الماتىدا كوممۋنالدىق تولەمدەردى تولەۋ كەيىنگە شەگەرىلدى
بۇل تۋرالى الماتى قالاسى تۇرعىن ءۇي ساياساتى باسقارما باسشىسىنىڭ ورىنباسارى مەيىرجان وتىنشيەۆ بريفينگتە ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، قالا اكىمدىگى تۇرعىنداردى قولداۋ بويىنشا ءبىرقاتار شارالاردى قابىلداعان. «سۋمەن جابدىقتاۋ جانە سۋ تارتۋ قىزمەتتەرىنە («الماتى سۋ» م ك ك)، جىلۋ جانە ىستىق سۋمەن جابدىقتاۋعا («الماتى جىلۋ جەلىلەرى» ج ش س) جانە ەلەكتر ەنەرگياسىنا («الماتىەنەرگوسبىت» ج ش س)، گازبەن جابدىقتاۋ («قازترانسگاز ايماق» ا ق الماتى وندىرىستىك فيليالى) جانە تەلەفون بايلانىسىنا («الماتى تەلەكوم» ا ت د) تولەم جاساۋدى كەيىنگە قالدىرىلدى»، - دەيدى ول.
بۇل باستامانى ليفت ۇيىمدارى دا قولدادى. ولار قالا تۇرعىندارىنا ايىپپۇل سانكسيالارىن قولدانباي، ەكى ايعا (ناۋرىز، ءساۋىر) تولەمدى كەيىنگە قالدىردى.
«تۇرعىن ءۇيدى جوندەۋ جانە كۇتىپ ۇستاۋ قورىنان اۋلا سىپىرۋشىلاردىڭ، كلينينگتىك كومپانيالاردىڭ ەڭبەكاقىسى، اۆاريالىق قىزمەتتەردىڭ، ليفتىلەر مەن كوتەرگىشتەر سياقتى ءقاۋىپتى تەحنيكالىق قۇرىلعىلارعا قىزمەت كورسەتەتىن ۇيىمداردىڭ شاقىرۋلارى، سونداي- اق كوندومينيۋمنىڭ تىنىس- تىرشىلىگىن قامتاماسىز ەتۋ جانە ورتاق مۇلىكتى ءقاۋىپسىز پايدالانۋ، وندا ءتيىستى ءتارتىپتى ساقتاۋ، دەزينفەكتسيالىق قۇرالداردى پايدالانا وتىرىپ، سانيتارلىق ىلعالدى تازالاۋ ءۇشىن قاجەتتى باسقا دا شىعىندار تولەنەدى»، - دەيدى مەيىرجان وتىنشيەۆ سونداي-اق ول، بۇل رەتتە، باسقارۋ ورگاندارىنا توتەنشە جاعدايدىڭ قولدانىلۋ كەزەڭىندە جارنالاردى كەيىنگە قالدىرۋدى كوزدەي وتىرىپ، كۇردەلى جوندەۋگە جارنالار جۇرگىزۋگە مۇمكىندىگى جوق مەنشىك يەلەرىنە ايىپپۇل سانكتسيالارىن قولدانباۋدى ۇسىناتىنىن ايتتى.
«تۇرعىن ءۇي- كوممۋنالدىق شارۋاشىلىعىن جاڭعىرتۋدىڭ مەملەكەتتىك باعدارلاماسى بويىنشا كوندومينيۋم وبەكتىسىنىڭ ورتاق مۇلكىنە كۇردەلى جوندەۋ جۇرگىزۋ بويىنشا قارىزدى وتەۋگە ارنالعان تولەمدەرگە قاتىستى مەنشىك يەلەرى دە كارانتين ۋاقىتىندا تولەمدەردىڭ مەرزىمىن ۇزارتا الادى. تولەۋ مۇمكىندىگى بولماعان جاعدايدا ايىپپۇل سانكسيالارى قولدانىلمايدى»، - دەدى ول.
اۆتور: الما مۇقانوۆا