الەم ەلدەرى كارانتيندەگى ازاماتتاردى قالاي باقىلايدى؟

نۇر-سۇلتان. قازاقپارات - الەمدە كوروناۆيرۋس كەڭ تارادى. دەگەنمەن، وعان قارسى شارالار بىردەي.

ەۋروپا، ا ق ش، ءۇندىستان، قىتاي كارانتيندە جاتقان ادامداردى قالاي باقىلايدى؟ بۇل ماسەلەنى Der Spiegel زەرتتەپ كوردى.

«گونكونگتە كارانتيندەگى ازاماتتار ەلەكتروندى براسلەت تاعادى. قىتايدا پاتەر ەسىگىنىڭ الدىنا 14 كۇنگە كامەرا ورناتىلادى. سونىمەن قاتار قىتاي كۇنىنە 116 ميلليون ماسكا شىعاراتىندىقتان، ازاماتتاردىڭ بارلىعى ماسكا تاعادى. وڭتۇستىك كورەيادا پاندەميا باستالعالى ماسكالار سۇرانىستا بولعانىمەن، قازىر مەملەكەت ماسكا ساتىلىمىنا باقىلاۋ ەنگىزگەن. مۇندا ءبىر ادام ءبىر اپتادا ەكى ماسكا عانا ساتىپ الا الادى، سونىمەن قاتار جەكە كۋالىك كورسەتۋ مىندەتتەلگەن»، - دەپ جازادى اۆتور.

ونىڭ ايتۋىنشا، وڭتۇستىك كورەيادا ادامداردىڭ ءجۇرىپ-تۇرۋى شەكتەلگەنىمەن، ازاماتتار 2 مەتر اراقاشىقتىقتى ساقتاۋعا تىرىسادى.

«ماسكەۋدە ازاماتتار تەك مەديتسنالىق كومەك الۋ ءۇشىن نەمەسە دۇكەنگە بارۋ ءۇشىن عانا ۇيىنەن شىعا الادى. دەگەنمەن، بۇل مىندەتتەلمەگەندىكتەن، تالاپتىڭ ورىندالۋى دا قيىنعا سوعىپ جاتىر. ال يسپانيادا يتتەر دەفيتسيتى بايقالادى. مۇنىڭ سەبەبى - بۇل مەملەكەتتە تەك ءۇي جانۋارىن دالاعا شىعارۋعا عانا رۇقسات بەرىلگەن. باسقا جاعدايدا 600- دەن 30 مىڭ ەۆروعا دەيىن ايىپپۇل تولەنەدى»، - دەپ جازادى اۆتور.

ال يتاليادا الەۋمەتتىك داعدارىس دەندەپ بارادى. سوندىقتان ۇكىمەت كومەك قاجەت ەتەتىن ازاماتتارعا ازىق-تۇلىك كارتوچكاسىن تاراتىپ جاتىر. مەملەكەت تەگىن ازىق-تۇلىك تاراتۋ ماقساتىنا 400 ميلليون ەۆرو بولگەن.

ال پاريجدە ۇيسىزدەرگە اقشا بەرۋ ساپ تىيىلدى. دەگەنمەن، ۇكىمەت ولاردى ورنالاستىرۋ ءۇشىن قوناق ۇيلەردەن ورىن دايىنداپ جاتىر. بۇل ينفەكتسيا جۇقتىرۋ كورسەتكىشىن ازايتۋ ماقساتىندا قولعا الىنىپ وتىر.

«ا ق ش- تا دا ءۇي-كۇيى جوقتار زاماناۋي قوناق ۇيلەرگە ورنالاسۋ مۇمكىندىگىنە يە بولۋى مۇمكىن.

سان-فرانتسيسكو مىڭداعان قوناق ءۇي ءنومىرىن ۇيسىزدەردى ورنالاستىرۋعا نەمەسە كوروانۆيرۋسپەن اۋىراتىنداردى جاتقىزۋعا دايىنداپ جاتىر. ال نيۋ-يوركتە مانحەتتەندەگى كونفەرەنتسيا ورتالىعى مىڭ ادامعا ارنالعان ۋاقىتشا اۋرۋحاناعا اينالادى. دەگەنمەن، مۇنىڭ ءوزى جەتكىلىكسىز. نيۋ-يوركتە 140 مىڭ ورىن قاجەت، ال قازىر تەك 53 مىڭى بار»، - دەپ جازادى اۆتور.

ونىڭ ايتۋىنشا، اۆستريا استاناسى ۆەنا قالاسىندا پوليتسيا قارت ادامدارعا دۇكەننەن ازىق-تۇلىك اكەلىپ بەرەدى. ال ءۇندىستاندا كارانتيندە جاتقان ادامداردىڭ قولىنا ارنايى بەلگى قويىلادى.

وسىلايشا ولاردان ازاماتتار اۋلاق ءجۇرىپ، بەيمارال جۇرگەندەردى پوليتسياعا تاپسىرا الادى.