وسى داعدارىستان كەيىن مەديتسينا، ءبىلىم بەرۋ، سيفرلاندىرۋ سالالارىن جانداندىرۋعا باسىمدىق بەرىلەدى - ماۋلەن اشىمبايەۆ
سونداي- اق، وسى ىندەتپەن كۇرەسىپ جاتقان قازاق ەلىن سىن ساعاتتا جۇدىرىقتاي جۇمىلۋعا، بىرلىك تانىتۋعا شاقىردى، دەپ حابارلايدى قازاقپارات.
«قازىر بۇكىل الەممەن بىرگە ءبىزدىڭ ەلىمىز دە سىن- ساعاتىن باستان وتكەرۋدە. بۇل تىعىرىقتان شىعۋ ءۇشىن مەملەكەت باسشىسى اۋقىمدى شارالار قابىلداعانىن بىلەسىزدەر. ولار نەگىزىنەن ىندەتپەن كۇرەسۋگە جانە حالىق پەن بيزنەستى قولداۋعا ارنالىپ وتىر. سوعان سايكەس ورتالىقتا جانە وڭىرلەردە ءتيىستى جۇمىستار قولعا الىندى. الداعى ۋاقىتتا ونىڭ ءبارى وڭ ناتيجە بەرەتىنىنە ەشقانداي كۇمان جوق. سوندىقتان بىزگە ءدال قازىر سابىر ساقتاۋ كەرەك. ءبىز بۇدان دا قيىن كەزەڭدەردە ساعى سىنباعان حالىقپىز. وتكەن عاسىردىڭ وزىندە الاپات اشتىق پەن دۇنيە ءجۇزىن شارپىعان سۇم سوعىستان امان وتتىك. سونىڭ ءبارىن اتالارىمىز ىنتىماق پەن ءتوزىمنىڭ ارقاسىندا ەڭسەردى. قانداي قيىن- قىستاۋ كەز بولسا دا بىرلىگىمىز بەن بەرەكەمىزگە ەش سىزات تۇسىرگەن جوق. قايتا سۇرىنگەنگە سۇيەۋ، قۇلاعانعا دەمەۋ بولىپ، جۇدىرىقتاي جۇمىلا ءبىلدى» دەپ جازدى ول.
ماۋلەن اشىمبايەۆ قازىر دە ءدال سولاي بىرىگۋىمىز قاجەت ەكەنىن، سىندارلى ساتتە بايبالام سالماي، قايتا ۇلت بولىپ ۇيىسۋدى ويلاۋىمىز كەرەگىن ايتىپ ءوتتى. «قازىر دە ءدال سولاي بىرىگۋىمىز قاجەت. بۇگىنمەن عانا ەمەس، بولاشاقتى ويلاپ ءومىر سۇرەيىك. مەملەكەت ەشكىمدى اش- جالاڭاش قالدىرمايدى. پرەزيدەنتىمىزدىڭ تاپسىرماسىمەن مۇقتاج ازاماتتاردىڭ بارىنە كومەك كورسەتىلەدى. تەك شىدامدىلىق تانىتقان ءجون. قاشان دا جوققا سابىر، بارعا قاناعات ەتكەن حالىق ەدىك قوي. سول قۇندىلىقتارىمىزدى جوعالتپايىق. وسىنداي سىندارلى ساتتە جاعا جىرتىسپاي، بايبالام سالماي، قايتا ۇلت بولىپ ۇيىسۋدى، ورتاق ىسكە جۇمىلۋدى ويلايىق. تاۋەلسىزدىكتىڭ، ەلدىكتىڭ قادىر- قاسيەتىنە ءمان بەرەيىك» دەپ جازدى ماۋلەن ساعاتحان ۇلى.
قولداۋ شارالارىن جۇزەگە اسىرۋ كەزىندە تەحنيكالىق اقاۋلاردىڭ بولعانىن تىلگە تيەك ەتتى. الداعى ۋاقىتتا ونداي ولقىلىقتاردىڭ قايتالانباۋى ءۇشىن جاڭا رەسۋرستار ىسكە قوسىلىپ جاتقانىن دا اتاپ ءوتتى. ودان بولەك، ماۋلەن اشىمبايەۆ پاندەميادان كەيىن بۇكىل الەمدە ۇلكەن وزگەرىس بولادى دەپ باعامدادى.
«وسى داعدارىستان كەيىن كەيبىر باسىمدىقتاردىڭ وزگەرەتىنى تۇسىنىكتى. ءتىپتى بۇكىل الەم دامۋدىڭ جاڭا كەزەڭىنە قادام باسادى دەسەك تە ارتىق ەمەس. سول ساتتە بىزگە وسالدىق تانىتۋعا بولمايدى. وسىنداي كەزدە ءالسىز تۇستارىمىز دا كورىنىپ جاتىر. سولاردى جەتىلدىرۋىمىز كەرەك. سونىڭ ءبارىن ەسكەرىپ، مەملەكەت باسشىسى مەديتسينا، ءبىلىم بەرۋ، سيفرلاندىرۋ سالالارىن دامىتۋ ءۇشىن ناقتى مىندەتتەر جۇكتەپ وتىر. ياعني، داعدارىستان كەيىن وسى باعىتتاردى جانداندىرۋعا باسىمدىق بەرىلەدى. ەكونوميكانى ءارتاراپتاندىرۋعا ەرەكشە كوڭىل بولىنەدى. پرەزيدەنت بۇدان باسقا دا ناقتى جۇمىستاردى قولعا الۋدى تاپسىردى. سونىڭ ءبارى ءوز جەمىسىن بەرۋ ءۇشىن بىرلىگىمىزدى كۇشەيتەيىك»، - دەيدى ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى.
سونداي- اق، ماۋلەن اشىمبايەۆ حالىقتى سىن ساتتەن سىنباي، لايىقتى ەڭسەرە بىلۋگە، ءبىر ءۇيدىڭ بالاسىنداي، ءبىر قولدىڭ سالاسىنداي بولىپ، پرەزيدەنتىمىزدىڭ قاسىنا توپتاسۋعا شاقىردى.
«حالقىمىز «كوپپەن كورگەن - ۇلى توي» دەيدى. بۇل سىناقپەن تەك ءبىز ەمەس، بۇكىل جاھان جۇرتى بەتپە- بەت كەلىپ وتىر. سوندىقتان ەڭسەمىزدى تۇسىرمەيىك، ەل ەكەنىمىزدى ەستەن شىعارمايىق. قانداي دۇربەلەڭ بولسا دا مويىماي، مورت سىنباي، لايىقتى ەڭسەرە بىلەيىك. ءبىز - رۋحى مىقتى حالپىقپىز. ازاماتتارىمىزدىڭ كەشەگىدەي ءانۇران شىرقاپ، بەكەم بىرلىكتىڭ وزىق ۇلگىسىن كورسەتۋى سوعان دالەل. ەلىمىزدىڭ بارلىق وڭىرىندە بەلسەندىلىك تانىتىپ جۇرگەن ۆولونتەرلەردىڭ دە ەرەن ەڭبەگىن ەلەۋسىز قالدىرۋعا بولمايدى. ارامىزدا ءوز ەركىمەن اسكەرگە بارعىسى كەلەتىندەردىڭ دە قاتارى قالىڭ ەكەنى قۋانتادى. ەندەشە، قازىرگىدەي قيىن شاقتا ءبىر ءۇيدىڭ بالاسىنداي، ءبىر قولدىڭ سالاسىنداي بولىپ، پرەزيدەنتىمىزدىڭ قاسىنا توپتاسايىق. سوندا وسى سىناقتان سۇرىنبەي ءوتىپ، كوزدەگەن ماقساتتارىمىزعا قول جەتكىزەمىز. ەلىمىز امان، جۇرتىمىز تىنىش بولىپ، قازاق ەلى ماڭگى جاساسىن!» دەپ ءتۇيدى ءسوزىن ول.
اۆتور: ەربول جانات