شىعىس قازاقستانداعى تۇرعىنداردىڭ ءجۇرىپ- تۇرۋى تاق جانە جۇپ ساندارعا بايلانىستى
سەنبى، جەكسەنبى كۇندەرى تۇرعىنداردىڭ جەكە كولىكپەن قاتىناۋىنا تىيىم سالىندى. ال جۇمىس كۇندەرى جەرگىلىكتى حالىقتىڭ ءجۇرىپ تۇرۋى تاق جانە جۇپ ساندارعا بايلانىستى. قازىر وبلىستىڭ باستى ەكى قالاسى - وسكەمەن مەن سەمەيدەگى كولىك قوزعالىسى دا تۇرعىنداردىڭ ءجۇرىپ تۇرۋى دا تاق جانە جۇپ ساندار ۇعىمىمەن تىكەلەي بايلانىستى بولىپ تۇر.
شەتتەن كىرىپ- شىعۋدى شەكتەۋ ءۇشىن وڭىردە 15 بلوك پوست قويىلدى. سونىڭ جەتەۋى - وسكەمەندە. وسكەمەن شەمونايحا باعىتىنداعى بلوكپوستتا تەمىردەي ءتارتىپ ورناعان. بارلىعى پوليتسيا قىزمەتكەرلەرىنىڭ، اسكەريلەردىڭ، دارىگەر مامانداردىڭ ءجىتى نازارىندا. بۇگىن- ەرتەڭ، ياعني سەنبى، جەكسەنبى كۇندەرى جانە مەرەكە كۇندەرى جەكە كولىكتى پايدالانۋعا تىيىم سالىنىپ وتىر. سوندىقتان بۇگىن قالاداعى كورىنىس وسىنداي. ادەتتە ءارى- بەرى اعىلعان كولىك جوق. ارتىق اۋىز ءجۇرىس جوق. قاربالاس تا جوق.
دەگەنمەن بۇل تۋرا وسىلاي جالعاسا بەرمەيدى ارينە، ءساۋىردىڭ التىسىنان باستاپ جوعارىدا ايتقان تاق جانە جۇپ ساندار ۇعىمىن ءجيى ەسكە الاتىن بولامىز. كولىكتىڭ تىركەۋ ءنومىرى تاقپەن اياقتالاتىندار كۇنتىزبەنىڭ تاق كۇندەرى، جۇپ جانە نولمەن اياقتالاتىندار جۇپ كۇندەرى عانا جۇرەدى. ونىڭ ۇستىنە نە ءۇشىن، قايدا بارا جاتقانىن ءتۇسىندىرىپ، ناقتى دالەلمەن جەتكىزۋى ءتيىس. جۇمىس ىستەيتىندەر جۇمىس ورىندارى جانە جەرگىلىكتى اكىمدىك بەرگەن رۇقسات قاعازدارىن دا قولدانۋ كەرەك. ۇيدە قالعان تۇرعىندار دا وسىلاي قاتىنايدى. ءبىر وتباسىنا اپتاسىنا 3 رەت قانا ازىق- تۇلىككە، ءدارىحانا سىندى كەرەكتى ورىندارعا بارۋعا رۇقسات بەرەتىن ءبىر كارتوچكا بەرىلەدى. اق ءتۇسى تاق كۇنگە، جاسىل ءتۇسى جۇپ كۇنگە جارامدى. كەرەك جاعدايدا كولىكتى تىركەۋ نومىرىمەن سايكەس ءتۇستى الۋعا بولادى.
ال ءبىز جۇمىسقا قالا اكىمدىگى بەرگەن رۇقساتناما مۇمكىندىگىن پايدالانىپ جەتتىك. تاعى ءبىر ايتاتىنىم، بۇگىننەن باستاپ مەملەكەتتىك شەكارامىزدىڭ كەيبىر ۋچاسكەلەرىندەگى اۆتوموبيلدىك وتكىزۋ پۋنكتەرى ۋاقىتشا جابىلدى. سونىڭ ىشىندە ءبىزدىڭ وبلىسىمىزداعى باقتى مەن مايقاپشاعاي وتكىزۋ پۋنكتى دە ۋاقىتشا جابىلىپ وتىر. جالپى ەندى وسى قابىلدانعان شەشىمدەردىڭ ماقساتى ءبىر - ولكەدە كوروناۆيرۋس ىندەتىن ورشىتپەۋ.
www.24.kz