كوروناۆيرۋس بويىنشا ساۋالناما الۋ كەزىندە فوتو- بەينە ءتۇسىرىلىم جۇرگىزۋگە تىيىم سالىنادى

نۇر- سۇلتان. قازاقپارات - قازاقستان حالقىنىڭ قاۋىپسىزدىگىن قامتاماسىز ەتۋ جونىندەگى شارالار تۋرالى باس مەملەكەتتىك سانيتاريالىق دارىگەردىڭ جاڭا قاۋلىسى جاريالاندى، دەپ حابارلايدى قازاقپارات ءتىلشىسى.

قاۋلىعا سايكەس، ق ر س ءى م شاقىرۋىمەن قازاقستانعا كەلەتىن شەت مەملەكەتتەردىڭ جانە حالىقارالىق ۇيىمداردىڭ رەسمي دەلەگاتسيا مۇشەلەرى، ق ر- دا اككرەديتتەلگەن ديپلوماتيالىق وكىلدىكتەردىڭ، كونسۋلدىق مەكەمەلەردىڭ جانە حالىقارالىق ۇيىم وكىلدىكتەرىنىڭ قىزمەتكەرلەرى جانە ولاردىڭ وتباسى مۇشەلەرى، اۋە كومپانيالاردىڭ ۇشقىشتارى جانە لوكوموتيۆ بريگادالارىنىڭ مۇشەلەرى، تەمىرجول كولىگىندەگى تاسىمالداۋ قىزمەتىمەن بايلانىستى ادامدار، جۇكتەردى حالىقارالىق اۆتوموبيلمەن تاسىمالداۋدى جۇزەگە اسىراتىن جۇرگىزۋشىلەر، سونداي- اق ەاەو ەلدەرىنەن جانە وزبەكستاننان قازاقستان ارقىلى تەمىرجول كولىگىندە جانە اۆتووتپە جولدارىندا وتكىزۋ پۋنكتتەرى ارقىلى كەلگەن ادامداردى قوسپاعاندا قازاقستانعا شەتەلدەن كەلەتىن بارلىق ادامدار COVID-19 عا زەرتحانالىق تەكسەرۋ جۇرگىزۋ ءۇشىن كارانتيندىك ستاتسيوناردا 2 تاۋلىككە وقشاۋلانادى. «COVID-19 اۋرۋىن جوققا شىعارمايتىن بەلگىلەرى بار ادامدار كارانتيندىك ستاتسيونارعا ەمەس، پروۆيزورلىق ستاتسيونارعا جاتقىزىلادى. COVID-19-عا زەرتحانالىق تەكسەرۋ ناتيجەلەرىن العاننان كەيىن وڭ ناتيجەلى ادامدار ەمدەۋ ءۇشىن ينفەكتسيالىق ستاتسيونارعا اۋىستىرىلادى. COVID - 19-عا تەرىس ناتيجەلى ادامدار 12 تاۋلىك بويى ءۇي كارانتينىندە وقشاۋلانادى. ۇيدە وقشاۋلاۋعا جاعداي بولماعان كەزدە جەرگىلىكتى اتقارۋشى ورگاندار ايقىنداعان ءۇي- جايلاردا وقشاۋلاۋ ۇسىنىلادى»،- دەلىنگەن قاۋلىدا. سونىمەن قاتار قازاقستانعا شەتەلدەن كەلگەن ديپلوماتيالىق وكىلدىكتەردىڭ، كونسۋلدىق مەكەمەلەر مەن حالىقارالىق ۇيىم وكىلدىكتەرىنىڭ قىزمەتكەرلەرى جانە ولاردىڭ وتباسى مۇشەلەرى COVID-19 عا زەرتحانالىق تەكسەرۋگە جانە 14 تاۋلىك بويى ۇيدە ءوزىن- ءوزى وقشاۋلاۋعا (ءۇي كارانتينى) جاتادى.

«شەتەلدەن كەلگەن اۋە كومپانيالاردىڭ ۇشقىشتارى مەن لوكوموتيۆ بريگادالارىنىڭ مۇشەلەرى، تەمىرجول كولىگىندە تاسىمالداۋ قىزمەتىمەن بايلانىستى ادامدار جانە جۇكتەردى حالىقارالىق اۆتوموبيلمەن تاسىمالداۋدى جۇزەگە اسىراتىن جۇرگىزۋشىلەر قوڭىراۋ شالۋ ارقىلى (مۇمكىندىگىنشە ۆيدەو قوڭىراۋ شالۋ) تۇرعىلىقتى (كەلگەن) جەرى بويىنشا مەديتسينالىق باقىلاۋعا جاتادى. ە ا ە و ەلدەرىنەن جانە وزبەكستان رەسپۋبليكاسىنان قازاقستان رەسپۋبليكاسىنىڭ مەملەكەتتىك شەكاراسى ارقىلى تەمىرجول كولىگىندە جانە اۆتووتپە جولدارىندا وتكىزۋ پۋنكتتەرى ارقىلى كەلگەن ادامدار 14 تاۋلىك بويى ۇيدە ء(ۇي كارانتينى) وقشاۋلانادى»،- دەلىنگەن قاۋلىدا.

قاۋلىعا سايكەس دەنساۋلىق ساقتاۋ ۇيىمدارىندا، جەرگىلىكتى اتقارۋشى ورگاندار كارانتين ءۇشىن ايقىنداعان ءۇي- جايلاردا، سونداي- اق مەديتسينا قىزمەتكەرلەرى ۇيدە مەديتسينالىق كومەك كورسەتۋ، وشاقتا ەپيدەميولوگيالىق تەرگەپ- تەكسەرۋ جۇرگىزۋ، ناۋقاستاردان جانە بايلانىستا بولعان ادامداردان سۇراۋ جانە ساۋالناما الۋ كەزىندە اۋديو، فوتو جانە بەينە ءتۇسىرىلىم جۇرگىزۋگە تىيىم سالىندى. باس مەملەكەتتىك سانيتاريالىق دارىگەردىڭ جاڭا قاۋلىسىنىڭ تولىق ءماتىنىن مىنا سىلتەمەدەن وقۋعا بولادى.