كارانتين قۇشاعىنداعى ەلوردا: قالادا ءتارتىپ قالاي ساقتالۋدا

نۇر- سۇلتان. قازاقپارات - ەلوردادا كوروناۆيرۋس ىندەتىنىڭ تارالۋىنا بايلانىستى كارانتين ەنگىزىلگەنىنە دە بىرنەشە كۇن بولدى. دەگەنمەن، قالا ءوز تىرشىلىگىمەن ءومىر سۇرۋدە.

تۇرعىنداردىڭ دۇكەنگە بارىپ ازىق- تۇلىك، ءدارىحانادان كەرەكتى ءدارى- دارمەك الۋىنا، جۇمىسىنا بارۋىنا ەشكىم تىيىم سالماعان. ءبىراق، كوشەدە بەيساۋات جۇرۋگە تىيىم بار ەكەندىگى بەلگىلى. وسىعان وراي قازاقپارات تىلشىلەرى قالا كوشەلەرىندەگى ءتارتىپتى قاداعالاۋعا جۇمىلدىرىلعان پوليتسيا قىزمەتكەرلەرىنىڭ جۇمىسىمەن تانىسىپ قايتقان بولاتىن.

نۇر- سۇلتان قالاسى الماتى اۋداندىق پوليتسيا باسقارماسىنا جەتكەنىمىزدە پوليتسيا قىزمەتكەرلەرى، ۇلتتىق ۇلان، قورعانىس مينيسترلىگىنە قاراستى اسكەري بولىمدەرىنىڭ جاۋىنگەرلەرى كەشكى شولعىنداۋ جۇمىسىنا شىعۋ ءۇشىن ساپ تۇزەپ جاتتى. ءبىراز ۋاقىتتان كەيىن باسشىلىقتان ناقتى نۇسقاۋلىق العان ولار قالانىڭ كوشەلەرىندەگى قوعامدىق قاۋپسىزدىكتى قامتاماسىز ەتۋ ءۇشىن وزدەرىنە بەكىتىلگەن ناقتى باعدار بويىنشا قزىمەتتەرىن اتقارۋ ءۇشىن جان- جاققا تاراپ كەتتى. جالپى، پوليتسيا قىزمەتكەرلەرىنىڭ ايتۋىنشا، ولاردىڭ قىزمەتى تاڭ قىلاڭ بەرە باستالىپ، ءتۇن ورتاسىنا دەيىن جالعاسادى. ەكى اۋىسىممەن جۇمىس ىستەيتىن ولار قوعامدىق ءتارتىپتى باقىلاپ، كارانتين رەجيمىنىڭ ساقتالۋىن ءجىتى نازاردا ۇستايدى. «پوليتسيا قىزمەتكەرلەرى كۇن سايىن ءبىرىنشى اۋىسىمدا تاڭەرتەڭگى 8 دەن 16:00 گە دەيىن، ەكىنشى اۋىسىمدا ساعات 16:00 دەن 23:00 گە دەيىن ۇلتتىق ۇلان مەن قورعانىس مينيسترلىگىنىڭ جاۋىنگەرلەرىمەن قالا كوشەلەرىن شولعىنداۋعا شىعادى. ولارعا ءبىزدىڭ اۋدان بويىنشا بەكىتىلگەن باعدار بار. ءبىز حالىققا كوروناۆيرۋس ىندەتىنىڭ تارالۋىنا جول بەرمەۋ ءۇشىن شارالار قابىلداۋ قاجەتتىگىن ەسكەرتىپ، تۇرعىنارعا اسا قاجەتتىلىك بولماسا ۇيدە وتىرۋ كەرەكتىگىن تۇسىندىرەمىز. سونىمەن قاتار شاعىن جانە ورتا بيزنەس سۋبەكتلەرىن كارانتين كەزىندە جۇمىس ىستەمەۋىن قادالاعايمىز»، - دەدى الماتى اۋداندىق پوليسيا باسقارماسى جەرگىلىك پوليتسيا قىزمەتىنىڭ باستىعى پوليتسيا پولكوۆنيگى قانات نىسانتايەۆ.

ونىڭ اتاپ وتۋىنشە، قازىرگى ۋاقىتتا جۇمىس شتاتتىق رەجىمدە جۇرگىزىلىپ جاتىر. ازىرشە پوليسيا قىزمەتكەرلەرى قالا كوشەلەرىندە كەزدەسكەن بەيساۋات جۇرگىنشىلەرگە كارانتين كەزىندەگى تالاپتاردى قاتاڭ ساقتاۋدى ەسكەرتۋدە. كوشەدە جۇرگەن ادامداردى پوليسيا قىزمەتكەرلەرى ارنايى ەلەكتروندى بازاعا ەنگىزىپ قويادى. بازا تۇرعان ادامدار كارانتين تالابىن ەكىنشى رەت بۇزسا ايىپپۇل تولەۋىنە تۋرا كەلەدى. ايىپپۇل كولەمى دە قوماقتى. شامامەن 27 مىڭ تەڭگە. «ەگەر ولار ءبىزدىڭ ەسكەرتۋىمىزدى قاپەرگە ىلمەيتىن بولسا، وندا قولدانىستاعى زاڭناماعا سايكەس، اكىمشىلىك جاۋاپكەرشىلىك تارتۋعا ءماجبۇر بولامىز. جالپى، حالىقتىڭ باسىم بولىگى تۇسىنىستىكپەن قارايدى. بارلىعى دا الەۋمەتتىك جەلىدەن وقىپ- بىلگەن، جاعدايدىڭ كۇردەلى ەكەندىگىنەن دە حاباردار. كەشە بىرنەشە اۋلانى ارالاپ شىعىپ، ارنايى الاڭداردا ويناپ جۇرگەن بالالاردى كەزدەستىردىك جانە اتا- انالارىنا ەسكەرتتىك. ناتيجە دە بار. قازىر اۋلالاردىڭ 99 پايىنان بالا كورمەيسىز. ۋچاسكەلىك يسپەكتورلارىمىز تۇرعىنداردىڭ مەسسەندجەرلەردەگى چاتىنا تىركەلگەن جانە ولارعا قاجەتتى اقپاراتتى جەتكىزىپ تۇرادى»، - دەدى قانات نىسانتايەۆ.

شىنىمەن دە بۇگىندە قالا كوشەلەرىندە كولىكتىڭ دە، جۇرگىنشىلەردىڭ لەگى بىرنەشە ەسە تومەندەگەن. پوليتسيا قىزمەتكەرلەرىنىڭ جۇمىسىن باقىلاۋ ماقساتىندا كوشەگە شىققانىمىزدا كەزدەسكەن ادامدار نە جۇمىستان، نە اۋرۋحانادان كەلە جاتقاندىعىن دالەلدەيتىن انىقتامالارىن كورسەتىپ جاتتى. ايتالىق، شولعىنداۋ جۇمىسىنا كىرىسكەن پوليتسيا قىزمەتكەرلەرىنە ەڭ ءبىرىنشى كەزدەسىپ قالعان زەمفيرا ەسىمدى قالا تۇرعىنى جۇمىستان كەلە جاتقاندىعىن ايتىپ، ونى دالەلدەيتىن ارنايى قۇجاتىن دا كورسەتتى. «ۇلتتىق كلينيكاداعى جۇمىسىمنان كەلە جاتىرمىن. جۇمىسىم ساعات 17:00 گە دەيىن. قازىر عانا پوليتسيا قىزمەتكەرلەرى توقتاتىپ، انىقتامامدى كورسەتكەننەن كەيىن جىبەردى» ، - دەدى ول بىزگە. پوليتسيا قىزمەتكەرلەرىنىڭ نازارىنا ىلىككەن كەلەسى مەديتسينالىق ماسكاسىز تۇرعىن «ۆسترەچا» دۇكەنى ماڭىندا كەزدەستى. ول وزىنە قاراي بەتتەپ كەلە جاتقان پوليتسيا قىزمەتكەرلەرىن بايقاي سالىسىمەن بەت- اۋىزىن مويىنداعى مويىنوراعىشىمەن قىمتاۋعا تىرىستى. قۇقىق قورعاۋشىلار وعان ەسكەرتۋ جازىپ، جەكە مالىمەتتەرىن ەلەكتروندى بازاعا تىركەپ الدى. جالپى قالا كوشەلەرىندە كەزدەسكەن تۇرعىنداردىڭ باسىم بولىگى دۇكەنگە ازىق- تۇلىك الۋعا نەمەسە ءدارىحاناعا ءدارى الۋعا بارا جاتقاندار بولدى. مەديتسينالىق قىزمەتكە جۇگىنىپ كەلە جاتقاندار دا كەزدەستى. ماسەلەن، پوليتسيا توقتاتقان تاعى ءبىر ازامات تراۆماتولوگيا ورتالىعىنان مەديتسينالىق كومەك الىپ كەلە جاتقانىن دالەلدەيتىن قاعازدارىن كورسەتتى. كوشەدە ماس كۇيدە كەلە جاتقان ازامات تا كەزدەستى. ونى پوليتسيا قىزمەتكەرلەرى ۇستاپ الىپ كەتتى.

«ونى ناركولوگياعا الىپ بارادى. ەگەر ماس بولۋ دەڭگەيى جوعارى بولسا، وندا قوعامدىق ورىندا جانە كارانتين رەجيمى كەزىندە وسىلاي جۇرگەنى ءۇشىن اكىمشىلىك ايىپپۇل راسىمدەلەدى»، - دەدى قانات نىسانتايەۆ. جەرگىلىكتى پوليتسيا قىزمەتىنىڭ باسشىسى كولىك جۇرگىزۋشىلەرىنە دە ەسكەرتۋ جاسالىپ جاتقانىن ايتادى. ال كارانتين ەرەجەسىن ورەسكەل بۇزىپ، قولعا تۇسكەندەردىڭ كولىگى بىردەن ايىپتۇراعىنا قويىلادى. دەگەنمەن، قالا كوشەلەرىندە كولىك وتە از ەكەندىگىن ايتا كەتۋ كەرەك. كارانتين باستالعالى بەرى قالادا تىركەلەتىن قىلمىس سانى دا كۇرت تومەندەگەن. ءتىپتى جوق دەسەك تە بولادى. «جالپى، قالا كوشەلەرىن شولعىنداۋعا ادام جەتكىلىكتى. سەبەبى ۇلتتىق ۇلان مەن قورعانىس مينيسترلىگىنىڭ جاۋىنگەرلەرى كومەككە كەلدى. بىزدە 140 باعدار بار جانە ءبىر باعداردا 3 ادامنان كۇندەلىكتى شولعىنداۋ جۇرگىزەدى» ، - دەدى ول.