تالدىقورعاندا اسا قاۋىپتى قىلمىسكەردى ۇستاعان ەكى جىگىت ماراپاتتالدى

تالدىقورعان. قازاقپارات - قىلمىسقا قارسى كۇرەستە باتىلدىق تانىتقانى ءۇشىن تالدىقورعان قالاسىنىڭ ەكى تۇرعىنى ماراپاتتالدى، دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ەكى جاس جىگىت ايەل ادامعا قاستاندىق جاساعان قىلمىسكەردى قۇرىقتاعان.

«ساعات 18.00 دەر شاماسىندا وبلىس ورتالىعىنىڭ ساياباعىندا بەلگىسىز بىرەۋ جاياۋ جۇرگىنشى جولىمەن كەلە جاتقان ايەل ادامعا شابۋىل جاساپ، ونى تۇنشىقتىرا باستاعان. وسىلايشا، قاسكۇنەم ازاماتشانىڭ سومكەسىن تارتىپ الىپ، جاسىرىنباق بولعان ساتىندە بۇل جاعدايدىڭ كورىپ قالعان ەكى ازامات وزدەرىمەن بىرگە كەلە جاتقان بويجەتكەندەردى ازاماتشانىڭ جانىنا قالدىرىپ، كۇدىكتىنىڭ سوڭىنا تۇسكەن. ولار قىلمىسكەردى قۋىپ جەتىپ، پوليتسيا جاساعى كەلگەنشە ۇستاپ تۇرعان. ناتيجەسىندە كۇدىكتى پوليتسيا بولىمىنە جەتكىزىلىپ، جابىرلەنۋشى ءوزىن قورعاعان ازاماتتارعا العىس ءبىلدىردى»،- دەدى تالدىقورعان قالالىق پوليتسيا باسقارماسى باستىعىنىڭ ورىنباسارى ەرلان وتەگەنوۆ.

سونىمەن قاتار، ءتارتىپ ساقشىلارى و. ەسىمدى كۇدىكتى ازاماتتىڭ 1984-جىلعى تالدىقورعان قالاسىنىڭ تۇرعىنى ەكەنىن، بۇرىن دا بىرنەشە رەت ۇرلىق، توناۋ جانە قاراقشىلىق شابۋىل جاساعانى ءۇشىن سوتتالعانىن جانە قىلمىس جاساۋ كەزىندە ماس كۇيىندە بولعانىن انىقتادى.

«قازىرگى ۋاقىتتا تالدىقورعان قالالىق سوتى ۇستالعان ازاماتتى اسا قاۋىپتى رەتسيديۆيست دەپ تانىپ، وعان قاتىستى قىلمىستىق- اتقارۋ جۇيەسىنىڭ توتەنشە قاۋىپسىز مەكەمەلەرىندە جازاسىن وتەۋمەن 3 جىلعا باس بوستاندىعىنان ايىرۋ تۋرالى ۇكىم شىعاردى»،- دەپ تولىقتىردى ەرلان وتەگەنوۆ.

ەرىكتى 18 جاستاعى تالدىقورعان قالاسىنىڭ تۇرعىندارى - نوسكو دميتري اندرەيەۆيچ پەن سەرگەي نابيرۋحين الماتى وبلىسى پوليتسيا دەپارتامەنتى باستىعىنىڭ بۇيرىعىمەن باتىلدىق پەن ەرلىك تانىتقاندارى ءۇشىن ماراپاتتالدى. اسا قاۋىپتى قىلمىسكەردى قۇرىقتاۋداعى ەڭبەكتەرى ءۇشىن ولارعا سالتاناتتى تۇردە العىس حاتتار مەن باعالى سىيلىقتار تاپسىرىلدى.