردى دەر شاعىندا انىقتاۋعا، ولاردى دەرەۋ وقشاۋلاپ، ۋاقىتىندا ءارى جۇيەلى ەم- دوم قابىلداۋىنا مۇمىندىك بەرەدى. ءسويتىپ ءبىز قاتەرلى ينفەكتسيانىڭ بەلەڭ الۋىنا جول بەرمەي، قالاداعى ەپيدەميولوگيالىق احۋالدى تۇراقتى ۇستاپ تۇراتىن بولامىز»، - دەدى باقىتجان ساعىنتايەۆ.

ايتا كەتەيىك، جاڭا گوسپيتال الاتاۋ اۋدانىندا بوي كوتەرەدى. قازىر نىساننىڭ ورنى تەگىستەلىپ جاتىر. سونداي- اق، قالالىق قوعامدىق دەنساۋلىق ساقتاۋ باسقارماسىنىڭ باسشىسى تىلەۋحان ابىلدايەۆقا وسى جوبانى قولعا العان كومپانيا وكىلدەرىمەن بىرلەسىپ گوسپيتالعا اسا قاجەتتى قۇرال- جابدىقتار ماسەلەسىن دە پىسىقتاۋدى تاپسىردى. مەردىگەر كومپانيا وكىلدەرىنە قولعا العان بارلىق جۇمىستى ساپالى ءارى ۋاقىتىندا ءبىتىرۋدى جۇكتەدى.

اۆتور: گۇلميرا عوسمانالي