قازاقستاندا ت ج ءتارتىبىن قامتاماسىز ەتۋگە قانشا مىڭ سارباز جۇمىلدىرىلدى
«ازاماتتار تۇرعىلىقتى جەرى بويىنشا شاقىرىلادى. ءار كەش سايىن ۇيىنە قايتادى. اسكەري قىزمەتكە جۇمىسقا بارعانداي تاڭەرتەڭ كەلەدى. ايماقتاردا ارناۋلى جيىن باس شتابتىڭ كەلىسىمىمەن جەرگىلىكتى اتقارۋشى ورگاننىڭ شەشىمى بويىنشا كەزەڭ-كەزەڭىمەن وتكىزىلەدى. ياعني ءبىر ۋاقىتتا بولمايدى. ارناۋلى جيىنعا شاقىرتۋدى قابىل الۋ - كۇردەلى كەزەڭدە پاتريوتتىقتى تانىتا ءبىلۋدىڭ مۇمكىندىگى. قارۋلى كۇشتەر ءبىرىنشى كۇننەن باستاپ ءارتۇرلى مىندەتتەردى ورىنداۋعا اتسالىسىپ كەلەدى. قازىردىڭ وزىندە ەلدەگى 24 قالادا 10 مىڭعا تارتا اسكەري قىزمەتكەر جۇمىلدىرىلعان. ولار پاترۋلدەۋ، دەزينفەكتسيالاۋ جانە تاعى باسقا قاجەتتى شارالاردىڭ ءبارىن اتقارىپ كەلەدى. بۇگىنگى كۇنى الەۋمەتتىك ماڭىزى بار 2 مىڭعا تارتا نىسان تازارتىلدى. رادياتسيالىق، حيميالىق جانە بيولوگيالىق قاۋىپسىزدىككە بايلانىستى اسكەري قىزمەتشىلەر ازاماتتىق قورعانىس سالاسىنا بەيىمدەلىپ، مىندەتتەرىن اتقارۋدا»، - دەدى نۇرلان ەرمەكبايەۆ و ك ق-دا وتكەن باسپا ءسوز ءماسليحاتىندا.
ءمينيستردىڭ ايتۋىنشا، قورعانىس سالاسى دەنساۋلىق ساقتاۋ مينيسترلىگىنە كومەك كورسەتىپ، قازىر الماتى وبلىسىندا اسكەري-دالالىق اۋرۋحانا ورنالاستىرىلعان.
«اسكەري- كولىكتىك اۆياتسيا ازاماتتاردى شەتەلدەن ەۆاكۋاتسيالاۋ جۇمىستارىن جۇرگىزىپ جاتىر. جالپى وڭىرلىك اسكەردى ارناۋلى جيىنعا شاقىرۋ سيپاتى جاعىنان جەڭىل ءارى شەكتەۋلى بولادى. ازاماتتار ءۇشىن ەشقانداي ىڭعايسىزدىق تۋىندامايدى»، - دەدى قورعانىس ءمينيسترى.
ەسكە سالا كەتسەك، كەشە قازاقستان پرەزيدەنتى اسكەري مىندەتتىلەردى ارناۋلى جيىنعا شاقىرۋ تۋرالى جارلىق شىعارعان ەدى. اتاپ ايتقاندا قازاقستاندىقتار جەكەلەگەن وڭىرلەردە مەديتسينالىق قىزمەت، تاسقىنمەن كۇرەس جانە دەزينفەكسيا جۇمىستارىنا شاقىرىلادى.
اۆتور: ايان بەكەن ۇلى