ەلىمىزدە توتەنشە جاعداي كەزىندە الەۋمەتتىك كومەكتىڭ كولەمى ارتتى

نۇر- سۇلتان. قازاقپارات - قازاقستاندا توتەنشە جاعداي رەجيمى كەزەڭىنە مەملەكەتتىك الەۋمەتتىك كومەكتىڭ كولەمى ارتتى. بۇل جونىندە ق ر ەڭبەك جانە حالىقتى الەۋمەتتىك قورعاۋ مينيتسرلىگىنە سىلتەمە جاساپ قازاقپارات حابارلايدى.

مەملەكەت باسشىسىنىڭ تاپسىرماسى بويىنشا ق ر ەڭبەك جانە حالىقتى الەۋمەتتىك قورعاۋ مينيسترلىگى توتەنشە جاعداي كەزەڭىنە ازىق- تۇلىك پەن تۇرمىستىق جيىنتىعىن الۋشىلاردىڭ ءتىزىمىن كەڭەيتتى. الەۋمەتتىك- ەڭبەك سالاسىنداعى جەكەلەگەن مەملەكەتتىك قىزمەتتەر كورسەتۋ ەرەجەلەرىنە جانە توتەنشە جاعداي كەزەڭىندە حالىقتىڭ جەكەلەگەن ساناتتارى ءۇشىن ازىق- تۇلىك پەن تۇرمىستىق جيىنتىقتارىمەن قامتاماسىز ەتۋ قاعيدالارىنا قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن ءتيىستى وزگەرىستەر ەنگىزىلدى. اتاپ ايتقاندا، جوعارىدا اتالعان تىزىمگە بارلىق جاستاعى III توپتاعى مۇگەدەكتەر مەن جۇمىسسىز ازاماتتار قوسىمشا ەنگىزىلدى. ەندى ازىق- تۇلىك پەن تۇرمىستىق جيىنتىقتاردى ازاماتتاردىڭ كەلەسى ساناتتارى الاتىن بولادى:

- اتاۋلى الەۋمەتتىك كومەك الۋشىلار قاتارىنان 6 جاستان 18 جاسقا دەيىنگى بالالار؛

- مەديتسينالىق- الەۋمەتتىك مەكەمەلەردە تۇراقتى تۇراتىن مۇگەدەكتەردى قوسپاعاندا، 16 جاسقا دەيىنگى مۇگەدەك بالالار؛

- مەديتسينالىق- الەۋمەتتىك مەكەمەلەردە تۇراقتى تۇراتىن مۇگەدەكتەردى قوسپاعاندا، بارلىق جاستاعى I ، II، III توپتاعى مۇگەدەكتەر؛

- مۇگەدەك بالانى تاربيەلەۋشى؛

- جۇمىسپەن قامتۋ ماسەلەلەرى بويىنشا جەرگىلىكتى ورگاندا تىركەلگەن جۇمىسسىز ازاماتتار. بۇگىنگى تاڭدا توتەنشە جاعداي رەجيمى ەنگىزىلگەن ساتتەن باستاپ شامامەن 180 مىڭ ادام ازىق- تۇلىك جانە تۇرمىستىق جيناقتارمەن قامتاماسىز ەتىلگەن.

وسى كومەك ءتۇرىن الۋشىلاردىڭ ءتىزىمىن جەرگىلىكتى اتقارۋشى ورگاندار جاسايدى. سونىمەن قاتار، قازاقستاندا ت ج رەجيمىن ەنگىزۋگە بايلانىستى تىكەلەي قارىم- قاتىناستى بولدىرماۋ ماقساتىندا اتاۋلى الەۋمەتتىك كومەك الۋشىلارعا جاردەماقى تاعايىنداۋدى اۆتوماتتى تۇردە ۇزارتادى. ال ءبىرىنشى رەت ءوتىنىش بىلدىرگەن جاعدايدا ۋچاسكەلىك كوميسسيا بايلانىس قۇرىلعىلارى ارقىلى تەكسەرۋ جۇرگىزەدى. قىزمەت كورسەتۋ ناتيجەسى تۋرالى اقپاراتتى ازامات پوشتا نەمەسە مەسسەندجەر ارقىلى الادى. سونداي- اق بۇيرىقتا توتەنشە جاعداي كەزەڭىندە مەديتسينالىق- الەۋمەتتىك ساراپتامادان ءوتۋ «ەلەكتروندىق ۇكىمەت» پورتالى ارقىلى جۇزەگە اسىرىلاتىنى كورسەتىلگەن.

تۇزەتۋلەرگە سايكەس، ەگەر قايتا تەكسەرۋ مەرزىمى ءبىر اي ىشىندە نەمەسە توتەنشە جاعداي كەزەڭىندە تۇسسە، وندا مۇگەدەكتىكتى نەمەسە ەڭبەك ەتۋ قابىلەتىنەن ايىرىلۋ دارەجەسىن بەلگىلەۋ مەرزىمى توتەنشە جاعداي رەجيمى كەزەڭىنە اۆتوماتتى تۇردە ۇزارتىلادى. بۇل رەتتە توتەنشە جاعداي كەزەڭىندە مۇگەدەكتىگى بويىنشا جاردەماقى تولەۋ بۇرىن بەلگىلەنگەن توپ جانە جالپى ەڭبەك ەتۋ قابىلەتىنەن ايرىلۋ دارەجەسى بويىنشا جۇزەگە اسىرىلادى.