توتەنشە جاعداي كەزەڭىندە سالىقتى ماجبۇرلەپ ءوندىرۋ توقتاتىلدى
بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«شاعىن جانە ورتا بيزنەستى ەڭبەكاقى تولەۋ قورىنان الىناتىن سالىق جانە الەۋمەتتىك تولەمدەردەن 6 ايعا، ياعني اعىمداعى جىلعى 1- قازانعا دەيىن بوساتۋ قاراستىرىلعان. بۇل شارا تۋريستىك قىزمەت، قوعامدىق تاماقتانۋ، قوناق ءۇي بيزنەسى سالالارىن، ءىرى ساۋدا وبەكتىلەرىن، ساۋدا ويىن-ساۋىق ورتالىقتارىن، كينوزالدار، تەاترلاردى، كورمەلەر مەن دەنە شىنىقتىرۋ-ساۋىقتىرۋ جانە سپورت عيماراتتارىن، كولىك قىزمەتتەرىن، كونسۋلتاتسيالىق قىزمەتتەر مەن اقپاراتتىق تەحنولوگيالاردى، تاماق ونىمدەرىن وتكىزۋ مەن ءدارىحانالاردى قوسپاعاندا ساۋدا سۋبەكتىلەرىن قامتيدى»، - دەدى مينيستر.
ونىڭ اتاپ وتۋىنشە، سالىقتىق اكىمشىلەندىرۋ بولىگىندە 2020-جىلدىڭ 1- ماۋسىمىنا دەيىن شاعىن جانە ورتا بيزنەس سۋبەكتىلەرى ءۇشىن بارلىق سالىقتار مەن بيۋجەتكە تولەنەتىن مىندەتتى تولەمدەردى جانە الەۋمەتتىك جارنالاردى تولەۋدى كەيىنگە قالدىرۋ شاراسى ەنگىزىلدى.
«بۇدان باسقا، توتەنشە جاعداي كەزىندە سالىقتىق تەكسەرۋلەر مەن سالىق، كەدەن جانە الەۋمەتتىك تولەمدەر بويىنشا بەرەشەكتى ماجبۇرلەپ ءوندىرۋ توقتاتىلدى. جالپى، جوعارىدا كورسەتىلگەن بارلىق شارالار 700 مىڭ سالىق تولەۋشىنى قامتيدى»، - دەدى رۋسلان دالەنوۆ.