نەلىكتەن تاجىكستاندا كوروناۆيرۋس جوق
حابارلامادا ايتىلعانداي، تاجىكستان مەن تۇركىمەنستان - ورتالىق ازياداعى كوروناۆيرۋس تىركەلمەگەن ەلدەر. ت م د- نىڭ باسقا ەلدەرىندە بۇل ۆيرۋس تەز تارالۋدا. رەسمي مالىمەتتەرگە سايكەس، ۆيرۋستىڭ 200 گە جۋىق ەلدە شامامەن 1 ميلليون ادامعا جۇققان.
تاجىكستان مەن تۇركىمەنستاننان باسقا، سونداي- اق سولتۇستىك كورەيا مەن يەمەندە كوروناۆيرۋس تىركەلگەن جوق.
Newsweek جۋرنالىنىڭ زەرتتەۋىنە جۇگىنسەك، كوروناۆيرۋس ءبىر- اق ادامنان تابىلعان ەلدەردى افريكا مەن تىنىق مۇحيتتان كەزدەستىرۋگە بولادى. سولتۇستىك كورەياعا جەتە قويماعان. قىتايمەن، وڭتۇستىك كورەيامەن شەكتەسەتىن سولتۇستىك كورەيا - جاڭا كوروناۆيرۋستىڭ جولىن بوگەۋ ءۇشىن ءوز شەكاراسىن جاۋىپ، انتي- ەپيدەميالىق شارالاردى قولعا العان العاشقى ەلدەردىڭ ءبىرى.
وڭتۇستىك سۋداندا دا ءالى كەزدەسكەن جوق. بۇل سۋب- ساحارالىق مەملەكەتتە ازاماتتىق سوعىس وتكەن ايدا عانا اياقتالىپ، جاۋلاسۋشى تاراپتار بىرلىك تۋرالى كەلىسىمگە قول قويدى. افريكانىڭ وزگە ءبىر جەرلەرىندە، مىسالى، بوتسۆانا مەن لەسوتودا دا COVID ازىرگە انىقتالماي وتىر. ايتا كەتۋ كەرەك، بۇل مەملەكەتتەر كوروناۆيرۋس ەپيدەمياسى جۇقتىرعاندار سانى 1000 عا جۋىقتاعان وڭتۇستىك افريكا رەسپۋبليكاسىمەن شەكارالاس.
بۇل دياگنوز وسى ايماقتاعى كۋك جانە مارشالل ارالدارىنىڭ، ميكرونەزيا مەن ناۋرۋدىڭ، پالاۋ مەن ساموانىڭ، سولومون ارالدارى مەن تۋۆالۋدىڭ، ۆانۋاتۋدىڭ بىردە- ءبىر تۇرعىنىنا قويىلماپتى. وسى ەلدەردىڭ كوبى بۇگىندە الەمنىڭ ەڭ باقۋاتتى، ەڭ ءىرى دەگەن مەملەكەتتەرىنىڭ وزىندە دەنساۋلىق ساقتاۋ جۇيەسىنە كۇيرەۋ قاۋپىن ءتوندىرىپ تۇرعان ۆيرۋستىڭ جولىن بوگەۋ ءۇشىن شەكارالارىن مەيلىنشە جاپتى.
د د ۇ- نىڭ تاجىكستانداعى وكىلى گالينا پەرفيلييەۆا ەلدە كوروناۆيرۋستىڭ جوقتىعىن رەسمي تۇردە مالىمدەدى. «تاجىكستاندا نەلىكتەن كوروناۆيرۋستىڭ بىردە- ءبىر وقيعاسى جوق دەگەن سۇراققا بىردە- ءبىر جاۋاپ جوق. مۇنىڭ سەبەبىن انىقتاۋ قيىن» دەدى پەرفيلييەۆا Sputnik تاجىكستانعا.
«بۇگىنگى كۇنى، ، تاجىكستاندا كوۆيد-19 (كوروناۆيرۋس) تۋرالى بىردە- ءبىر وڭ جاعداي تىركەلگەن جوق» دەيدى ول.
د د ۇ وكىلىنىڭ ايتۋىنشا، تاجىكستاندا كوروناۆيرۋس تۋرالى 700 دەن استام زەرتتەۋ جۇرگىزىلگەن، ولاردىڭ بارلىعى تەرىس.
ەلگە تەست جۇيەلەرىنىڭ نەگىزگى جەتكىزۋشىسى - رەسەي. روسپوترەبنادزور تاجىكستانعا 23 مىڭ تەست جۇيەسىن جىبەردى. گەرمانيا تاعى ءبىر مىڭىن بەردى. قىتايمەن كەلىسسوزدەر دە جالعاسۋدا.
ساراپشىلار تاجىكستاننىڭ گەوگرافيالىق ورنالاسۋى پاندەميانىڭ اسەرىنىڭ السىرەتىپ وتىرعانىن ايتادى. رەسەي، قازاقستان، وزبەكستاننىڭ شەكاراسىن جابۋى تاجىك ەلىنە اسەرىن بەرگەن. باسقاشا ايتقاندا ت م د- داعى كورشىلەرى دەرتتەن قورعانۋ ءۇشىن ەسىگىن جاۋىپ ۇلگىرگەنشە، تاجىكتەر ەسىن جيىپ، ساقتىق شارالارىن كوبەيتتى. شەتتەن كەلگەندەردىڭ ءبارىن ەلدىڭ شەكاراسىندا كۇتىپ الىپ، كارانتينگە جاتقىزدى. كۇدىكتىلەردى دە وقشاۋلاپ، تەكسەرۋدەن وتكىزدى. ءسويتىپ دەرتتىڭ ەل ىشىندە دەندەپ ەنۋىنە مۇمكىندىك بەرمەي، تابالدىرىعىنان دا اتتاتقان جوق.
ساراپشىلار وسى رەتتە تاجىك ەلىندە شەتەلگە بارىپ دەمالاتىن جاعدايى بار ازاماتتاردىڭ وتە از ەكەنىن ايتادى. سول سەبەپتى بۇل دەرتتىڭ يمپورتتالىپ كەلۋ مۇمكىندىگىن ءنول دەسە دە بولادى.
د س ۇ مالىمەتى بويىنشا، كوروناۆيرۋستار، ءبىرىنشى كەزەكتە، 65 جاستان اسقان قارت ادامدار، سوزىلمالى اۋرۋلارى بار ادامدار، جۇكتى ايەلدەر مەن يممۋن تاپشىلىعى بار ازاماتتارعا جۇقتىرۋ قاۋپىن توندىرەدى. ال تاجىك ەلى، سالىستىرمالى تۇردە قاراعاندا جاس مەملەكەت. حالىقتىڭ كوپ بولىگى جاستار مەن بالالار. زەينەتكەرلىككە شىققان ادامدار تاجىكتەردىڭ تەك % 5,4 قۇرايدى. ال جاستاردا ۆيرۋسپەن اۋىرعانمەن، ونىڭ اعزاعا تەرەڭدەپ تارالۋىنا مۇمكىندىك بەرمەيدى. اعزاعا ەنگەن دەرتتى جاستىعىمەن جەڭەدى.
ناۋرىز ايىنىڭ سوڭعى كۇندەرى كاراتينگە جابىلعان تاجىك مەكتەپتەرى 1 - ساۋىردەن باستاپ قايتا جۇمىس ىستەپ جاتىر.
**
جۋرناليستەر ەلگە ينفەكسيانىڭ الدىن الۋعا نە نارسەنىڭ كومەكتەسكەنىن انىقتاۋعا تىرىستى.
تاجىكستاندا كوروناۆيرۋسپەن اۋىراتىن ناۋقاستاردىڭ بولماۋىن تۇسىندىرەتىن بىرنەشە نۇسقالار بار. ولاردىڭ ىشىندەگى ەڭ تانىمالدارىن Sputnik تاجىكستان باسىلىمى ۇسىندى.
ءبىرىنشى نۇسقا بويىنشا، تاجىكستان ايتارلىقتاي جابىق ەل. بۇل جەردە تۋريزم دامىماعان، مەملەكەتتىڭ ءوزى اسىرەسە شەتەلدىكتەر اراسىندا تانىمال ەمەس، رەسپۋبليكادا رەيستەر از، ال ترانزيتتىك مارشرۋتتار مۇلدە جوق. وسى فاكتورلاردىڭ بارلىعى ۆيرۋستىڭ ەلگە سىرتتان اكەلۋىنە شەكتەۋ قويادى. سونداي- اق بۇل ەلدىڭ قۇرلىق تەرەڭدىگىندە، كولىك اعىندارىنا اسەر ەتپەي ورنالاسقاندىعى اتاپ ءوتىلدى.
ەكىنشى نۇسقا - كەدەيلىك. كوپتەگەن ەلدەردە ينفەكسيانى ەۋروپاعا نەمەسە قىتايعا ساپار شەككەن ازاماتتار جۇقتىرعان. ءبىراق تاجىكتەردىڭ باسىم كوپشىلىگىنىڭ شەتەلگە شىعۋعا مۇمكىندىگى جوق. شەتەلدە جۇمىس ىستەيتىندەر ۇيگە سيرەك كەلەدى.
گۇلبارشىن ايتجانباي قىزى