مۇقتاج وقۋشىلاردىڭ بارلىعىنا كومپيۋتەر بەرىلمەك - ەلوردا
قالالىق ءبىلىم باسقارماسىنىڭ باسشىسى شولپان قادىروۆا بۇگىن اكىمدىكتە وتكەن بريفينگتە ءبىلىم وردالارىنىڭ وقۋشىلارى مەن ستۋدەنتتەرىنە قاشىقتىقتان وقىتۋدى ۇيىمداستىرۋ مەن وتكىزۋ ماسەلەلەرى بويىنشا ءبىلىم باسقارماسىنىڭ جانىنان فرونت-كەڭسە قۇرىلعانىن، ءار مەكتەپتە قاشىقتىقتان وقىتۋ بويىنشا ۇيلەستىرۋشى تاعايىندالعانىن جانە call- ورتالىق قوسىلعانىن ايتتى.
«16 - ناۋرىزدان باستاپ ءبىزدىڭ ج و و مەن كوللەدجدەر قاشىقتىقتان وقىتۋ فورماسىنا كوشتى. جۇمىس تولىقتاي رەتتەلگەن دەپ ايتۋعا بولادى. ستۋدەنتتەردىڭ بارلىعى قاجەتتى وقۋلىقتارمەن، ادىستەمەلىك قۇرالدارمەن قامتاماسىز ەتىلدى. 6 - ساۋىردەن باستاپ نۇر-سۇلتان قالاسىنىڭ مەكتەپتەرى قاشىقتىقتان وقىتۋ فورماسىنا كوشەدى. قاشىقتىقتان وقىتۋدى ۇيىمداستىرۋ جانە جۇرگىزۋ جۇمىستارىن ۇيلەستىرۋ ءۇشىن ءار مەكتەپتە تەحنيكالىق كوورديناتور تاعايىندالدى. ولار 6 - ساۋىردەن باستاپ وقۋشىلار، اتا-انالار، مۇعالىمدەر تاراپىنان تەحنيكالىق جاعدايعا قاتىستى تۇسەتىن ساۋالداردى قابىلدايتىن بولادى»، - دەپ ءتۇسىندىردى باسقارما باسشىسى.
قادىروۆانىڭ ايتۋىنشا، قالادا كومپيۋتەرى جوق 6500 بالا (4594 وتباسى)، ينتەرنەت جەلىسىنە قوسىلۋ مۇمكىندىگى جوق 5583 بالا (5108 وتباسى) انىقتالعان.
«ءبىز وقۋشىلارىمىزدىڭ كومپيۋتەرلىك تەحنيكامەن قانشالىقتى قامتىلعاندىعىن، ولاردىڭ ينتەرنەت جەلىسىنە كىرۋ مۇمكىندىگى بار-جوعىن باقىلادىق. سايكەسىنشە وسى ساناتتاعى وقۋشىلاردىڭ %95 قاجەتتى تەحنيكامەن قامتىدىق. قالعان وقۋشىلارعا كومپيۋتەرلەر 5- ساۋىرگە دەيىن بەرىلەتىن بولادى. بۇدان قوسا، ءتورتىنشى توقسان باستالعانعا دەيىن ينتەرنەت جەلىسىنە كىرۋگە مۇمكىندىگى جوق وتباسىلاردى عالامتورعا قوساتىن بولامىز. ينتەرنەت جەلىسىنە قوسۋ ماسەلەسىن «قازاق تەلەكوم» ا ق جانە باسقا بايلانىس وپەراتورلارىمەن بىرلەسىپ شەشىپ جاتىرمىز. سونداي-اق، مۇنداي كومەكتى ءبىز كەيبىر مۇعالىمدەرىمىزگە دە كورسەتتىك. عالامتورعا قوسىلماعاندارىن فلەشكارتامەن قامتاماسىز ەتتىك»، - دەدى ش. قادىروۆا.
ايتا كەتەيىك، بۇگىن مەكتەپتەردە سىناما ساباقتارى وتكىزىلدى. 2- ءساۋىر كۇنى قاشىقتىقتان وقىتۋ ۇدەرىسىن جۇزەگە اسىرۋدى اتا-انالارعا ءتۇسىندىرۋ ماقساتىندا اتا-انالار جينالىسى وتەدى. 3- ءساۋىر كۇنى بارلىق مەكتەپتەردە قاشىقتىقتان وقىتۋ فورماتىن ءتۇسىندىرۋ ماقساتىندا ءبىرىڭعاي سىنىپ ساعاتى ۇيىمداستىرىلادى.