العاشقى كەزدە قورقىپ جىلاعاندار بولدى - دارىگەرلەر كوروناۆيرۋسپەن قالاي كۇرەسىپ جاتىر
اۋرۋحانا ديرەكتورىنىڭ ورىنباسارى ناديا ەرعاليەۆا كوروناۆيرۋسپەن كۇرەسىپ جاتقان دارىگەرلەر تۋرالى ايتىپ بەردى، دەپ حابارلايدى قازاقپارات.
اۋرۋحانا ديرەكتورىنىڭ ورىنباسارى ناديا ەرعاليەۆانىڭ ايتۋىنشا، مۇنداعى مەديتسينالىق قىزمەتكەرلەر كۇن سايىن ناۋقاستاردى ەمدەپ، ولارعا قاجەتتى كۇتىم كورسەتۋدە. دارىگەرلەر، مەدبيكەلەر مەن فەلدشەرلەر، تازالىقشىلار 27 - ناۋرىزدان بەرى اۋرۋحانادان شىقپاي، تاۋلىك بويى جۇمىس ىستەۋدە. «ينفەكتسيالىق بولىمشەدە 6 دارىگەر- ينفەكتسيونيست، 3 رەانيماتولوگ بار. ءبارىنىڭ دە تاجىريبەسى مول. قازىر 9 دارىگەردىڭ ءبارى تاۋلىك بويى جۇمىس ىستەۋدە. اۋرۋحانا اكىمشىلىگى حيرۋرگيا جانە تەراپيا بولىمشەلەرىن بوساتىپ، دەمالىس بولمەسى رەتىندە جاساقتاپ بەردى. قازىر ءبىزدىڭ دارىگەرلەر، مەدبيكەلەر مەن لابورانتتار، تازالىقشىلار ءۇشىن قولايلى جاعداي جاسالدى. ولار كۇنىنە 6 رەت تاماقتانادى. كۇنىنە بىرنەشە رەت دۋشقا ءتۇسىپ، كيىمدەرىن اۋىستىرادى» - دەيدى ناديا ەرعاليەۆا. ونىڭ ايتۋىنشا، دارىگەرلەر ناۋقاستارعا بارماس بۇرىن ارنايى كيىم كيەدى. ونىڭ ىشىندە حيرۋرگيالىق شالبار، قورعانىش كوستيۋمى، كوزىلدىرىك، رەسپيراتور، ەكى قولعاپ، رەزەڭكە اياق كيىم، باحيلا بار.
ناۋقاستار جاتقان بولىمدە مۇنىڭ بىردە ءبىرىن شەشۋگە بولمايدى. دەمەك، سۋ ءىشۋ دە، ءتىپتى دارەتحاناعا بارۋ دا مۇمكىن ەمەس. ال، ناۋقاستاردىڭ جاعدايىن تەكسەرىپ، باقىلاۋ جۇرگىزگەن سوڭ مەديتسينالىق قىزمەتكەرلەردىڭ ارنايى كيىمدەرى جويىلادى. وزدەرى دۋش تۇسكە، بەتى- قولىن وڭدەۋدەن وتكىزەدى. مۇنىڭ ءبارى تازالىق ايماعىندا جۇرگىزىلەدى. ال، جۇمىس ىستەۋ ايماعىندا ءار ناۋقاستىڭ قىزۋى، جالپى جاعدايى تۋرالى مالىمەتتەر ەلەكتروندى جۋرنالعا جازىلادى. ءدال وسىلاي اۋىسىم سايىن قايتالانادى. دەمالىس ايماعىنداعى جاتىن بولمەلەرى قاجەتتى جيھازبەن جابدىقتالعان.
«العاشقى كۇنى وڭاي بولعان جوق. ويتكەنى، مەديتسينالىق قىزمەتكەرلەردىڭ ەشقايسىسى مۇنداي ينفەكتسيا جۇقتىرعاندارمەن جۇمىس ىستەمەگەن. بارىمىزدە قورقىنىش بولىپ، ارامىزدا كوز جاسىنا ەرىك بەرگەندەر بولدى. ارنايى كيىممەن ءجۇرۋ قيىندىق تۋدىردى. ىستىق، قاپىرىق اۋادا جۇرگەندەيسىڭ. ءار ءسات سايىن ۆيرۋس جۇعا ما دەگەن قورقىنىش تا بار. كەيىن وبلىستىق دەنساۋلىق ساقتاۋ باسقارماسى تاجىريبەلى 2 پسيحولوگتى جىبەرىپ، ولار مەديتسينالىق قىزمەتكەرلەرمەن، ناۋقاستارمەن جۇمىس جۇرگىزدى. ءبىزدىڭ ۇجىم 27 - ناۋرىزدان بەرى جاڭا رەجيممەن جۇمىس ىستەۋگە بەيىمدەلدى. قازىر جۇمىسىمىز قالىپقا ءتۇستى» - دەيدى ناديا ەرعاليەۆا. سونداي- اق، ول دارىگەرلەردىڭ 27 -ناۋرىزدان بەرى اۋرۋحانادان شىقپاعانىنا توقتالدى.
« ءبىز ازىرگە ينفەكتسيالىق ستاتسيوناردان شىعا المايمىز. ويتكەنى، دەرتكە شالدىققاندارمەن تىعىز بايلانىستا جۇمىس ىستەيمىز. اتىراۋدا ىندەتتىڭ العاشقى وقيعاسى تىركەلگەن كۇننەن بەرى وسىندامىز. تۋىستارىمىزبەن تەلەفون ارقىلى بايلانىستامىز، - دەدى ناديا ەرعاليەۆا. قازىر بۇل اۋرۋحانانىڭ ينفەكتسيالىق ستاتسيونارىندا Covid-19 ىندەتىن جۇقتىرعان 18 ناۋقاس ەمدەلۋدە.