بريتاندىق دارىگەرلەر الدىمەن كىمدى قۇتقارۋ كەرەكتىگى تۋرالى نۇسقاۋ الدى

بريۋسسەل. قازاقپارات – ۇلى بريتانيانىڭ مەديتسينالىق قىزمەتكەرى كوروناۆيرۋس ينفەكسياسىن جۇقتىرعان پاتسيەنتتەر كوپ بولعان جاعدايدا ءبىرىنشى كەزەكتە كىمدى قۇتقارۋ كەرەكتىگى تۋرالى نۇسقاۋ الدى،

دەپ حابارلايدى قازاقپارات The Guardian گازەتىنە سىلتەمە جاساپ.

بريتاندىق مەديتسينالىق قاۋىمداستىق دارىگەرلەر ءۇشىن نۇسقاۋلىق دايىندادى، وعان سايكەس ءومىر ءسۇرۋ مۇمكىندىگى تومەن ەگدە ادامدارعا جاساندى تىنىس الۋ اپپاراتىن بەرۋدەن باس تارتۋى مۇمكىن، ويتكەنى ول اپپاراتتى جاس جانە دەنساۋلىعى جاقسى پاتسيەنتتەر ءۇشىن پايدالانادى. قۇجاتتا دارىگەرلەر ۇلتتىق دەنساۋلىق ساقتاۋ جۇيەسى پاتسيەنتتەر كوپ بولعان كەزدە ولاردىڭ ءومىرىن ساقتاپ قالۋ ءۇشىن ينتەنسيۆتى تەراپيانىڭ شەكتەۋلى رەسۋرستارىنا بايلانىستى اۋىر شەشىم قابىلداۋعا ءماجبۇر بولادى دەپ تۇسىندىرىلگەن.

ءبىرىنشى كەزەكتە قارت ادامدارعا جانە سوزىلمالى اۋرۋلارى بار ناۋقاستارعا قارقىندى تەراپيادان باس تارتۋعا بولادى. ولاردىڭ ءتىزىمى كورسەتىلمەگەن، باسىلىمنىڭ بولجاۋىنشا، ولار قانت ديابەتى، جۇرەك اۋرۋ، بۇيرەك اۋرۋ مەن سوزىلمالى وكپە اۋرۋىمەن اۋىراتىن ناۋقاستار. اۋىر ەتيكالىق ديلەمماعا تاپ بولعان ۇلى بريتانيانىڭ 240 مىڭ دارىگەرىنە كومەك كورسەتۋگە ارنالعان نۇسقاۋلىقتا دەنساۋلىق ساقتاۋ، كوممۋنالدىق قىزمەتتەر جانە تەلەكوممۋنيكاتسيا سياقتى تۇرمىستىق ماڭىزدى سالالاردا جۇمىس ىستەيتىن پاتسيەنتتەر قارقىندى تەراپيا بولىمشەلەرىنە ورنالاستىرۋ كەزىندە باسىمدىققا يە بولادى دەپ ايتىلعان.

ايتا كەتەيىك، بريتاندىق دەنساۋلىق ساقتاۋ جانە الەۋمەتتىك قورعاۋ مينيسترلىگىنىڭ رەسمي دەرەگىنە سايكەس 1- ساۋىردەگى جاعداي بويىنشا ۇلى بريتانيادا 29474 ادام كوروناۆيرۋس جۇقتىرعان، ونىڭ 2352- ءسى قايتىس بولعان.

اۆتور: اياۋلىم التىنبەك