كوروناۆيرۋستان قايتىس بولعان ءۇشىنشى قازاقستاندىق تۋرالى نە بەلگىلى؟

نۇر-سۇلتان. قازاقپارات - قازاقستاندا كوروناۆيرۋستان قايتىس بولعان ءۇشىنشى ادامنىڭ 62 جاستا بولعانى انىقتالدى.

بۇل تۋرالى «حابار24» تەلەارناسىنىڭ تىكەلەي ەفيرىندە وتكەن بريفينگتە ايتىلدى.

«بۇگىن تاڭەرتەڭ قاراعاندى قالاسىندا كوروناۆيرۋس ينفەكسياسىنان قايتىس بولعان ءبىر جاعداي تىركەلدى. 30-ناۋرىزدا قاراعاندى قالاسىنىڭ اۋرۋحانالارىنىڭ بىرىنە 62 جاستاعى ەر ادام جاتقىزىلدى. سول كەزدە ەكىجاقتى پنيەۆمونيا، تىنىس الۋ قيىنداعانى انىقتالدى. جاعدايى اۋىر بولدى. رەانيماتسيالىق بوكسقا جاتقىزىلدى، - دەدى قالالىق دەنساۋلىق ساقتاۋ باسقارماسىنىڭ باسشىسى ەرجان نۇرلىبايەۆ.

ەسكە سالايىق، مۇنىڭ الدىندا ەلىمىزدە كوروناۆيرۋستان ءۇشىنشى ادامنىڭ قاراعاندى وبلىسىندا قايتىس بولعانى حابارلانعان ەدى.

سونىمەن قاتار، كوروناۆيرۋس جۇقتىرعان تاعى 15 ادام تىركەلگەنى انىقتالعان بولاتىن: الماتى قالاسىندا - 2 ادام، نۇر- سۇلتان قالاسىندا - 6 ادام، قاراعاندى وبلىسىندا - 1 ادام، اقمولا وبلىسىندا - 6 ادام.

وسىلايشا، قازاقستاندا كوروناۆيرۋس جۇقتىرعانداردىڭ سانى 363 ادامعا جەتتى.