قازاقستاندا پروگرامميستەردى دايىندايتىن ونلاين- مەكتەپ اشىلادى
«استانا» حالىقارالىق قارجى ورتالىعى بىلتىردان باستاپ ا ح ق و بيۋروسى نەگىزىندە باعدارلاماشى ينجەنەرلەر مەن ازىرلەۋشىلەرگە ارنالعان مامانداندىرىلعان باعدارلامانى جۇزەگە اسىرىپ وتىر. مۇنداعى باستى ماقسات - حالىقارالىق سەرتيفيكاتتاۋ باعدارلامالارى مەن ءبىلىم بەرۋ تەحنولوگيالارى ارقىلى بىلىكتى مامان دايىنداۋ. «QWANT جوعارى تەحنولوگيا مەكتەبى ەۋروپا مەن ا ق ش- تىڭ ەڭ ۇزدىك باعدارلامالاۋ مەكتەپتەرىنىڭ الدىڭعى قاتارلى تاجىريبەلەرىن قامتيتىن كرەمني القابىنىڭ سيفرلىق پلاتفورماسى - QWASAR ارقىلى بىلىكتىلىك ارتتىرۋ مەن سۇرانىسقا يە كاسىپ مەڭگەرۋگە نيەتتى بارلىق ازاماتقا مۇمكىندىك ۇسىنادى. QWANT- تىڭ وقىتۋ ادىستەمەسى تاجىريبەلىك ءبىلىم الۋ، ءوزارا باعالاۋ، جوبالىق باسقارۋ، گەيميفيكاتسيا جانە رولدىك مودەلدەۋ پرينتسيپتەرىنە نەگىزدەلگەن. وقۋ پروتسەسى جۇمىس بارىسىنا بارىنشا جاقىن ورتا قالىپتاستىرا وتىرىپ قۇرىلعان. ال باعدارلاماعا قاتىسۋشىلار بەرىلگەن تاپسىرمانى جەكەلەي دە، توپپەن دە ورىنداي وتىرىپ كۇن سايىن ماشىقتارىن شىڭداي تۇسەدى. سونىمەن قاتار وقۋ بارىسىندا باعدارلامالاۋ تىلىنە تەرەڭنەن بويلاي وتىرىپ، ءاربىر قاتىسۋشى اۆتوماتتى جۇيە ارقىلى ءوز ارىپتەستەرىنە باعا بەرىپ، ۇيرەتە الادى» ، - دەپ حاباردايدى ا ح ق و باسپا ءسوز قىزمەتىنەن.
QWANT جوباسىندا وقىتۋشىلار مەن لەكسيا جوق. جۇيەنىڭ ەرەكشەلىگى - كەڭ قامتىلۋى مەن قاشىقتان جۇمىس ىستەۋگە مۇمكىندىك بەرۋىندە. بۇل وقۋ پروتسەسىنىڭ ساپاسىن ساقتاي وتىرىپ بارىنشا كوپ كانديداتقا پايدالى ءبىلىم بەرۋگە مۇمكىندىك بەرەدى. 6 اي بويى QWANT باعدارلاماسى بويىنشا سەرتيفيكات الۋ ءۇشىن ىرىكتەۋدەن وتكەن كانديداتتار مىنا سالالاردا ءوز ماشىقتارىن دامىتادى: قولدانبالى باعدارلامالاۋدىڭ ينتەرفەيسى، جاساندى ينتەللەكتى تاجىريبەلىك باعدارلامالاۋ، ۆەب- ينفراقۇرىلىم، ماشينالىق وقۋ، ءموبيلدى قوسىمشا. ۇمىتكەرلەرگە تالاپتار نەگىزگى ەكى پارامەترمەن قويىلادى: باعدارلامالاۋ نەگىزدەرىن ءبىلۋ جانە اپتاسىنا 40 ساعاتتان ارتىق ۋاقىت بويى بەلسەندى وقۋعا ىنتاسىنىڭ بولۋى. اي ورتاسىندا باستالاتىن ءبىرىنشى وقۋ باعدارلاماسىنا ءوتىنىم قابىلداۋ 4 -ساۋىرگە دەيىن اشىق.
ايان بەكەن ۇلى
https://qwant.kz/