قازاقستاندىقتار «سارى ارقا» كۇيىن ورىنداۋدان جارىسىپ جاتىر

نۇر- سۇلتان. قازاقپارات - ەلىمىزدە #ۇيدەن شىقپا ۇرانى اياسىندا جاڭا چەللەندج باستالدى. قازاقستاننىڭ تانىمال كۇيشىلەرى ۇيىندە وتىرىپ، «سارى ارقا» كۇيىن ورىندادى، دەپ حابارلايدى قازاقپارات.

قۇرمانعازىنىڭ «سارى ارقا» كۇيىن ەلگە تانىمال كۇيشىلەر ايگۇل ۇلكەنبايەۆا، ارمان جۇدەبايەۆ، اسىلبەك ەڭسەپوۆ، ايبەك بەكبوسىنوۆ، نۇركەن ءاشىروۆ، ولجاس سۇلەيمەنوۆ، باتىرجان مىقتىبايەۆ، دۋلات تەمىر، ەرنات ناۋرىز، تەمىرلان ولجاباي جاڭا ونلاين فورماتتا ورىنداعان.

«ايبىندى كۇي ۇيدە الاڭداپ وتىرعان حالىقتىڭ كوڭىلىنە دەمەۋ بولىپ، رۋحىن كوتەرەدى دەپ سەنەمىز. «حابار» اگەنتتىگىنىڭ وسى جوباسىن قولداپ، ۇلتتىق ونەردى دارىپتەپ، ءارى قاراي حالىق اراسىندا چەللەندج جالعاسىن تابادى دەپ ويلايمىز» دەلىنگەن اگەنتتىك تاراتقان حابارلامادا. ايتا كەتەيىك، «حابار» اگەنتتىگى بۇعان دەيىن «ءبىز بىرگەمىز»، «ۇيدەن شىقپا» دەگەن ۇرانمەن 20-دان اسا بەينە روليك ازىرلەدى. ەكى بەينەبايان ءتۇسىردى. ءانشى يبراگيم ەسكەندىردىڭ «بىرگەمىز» جانە تورەعالي تورەالى مەن ءابدىجاپپار ءالقوجانىڭ ورىنداۋىنداعى «ءبىز - قازاقتىڭ بالاسى» اتتى بەينەباياندارى تەرەڭ تاريحىمىزدى ەسكە ءتۇسىرىپ، ءور رۋحىمىزدى اسقاقتاتتى.