قوستانايدا كوروناۆيرۋستىڭ تىركەلۋىن كۇتپەي سانيتارلىق باقىلاۋ كۇشەيتىلىپ جاتىر

نۇر- سۇلتان. قازاقپارات - قوستاناي قالاسى اكىمىنىڭ ورىنباسارى رۇستەم كاركەنوۆ وبلىس ورتالىعىندا قانداي جاعدايدا كارانتين جاريالانۋى مۇمكىن ەكەنىن ءتۇسىندىردى، دەپ حابارلايدى قازاقپارات ءتىلشىسى.

«قوستاناي قالاسىنداعى سانيتارلىق بەكەتتەر ادامداردىڭ ارى- بەرى جۇرۋىنە شەكتەۋ قويمايدى. قالادا كارانتين رەجىمىن جاريالاۋ ءۇشىن قالادا كوروناۆيرۋس جۇقتىرۋدىڭ بىرنەشە جاعدايى تىركەلۋى كەرەك. الايدا ۆيرۋستىڭ تىركەلۋىن كۇتپەي- اق سانيتارلىق باقىلاۋدى كۇشەيتكىمىز كەلەدى. وسى ماقساتتا قالانى اينالا بلوك بەكەتتەردى ورناتىپ جاتىرمىز»، - دەدى رۇستەم كاركەنوۆ ايماقتىق كوممۋنيكاتسيالىق قىزمەتىندە وتكەن باسپا ءسوز ءماسليحاتىندا.

قالا اكىمىنىڭ ورىنباسارى قوستانايدا ورناتىلاتىن 7 بلوك بەكەتتە ادامداردىڭ تەمپەراتۋراسى ولشەنەتىنىن ايتىپ ءوتتى.

«ازىرگە بىزدە تەپلوۆيزور جوق. ەندى عانا ساتىپ الىپ جاتىرمىز. ايتسە دە ءاربىر سانيتارلىق بەكەتتە تەمپەراتۋرا ازىرگە گرادۋسنيكتەرمەن ولشەنەدى. ەگەر ءاربىر ادام ءوزىنىڭ گرادۋسنيگىمەن قىزۋىن تەكسەرتكىسى كەلسە، ول ونى پايدالانا الادى. سونىمەن قاتار بلوك بەكەتتەردە ەلدەگى توتەنشە جاعدايلار كەزىندەگى شەكتەۋ شارالارى قاداعالانادى. اتاپ ايتقاندا ماسكا كيىپ ءجۇرۋ، 22.00-دەن كەيىن جۇرمەۋ سەكىلدى تالاپتار ساقتالادى»، - دەدى ول.

رۇستەم كاركەنوۆ سانيتارلىق تالاپتاردى بۇزعاندارعا اكىمشىلىك جاۋاپكەرشىلىك بارىن ەسكەرتتى. «ءبارى دە بۇل ءىستىڭ تۇرعىنداردىڭ اماندىعى ءۇشىن جاسالىپ جاتقانىن ءتۇسىنۋى كەرەك. وسىلايشا ءبىز قالادا كوروناۆيرۋس ينفەكسياسىنىڭ تىركەلۋىنە، جاپپاي تارالۋىنا شەكتەۋ قويا الامىز»، - دەدى ول.

ايتا كەتسەك بۇعان دەيىن قوستاناي قالاسى اكىمىنىڭ ورىنباسارى رۇستەم كاركەنوۆ بۇگىن ساعات تۇنگى وننان باستاپ قالاداعى ءۇش بلوك بەكەت جۇمىسىن باستايتىنىن ءمالىم ەتكەن ەدى.

اۆتور: ايان بەكەن ۇلى