وڭتۇستىك كورەيادا جۇرگەن ءجۇز قازاقستاندىق ەلگە ورالدى
ءبىرىنشى ساۋىردەن باستاپ الماتى اۋەجايى جولاۋشى ۇشاقتارىن قابىلداماسا دا، ۇكىمەت ينچوننان ۇشىپ شىققان اۋە كولىگىنىڭ قونۋىنا رۇقسات بەرۋدى شەشتى. بۇل رەيسپەن تايلاند جانە جاپونيادا كىدىرىپ قالعان قازاقستاندىقتار دا وتانىنا جەتە الدى. ولار ۇيىنە قايتۋ ءۇشىن ارنايى سەۋلگە ۇشىپ كەلگەن.
سونداي- اق، وڭتۇستىك كورەيادا جۇمىس ىستەگەن جەرلەستەرىمىز دە ەلىنە ورالۋعا نيەت ءبىلدىردى. ويتكەنى كوروناۆيرۋس سالدارىنان كوپتەگەن كاسىپورىندار جابىلعان بولاتىن. وڭتۇستىك كورەيادا ەمدەلگەن جەرلەستەرىمىز دە بۇل رەيسپەن ۇيىنە قايتتى.
ۆلاديسلاۆ سوي، ءتىلشى:
- كورەيادان قازاقستانعا ۇشاتىن وسى ايداعى سوڭعى رەيستىڭ جولاۋشىلارى الماتىدا قيىندىقتارعا تاپ بولۋى مۇمكىن. ويتكەنى قالا كارانتيندە. ال كەيبىر جولاۋشىلار قازاقستاننىڭ باسقا قالالارىنا بارۋى كەرەك.
قىزىلوردا تۇرعىنى ۆالەريا تيان، قىتايداعى نانكين ۋنيۆەرسيتەتىنىڭ ستۋدەنتى. ونىنشى ساۋىردە ونىڭ ۆيزا مەرزىمى اياقتالادى.
ۆالەريا تيان، جولاۋشى:
- قىتايدان قازاقستانعا قاتىنايتىن رەيسكە بيلەت باعاسىن تىم كوتەرىپ جىبەردى. سول سەبەپتەن وڭتۇستىك كورەياعا ۇشۋعا تۋرا كەلدى. الماتىدان ءارى قاراي قىزىلورداعا بارۋىم كەرەك. الايدا اۋە قاتىناسى توقتاپ، پويىز بەن اۆتوبۋس جۇرمەيتىندىكتەن، قالاي جەتەرىمدى بىلمەي تۇرمىن.
الەكساندر شپەيت بولسا سوڭعى ساپارىنا اتاندى. ول اسان قالاسىندا تۋبەركۋليەزدەن قايتىس بولعان. تۋىستارى ەمىن تولەي الماعاندىقتان، ەلشىلىك قىزمەتكەرلەرى اۋرۋحاناعا شىعىنىن وتەپ، كرەماتسياسىن تولەگەن قوعامدىق ۇيىمدى تاپتى. بۇل وڭتۇستىك كورەيادا قايتىس بولعان ەكىنشى ازاماتىمىز. جاقىندا تسيرروزدان پيەتر تە دۇنيە وزعان. ديپلوماتتارىمىز ونى كرەماتسيالاۋ جانە كۇلىن اقتوبەگە اپارۋ تۋرالى كەلىستى.
سونداي- اق، سەۋلدەن الماتىعا قايىرىمدىلىق كومەك تە جەتكىزىلدى. جەرگىلىكتى ءبىر كومپانيا كوروناۆيرۋستى انىقتايتىن تەستتەردى جونەلتتى.
كيم كۆان بوم، كومپانيا ديرەكتورى:
- قازاقستان ۇكىمەتىمەن ەكى مىڭ تەستتى تەگىن وتكىزۋ تۋرالى كەلىستىك. ونىڭ ءبىر مىڭى كورەيا ۇكىمەتىنىڭ كومەگى رەتىندە الماتىدا قولدانىلعان. قالعانىن كومپانيامىز ساتىپ الىپ، قازاقستان ۇكىمەتى بەلگىلەگەن مەملەكەتتىك اۋرۋحاناعا رەاگەنتتەر تۇرىندە تاپسىردىق. ىندەت ءورشىپ تۇرعان كەزدە دە ەلدەرىمىز اراسىنداعى ىنتىماقتاستىق جالعاسىپ كەلەدى. جاقىندا ديپلوماتتارىمىز سەۋل مەن نۇر- سۇلتان دارىگەرلەرى اراسىندا بەينەكونفەرەنسيا ۇيىمداستىردى.
www.24.kz