كارانتين ناتيجەسى: رەسپۋبليكا بويىنشا ۆيرۋس جۇقتىرعان ناۋقاستار ءوسىمى تومەندەدى

نۇر- سۇلتان. قازاقپارات – ق ر دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس ينفەكتسياسىمەن كۇرەس بويىنشا ەلىمىزدە ەنگىزىلگەن كارانتين شارالارىنىڭ ناتيجەسىن ايتىپ بەردى، دەپ حابارلايدى قازاقپارات ءتىلشىسى.

«وتكەن اپتادا ناۋقاستار سانىنىڭ كوبەيۋى كۇن سايىن 30-50 پايىز ارالىعىندا قۇبىلىپ تۇراتىن. ەل بويىنشا كارانتين شارالارى كۇشەيتىلگەن سوڭ، رەسپۋبليكا بويىنشا جالپى ءوسىم 9-12 پايىزعا دەيىن تومەندەدى. بۇل ۇكىمەت پەن ءوڭىر اكىمدەرى جۇرگىزگەن كارانتين شارالارىنىڭ تيىمدىلىگىن كورسەتەدى» ، - دەدى مينيستر ورتالىق كوممۋنيكاتسيالار قىزمەتىندەگى بريفينگتە.

مينيستر اپتا باسىنان بەرى الماتى مەن نۇر- سۇلتاندا كارانتين شارالارى كۇشەيتىلىپ، جۇمىسسىز اپتا جاريالانعانىن ەسكە سالدى.

«اۋرۋ جۇقتىرۋ جاعدايلارىنىڭ 30 پايىزى ەڭبەك ۇجىمدارىندا تىركەلگەنىن ايتقان ەدىك. جۇمىس ورىندارى ينفەكسيانىڭ تارالۋىنا ايتارلىقتاي ىقپال ەتتى. 28 - ناۋرىزدان باستاپ، نۇر- سۇلتاندا ناۋقاستار ءوسىمى كۇنىنە 60 جاعدايدان 15 جاعدايعا دەيىن تومەندەدى. الماتىدا 8 دەن 2 جاعدايعا دەيىن ازايدى. مۇنىڭ بارلىعى - كارانتين مەن وقشاۋلانۋدىڭ ءتيىمدى بولۋىنان. ت ج بويىنشا مەملەكەتتىك كوميسسيا شەشىمىمەن نۇر- سۇلتان مەن الماتىداعى جۇمىستى توقتاتۋ تاعى ءبىر اپتاعا سوزىلدى. بۇل ەكىنشى اپتا ەڭبەك ۇجىمدارىنداعى، قوعامدىق ورىندارداعى بايلانىستى ازايتىپ، ينكۋباتسيالىق كەزەڭدە جۇرگەن ناۋقاستاردى انىقتاۋعا مۇمكىندىك بەرەدى» ، - دەدى ەلجان ءبىرتانوۆ.