قىتاي عالىمدارى كوروناۆيرۋستى ەمدەۋدىڭ تاعى ءبىر ءتاسىلىن تاپتى

نۇر-سۇلتان. قازاقپارات - گونكونگ ۋنيۆەرسيتەتىنىڭ عالىمدارى كوروناۆيرۋستان ەمدەلۋدىڭ تاعى ءبىر امالىن تاپتى.

قىتاي عالىمدارىنىڭ ايتۋىنشا، ينفەكسيامەن كۇرەسۋ ءۇشىن كوروناۆيرۋستى جۇقتىرعان ادامنىڭ قان سارىسۋىن الىپ اۋىرىپ جاتقان ادامعا ەگۋ قاجەت. ويتكەنى بۇرىن اۋىرعان ادامنىڭ قانىندا كوروناۆيرۋسپەن كۇرەسكە تۇسكەن انتيتەلا بولادى. مۇنى Lenta.ru حابارلادى.

قىتايدىڭ ميكروبيولوگتارى ادام اعزاسىندا ACE2 اقۋىزىنا ۇقساس اقۋىز قۇرىلىمى بار سيريالىق الاقورجىندارعا (حومياك) تاجىريبە جاساعان. اقۋىز كوروناۆيرۋستى ادام اعزاسىنا اپاراتىن رەتسەپتور بولعاندىقتان، اداممەن ۇقساس اقۋىزعا يە جانۋارعا تاجىريبە جۇرگىزىلگەن. كوروناۆيرۋسپەن اۋىرعان الاقورجىنداردىڭ جاعدايى باسىندا اۋىر بولعان. وكپەسى مەن كەڭىردەگى قابىنىپ، اسقازانى اۋىرىپ، يممۋنيتەتى السىرەي باستاعان. كەيىن يممۋنيتەتى مىقتى ءبىردى- ەكىلى كەمىرگىش اۋرۋدان جازىلىپ، ساۋىعا باستاعان كورىنەدى. ساۋىققان الاقورجىننىڭ قانىندا ۆيرۋسقا قارسى تۇرار انتيتەلا تۇزىلگەن. كەيىن عالىمدار كوروناۆيرۋسپەن اۋىرعان الاقورجىننىڭ قان سارىسۋىن الىپ، ساۋ الاقورجىندارعا ەگىپ اۋرۋ جۇقتىرعان. ال ولار بولسا، بۇرىن اۋىرعان الاقورجىندار سياقتى كوپ قينالماعان، تەز جازىلىپ كەتكەن. وسىدان عالىمدار ادام اعزاسىنىڭ ءوزى كوروناۆيرۋسقا قارسى يممۋنيتەت تۇزەتىنىن ءارى ودان پايدا بولعان انتيتەلانىڭ ەمگە قولدانۋعا بولاتىنىن بايقاعان.

ەكسپەريمەنت بارىسىندا جانۋارلاردىڭ كوروناۆيرۋستى ءبىر- بىرىنە جۇقتىراتىنى دا بەلگىلى بولدى. ءبىر توردا جۇرگەن الاقورجىنداردىڭ بارلىعى اۋرۋعا شالدىققان ەكەن. قازىر تاجىريبە جاساعان عالىمدار توبى ەتيكا جونىندەگى مەديتسينالىق كوميتەتتىڭ جاۋابىن كۇتىپ وتىر. ەگەر كوميتەت رۇقسات بەرسە، وندا ادامدارعا تاجىريبە جاسالماق. بۇعان دەيىن قىتاي عالىمدارى كوروناۆيرۋستى «مەفلوحين» ءدارى- دارمەگى ارقىلى ەمدەۋگە بولاتىنىن دالەلدەگەن ەدى. قىتاي مەن فرانسيا كوروناۆيرۋسقا شالدىققانداردى وسى پرەپاراتپەن ەمدەپ جاتىر.

Massaget.kz