دارىگەرلەر سولتۇستىك قازاقستاندا كوروناۆيرۋس جۇقتىرعاندار تۋرالى ايتتى
س ق و دەنساۋلىق ساقتاۋ باسقارماسىنىڭ مالىمەتىنشە، جۇقپالى ىندەتتى جۇقتىرعاندار پەتروپاۆل قالاسىنىڭ 1971 جانە 1975-جىلعى تۇرعىندارى. ەكى ايەل دە ءۇي كارانتينىندە بولعان.
ساراپتاما الىنىپ، ينفەكتسيانى جۇقتىرعاندارى راستالعاننان كەيىن ناۋقاستار الگوريتمگە سايكەس جۇقپالى اۋرۋلار اۋرۋحاناسىنا جەتكىزىلدى.
مامانداردىڭ ايتۋىنشا، ولاردىڭ جاعدايلارى ءبىرقالىپتى. ۇيلەرىندە دەزينفەكتسيالىق جۇمىستار جۇرگىزىلىپ جاتىر. سونداي-اق قارىم-قاتىناستا بولعان اينالاسى انىقتالۋ ۇستىندە.
بۇل - س ق و- دا بۇگىندىككە انىقتالعان وسىمەن ءۇشىنشى جاعداي. بۇعان دەيىن پەتروپاۆل قالاسىنىڭ 1954-جىلى تۋعان تۇرعىنىنان دا قاۋىپتى ىندەت تابىلعان بولاتىن.
س ق و دەنساۋلىق ساقتاۋ باسقارماسى جەتەكشىسىنىڭ ورىنباسارى نۇرلان ايمانوۆتىڭ ايتۋىنشا، كوروناۆيرۋس ينفەكتسياسى تابىلعان ايەلدە پنيەۆمونيا اۋرۋىنىڭ بەلگىلەرى بولعان. قان تالداۋى ونىڭ اۋرۋدى جۇقتىرعانىن كورسەتكەن. ونىمەن جاقىن قارىم-قاتىناستا بولعان 73 ادام جانە اۋرۋ وشاعى تابىلعان ءۇيدىڭ پودەزى كارانتينگە الىندى.