شىمكەنتتەن ءوتىپ بارا جاتقان ترانزيتتىك كولىك جۇرگىزۋشىسىنەن كوروناۆيرۋس انىقتالدى

شىمكەنت. قازاقپارات - شىمكەنتتىڭ اۋماعىنان ءوتىپ بارا جاتقان ترانزيتتىك كولىك جۇرگىزۋشىسىنەن كوروناۆيرۋس انىقتالدى. بۇل تۋرالى قالالىق توتەنشە جاعداي شتابى مالىمەت تاراتتى، دەپ حابارلايدى قازاقپارات ءتىلشىسى.

«ناۋقاس 1964 -جىلى تۋعان تۇركىستان وبلىسى، ماقتاارال اۋدانىنا قاراستى اتاكەنت ەلدى مەكەنىنىڭ تۇرعىنى ەكەنى انىقتالدى. ول 28 - ناۋرىز كۇنى شىمكەنت قالالىق جۇقپالى اۋرۋلار اۋرۋحاناسىنا جاتقىزىلعان. اۋىر جۇك كولىگىنىڭ جۇرگىزۋشى «ماسكەۋ- الماتى» باعىتىندا جول ءجۇرىپ بارا جاتقاندا ىستىعى كوتەرىلىپ، دارىگەر كومەگىنە جۇگىنگەن. ناتيجەسىندە شۇعىل اۋرۋحاناعا جەتكىزىلگەن. ال، ترانزيتتىك كولىكتى ارى قاراي ايداپ كەتكەن ۇلى الماتى قالاسىندا وقشاۋلانىپ، ستاتسيونارعا جاتقىزىلعان. بۇل شىمكەنتتە تىركەلگەن 13-جاعداي بولىپ وتىر» دەلىنگەن حابارلامادا.

اۆتور: اينۇر اقبايەۆا