ۇكىمەت داعدارىسقا قارسى ءبىرقاتار شارانى ىسكە اسىرادى - اسقار مامين
بۇل تۋرالى ۇكىمەت وتىرىسىندا پرەمەر-مينيستر اسقار مامين ءمالىم ەتتى، دەپ حابارلايدى قازاقپارات ءتىلشىسى.
«قازىرگى تاڭدا جاھاندىق داعدارىس بولىپ جاتىر. كوروناۆيرۋس پاندەمياسى مەن شيكىزات رەسۋرستارىنا سۇرانىستىڭ تومەندەۋى ەكونوميكالىق بەلسەندىلىكتىڭ كۇرت باسەڭدەۋىنە الىپ كەلدى. وسىنىڭ بارلىعى ەلىمىزدىڭ ەكونوميكاسىنىڭ دامۋىنا جانە جۇمىس ورىندارىنا، حالىقتىڭ تابىسى مەن ءال-اۋقاتىنا تەرىس اسەر ەتۋدە. وسىنداي كۇردەلى كەزەڭدە مەملەكەت باسشىسى قاسىم-جومارت كەمەل ۇلى توقايەۆ ارنايى مالىمدەمەسىندە الداعى قادامداردى انىقتاپ، قازىرگى ەكونوميكالىق جاعدايدا ازاماتتار مەن بيزنەستى قولداۋ بويىنشا ناقتى مىندەتتەردى ايقىندادى»، - دەدى پرەمەر-مينيستر.
بۇل تۇرعىدا اسقار مامين ۇكىمەت داعدارىسقا قارسى ءبىرقاتار شارالاردى ىسكە اسىراتىنىن اتاپ ءوتتى.
«بىرىنشىدەن، ءبىزدىڭ باستى مىندەتىمىز جۇمىسپەن قامتۋعا نەگىزدەلگەن. سوندىقتان جۇمىسپەن قامتۋدىڭ جاڭا جول كارتاسى قابىلداندى. ول الەۋمەتتىك-ينجەنەرلىك ينفراقۇرىلىم، تۇرعىن ءۇي-كوممۋنالدىق شارۋاشىلىق نىساندارىن جاڭعىرتۋ جانە دامىتۋ، ەلدى مەكەندەردى اباتتاندىرۋ ارقىلى حالىقتىڭ تۇرمىس ساپاسىن جاقسارتۋعا باعىتتالعان. جول كارتاسىنىڭ ءىس شارالارىنا قاجەتتى قارجى كولەمى 1 تريلليون تەڭگەگە ۇلعايتىلدى. بۇل 240 مىڭنان اسا جاڭا جۇمىس ورىنىن قۇرۋعا مۇمكىندىك بەرەدى. بۇعان جوبالار ىسكە اسىرىلاتىن كەزدە قۇرىلاتىن ۋاقىتشا جۇمىس ورىندارى عانا ەمەس، تۇراقتى جۇمىس ورىندارىن قۇرۋ دا كىرەدى»، - دەدى اسقار مامين.
وسى ورايدا ول جۇمىسپەن قامتۋ جول كارتاسىن ىسكە اسىرۋ ينفراقۇرىلىمدى جاڭعىرتۋ مەن ءتيىمدى اكتيۆتەردى قۇرۋدىڭ نەگىزى بولۋى ءتيىس ەكەنىن تاپسىردى. سەبەبى ولار بولاشاقتا دامۋدىڭ نەگىزىنە اينالادى.